Sa Unsang Paagi nga ang Usa ka Bata Nakatabang Kanako nga Makasabut sa Gugma sa Manluluwas alang Kanako

Usa ka Bisperas sa Bag-ong Tuig, nagbisita ko sa St. George Utah Temple Visitors’ Center uban sa akong igsoong babaye, ug sa iyang bana ug mga anak. Usa sa mga kwarto, sila adunay mga talan-awon sa belen [pagkatawo ni Kristo] gikan sa tibuok kalibutan. Nadani ko sa mga kalainan sa matag usa—sa gidak-on, kolor, gigamit nga mga materyal, lain-laing ekspresyon sa nawong, ug uban pa. Gamhanan kini ug maligdong.

Ang akong singko anyos nga pag-umangkon nga babaye, si Juliet, gusto nga magpakugos, mao nga sa nagkugos na ko niya, gisuhid namo ang pasundayag. Sa kahilom sa kwarto, si Juliet nagsugod sa balik-balik pag-ingon, “Anaa si Jesus! Ug anaa si Jesus! Ug kana si Jesus! Ug kana si Jesus!” gibalik-balik kanunay samtang moagi kami sa Belen. Ang iyang tingog mapasigarbuhon samtang madasigon siyang motudlo sa matag batang Jesus. Gusto siyang moduol kutob sa mahimo sa matag usa. Naningkamot ko sa paghangyo kaniya nga mohilom og gamay, apan walay nahimo—nalipay kaayo siya. Iya kong pabalikon ngadto sa sinugdanan sa matag higayon nga moabut na kami sa tumoy sa pasundayag, ug gibalik namo kini sulod sa 20 ka minuto samtang siya mipadayon sa pagsinggit, “Ug anaa si Jesus! Ug anaa si Jesus!” Sa dihang sa katapusan mibiya kami niana nga kwarto, ang akong likod misakit ug ang akong mga bukton namuypoy, apan ang akong kasingkasing migaan kay sa dugay nang panahon. Ang iyang kahimuot ug kasiguroan sa pagkakita ug pagkaila sa Manluluwas nagbilin og dakong epekto ngari nako.

Wala kaayo ko maghunahuna niini nga kasinatian hangtud naglingkod ko sa simbahan pipila ka semana ang milabay ug ang kongregasyon nanganta sa “Buhi ang Manunubos Ko, Niini Nasayud Ako (Mga Himno, nu. 80). Gikanta nako kanang mao nga himno sa makadaghang higayon sa akong kinabuhi nga wala maghunahuna, apan niining higayuna lahi. Samtang nagkanta ko, “Buhi nga higugmaon ko. Sa langit Siya tighangyo. Buhi pagtagbaw kanako. Kaniya ako mangayo,” natuk-an ko sa mga pulong. Mihunong ko sa pagkanta ug mihilak samtang naminaw ko sa nahibilin nga mga bersikulo. Gibati nako nga ang matag pulong tinuod gayud ug mapasaligon ngari kanako nianang higayuna. Gibati nako nga ang Manluluwas migakus nako ug gibati nako nga wala hikalimti o tamaya.

Kanunay ko nga maghunahuna nga ang akong mga kahuyang usahay mihimo kanako nga dili takus sa gugma sa Manluluwas. Apan ang pagsaksi sa kasaulogan ni Jesus pinaagi sa panan-awon sa usa ka singko anyos mao ang usa ka butang nga akong kinahanglan aron nga buntugon ang akong kaugalingong pagduha-duha ug mosalig nga Siya gayud nahigugma kanako, bisan pa sa akong pagkadili hingpit. Kinahanglan kong mosalig nga Siya motabang kanako sa saktong panahon, matag adlaw, aron mahimong mas maayo ang akong kinabuhi ug himoon nga kalig-on ang mga kahuyang. Mosalig nga Siya nagtabang kanako sa pagpakigbatok sa akong mga gubat. Mosalig nga ako makalingkawas sa tinuyoan nga mga higot sa kapait, pagpanaway sa kaugalingon, ug pagmahay, ug bisan unsa pay mga hampak kanako uban sa Iyang tabang, ug mobiya kanila sa Iyang tiilan—alang sa kaayohan. Mosalig nga kini usa ka proseso, nga kita nakig-away batok sa kinaiyahan sa tawo ug mga kasamok sa kinabuhi, ug nga Siya makanunayon ug mapailubon niining tanan.

Walay pagduha-duha si Juliet sa pagkakita ni Jesukristo ug pag-ila Kaniya sa iyang palibut—gibuhat ra niya. Natural kining miabut kaniya ug siya nakahibalo nga gihigugma siya Niya. Ug ang iyang pahiyom sobra pa sa igong ebidensya alang kanako nga siya nakaila ug nahigugma Kaniya. Nagsugod ko sa pagsabut nganong ang Manluluwas mimando nga kita mahimong sama sa gagmayng mga bata aron makasulod sa Iyang gingharian. Ganahan ko nga mahisama ni Juliet.

Sukad niadtong duha ka mga kasinatian, naningkamot ko nga makabaton og mas dakong pagsalig ug makakita sa Manluluwas sa akong palibut. Ug nabuhat nako! Nakita nako Siya sa mabination nga mga pulong ug mga aksyon sa mga dumuduong ug mga higala, sa mga mata niadtong akong gikaistorya, kon ang adlaw mosubang ug kon ako makadungog nga manganta ang kalanggaman, nagsugod ko sa pagbati nga wala na kaayo mabudlay ug mas malaumon na. Nagsugod na ko sa pag-ingon sa akong hunahuna, “Anaa si Jesus, anaa si Jesus, ug anaa si Jesus.” Gusto ko nga magpakabuhi sa tibuok nakong kinabuhi nianang paagiha. Siya anaa bisan asa ug kita kinahanglan lang nga mopili sa pagtan-aw Kaniya, diha sa gagmay nga mga butang ug dagkong mga butang. Siya mao ang labing mahinungdanong gasa.