Juon Ļapļo̧k in Jeraam̧m̧an

Pija

man holding bags of food

Kōmeļeļe jān Ale + Ale, Morgan Gaynin

Lio pāleeō, Carmen, im n̄a kar bōk ajri eo nejim im̧aan tata ke iaar kūr n̄an erom bisop an ward eo am. Ilo tōre eo, eaar apan̄ am mour ikkijien jāān. Eaar erom kapan̄pan̄ n̄an eō n̄an kake n̄an baam̧le eo aō im ilo ejja iien eo wōt mije im lale ro uwaan ward eo am.

Juon Jabōt, iaar kile juon m̧am̧a eo ejjeļo̧k rejtan ippān ajri ro nejin emān reddik ilo kweilo̧k in kwojkwoj eo. Eaar jijet ilo jea eo āliktata ilo jikin jar eo im kajjieon̄ ijo em̧m̧an tata ippān n̄an dāpij an ajri ro nejin ikōn̄. Iaar jeļā liin eaar apan̄ ikkijien jāān barāinwōt, bōtaab liin ejjan̄in kar kajjitōk kōn jipan̄. Wiik ko raar eļļāļo̧k, im aolep Jabōt eaar itok n̄an jar ippān ajri ro nejin.

Juon raan, iaar bōk jāāk in kōļļā eo aō. Kar jeraam̧m̧an n̄an bōk juon ļapļo̧k, iaar kāālet n̄an kōjerbal ļapļo̧k in jāān eo n̄an waiki kein jerbal ko n̄an kōm̧m̧ani ijōko remenin aikuj ilo m̧weo im̧ō. Bōtaab ke iaar jibadōkļo̧k jikin wia eo, sister in im ajri ro nejin raar itok n̄an kōļmenļo̧kjeņ eo aō. Iaar en̄jake ij aikuj in kōjerbal ļapļo̧k in jāān eo n̄an wia m̧ōn̄ā n̄an er. Iaar kūrļo̧k Carmen im jiron̄ e ta eo iaar en̄jake iaar aikuj in kōm̧m̧ane. Eaar errā.

Ke iaar wia, meja eaar lo jet kukiij ko. Iaar ļōmņak bwe bōlen ajri ro renaaj kar kōņaan jet tōn̄al. Iaar kanne ruo pāāk in m̧ōn̄ā im kar ilo̧k n̄an m̧weo im̧ōn sister in.

Iaar kaļļaļļaļ kōjām rā eo em̧or jet alen ko. Ke iaar tōn em̧m̧akūt, ālkiktata kōjām eo eaar peļļo̧k. “Bisop,” sister eo eaar ba “Ilbōk n̄an lo eok ijin.” Ejjab to, ajri ro nejin raar ettōrtok itulikin.

“Iaar bōktok jet kijemi m̧ōn̄ā,” iaar ba.

Juon iaan leddik ro nejin kar lo kukiij ko im ekkelo̧k, “Kukiiji!” Ļaddik im leddk ro jein im jatin raar aiintok doon ilo m̧ōņōņō. Ļeddik eo nejin jiljilimjuon an iiō eaar atbakoj eō. “Kom̧m̧ool, Bisop!” eaar ba.

Iaar lale ilowaan m̧weo im̧wer im lo bwe sister in ekar kwoļkoļ nuknuk ilo juon paan ioon būļoor eo. Baam̧le eo eaar ejjeļo̧k aer tebōļ im kar kiki ioon juon māātrej ioon būļoor eo. Iaar kile ewi jon̄an aer kar pād ilo aikuj. Ikar kōm̧m̧an koņ n̄an kanooj lale bwe enaaj kar wōr aer tebōļ im bwe kajjojo enaaj wōr juon an peet.

En̄jake in eaar jipan̄ eō n̄an kile bwe Irooj ej tōl im kōjeraam̧m̧an ro Rikarejeran. Jejjb aikuji juon kūr eo ejenolo̧k n̄an maron̄ jipan̄ ro jeid im jatid. Jej aikuj in wōt atartar ippān Jetōb eo, kile wōn eo ej aikuj jipan̄, im m̧ōņōņō in erom kein jerbal ko ilo pein Irooj.