Hello gikan sa Sagrado nga Kakahoyan!
Hi, kami si Margo ug Paolo.
Karong bulana, aron sa pagsaulog sa Pagpahiuli, atong bisitahon ang dapit diin ang Unang Panan-awon nahitabo 200 ka tuig na ang milabay!
Sa dihang 14 anyos pa si Joseph Smith, nagpuyo siya sa usa ka balay nga troso sa New York, USA. Duna siyay lima ka igsoong lalaki ug tulo ka igsoong babaye. Misunod siya sa iyang mga ginikanan ug mahigalaon sa uban. Mibasa siya sa Biblia uban sa iyang pamilya, apan wala sila motambong sa samang simbahan.
Kugihan si Joseph. Mitabang siya sa pagputol og mga kahoy aron makapananum ang iyang pamilya og mga lagutmon. Mitabang usab siya sa iyang pamilya sa pagkolekta og duga sa maple nga kahoy aron sa paghimo og asukar.
Gusto ni Joseph nga makakita og simbahan sama sa anaa diha sa Biblia. Usa ka adlaw miadto siya sa kakahoyan ug nag-ampo. Ang Langitnong Amahan ug si Jesus mipakita kaniya. Misulti Sila kaniya nga ang iyang mga sala napasaylo. Miingon usab Sila nga kinahanglang dili siya moapil sa bisan unsa nga simbahan. Sa dili madugay ang Simbahan ni Jesus ipahiuli!
Daghang mga tawo ang mibugal-bugal kang Joseph tungod sa iyang nakita. Miingon sila nga gihimo-himo ra niya kini. Apan si Joseph nagsulti sa tinuod. Miingon siya, “Ako nasayud niini, ug ako nasayud nga ang Dios nasayud niini, ug ako dili makalimud niini” (Joseph Smith—Kasaysayan 1:24–25).
Karon, ang mga tawo makaadto sa dapit diin nag-ampo si Joseph. Maanindot dinhi ug malinawon kaayo.
Kini nga mga bata nagpuyo kon asa nagdako si Joseph Smith!
Nasayud ko nga ang Sagrado nga Kakahoyan usa ka espesyal nga dapit tungod kay si Joseph Smith didto nag-ampo ug nakakita sa Langitnong Amahan ug ni Jesus.
Piper D., edad 5, New York, USA
Mapasalamaton ako nga nagpuyo kami duol sa panimalay ni Joseph Smith. Ganahan ko nga moadto sa Grandin building nga anaa ang printing press. Gusto gayud nakong makita kon asa nila gitagik ang unang mga kopya sa Basahon ni Mormon.
Roscoe B., edad 9, New York, USA
Salamat sa pagbisita sa Sagrado nga Kakahoyan uban namo. Magkita kita sa sunod higayon!
Mga litrato sa batan-ong mga lalaki pinaagi ni Julie Poulson; mga paghulagway pinaagi ni Katie McDee