Mga Kausaban sa Organisasyon Nagtutok sa Pagpalig-on sa Kabatan-onan

Isip kabahin sa paningkamot nga mas makapahimo sa mga kabatan-onan sa Simbahan nga makakab-ot sa ilang balaanong potensyal, ang mga kausaban diha sa organisasyon sa Young Men ug Young Women gipahibalo sa kinatibuk-ang komperensya sa Oktubre 2019 ni Presidente Russell M. Nelson (tan-awa sa pahina 38) ug gipasabut ni Elder Quentin L. Cook sa Korum sa Napulog Duha ka mga Apostoles (tan-awa sa pahina 40) ug ni Sister Bonnie H. Cordon, Kinatibuk-ang Presidente sa Young Women (tan-awa sa pahina 67).

Kini nga mga kausaban naghatag og gibug-aton nga ang “una ug importante nga responsibilidad sa usa ka bishop mao ang pag-atiman sa batan-ong mga lalaki ug batan-ong mga babaye sa iyang ward,” miingon si Presidente Nelson. Ang mga kausaban maglakip sa paghunong sa mga kapangulohan sa Young Men sa ward. Ang bishopric, isip ang kapangulohan sa Aaronic nga Pagkapari, tabangan sa mga tigtambag sa korum ug sa pipila ka mga sitwasyon sa mga espesyalista. Ang presidente sa Young Women sa ward mo-report direkta ngadto sa bishop.

Ang mga kapangulohan sa korum ug sa klase magtutok sa buhat sa kaluwasan, lakip ang misyonaryo nga buhat sa miyembro, retensyon sa kinabig, pagpaaktibo, buhat sa templo ug family history, ug pagtudlo sa ebanghelyo. Ang mga presidente sa korum ug sa klase sa kabatan-oan magplano ug mopahigayon og mga miting inig Dominggo, mga proyekto sa pagserbisyo, ug ubang mga kalihokan.

Ang mga kalihokan sa kabatan-onan dili na tawgon nga “Mutual” apan mahimong matawag nga “mga kalihokan sa Young Women,” “mga kalihokan sa korum sa Aaronic nga Pagkapari,” o “mga kalihokan sa kabatan-onan.” Ang mga budget allowance alang sa mga kalihokan sa kabatan-onan kinahanglan ibahin-bahin og tarung, sumala sa gidaghanon sa mga kabatan-onan sa matag organisasyon.

Ang tema sa Young Women giusab, ug ang gidaghanon sa mga klase sa Young Women kinahanglang iorganisar sumala sa gidaghanon ug sa mga panginahanglan sa batan-ong mga babaye. Ang mga klase pagatawgon og “Young Women,” gisundan sa mga edad nianang naa sa klase, sama sa “Young Women 12–14,” o yano lang nga “Young Women” kon ang tanan magkapundok. Ang mga ngalan nga “Beehive,” “Mia Maid” ug “Laurel” dili na gamiton.

Usa ka sakop sa stake high council moserbisyo isip presidente sa Young Men sa stake, ug ang kapangulohan sa Young Men sa stake moserbisyo diha sa Aaronic nga Pagkapari–Young Women nga komitiba uban sa kapangulohan sa Young Women sa stake, ang high councilor nga gi-assign sa Young Women, ug ang high councilor nga gi-assign sa Primary.

Sa ubang mga kausaban, ang Relief Society, Young Women, Young Men, Primary, ug Sunday School pagatawgon og “mga organisasyon” imbis nga “mga auxiliary”, ug ang mga lider tawagon nga “Kinatibuk-ang mga Opisyales” diha sa tibuok Simbahan nga lebel ug isip “mga opisyales sa stake” ug “opisyales sa ward” sa lokal nga lebel.