Giunsa ni Joseph Smith sa paghubad ang Basahon ni Mormon?
Sa wala pa motago sa bulawang mga palid, si Moroni, ang katapusang propeta sa Basahon ni Mormon, misulat diha sa ulohan nga pahina sa basahon nga ang basahon pagahubaron “pinaagi sa gasa ug gahum sa Dios.” Nagpabilin kini nga maoy labing maayo nga paghulagway sa paghubad sa Basahon ni Mormon.
Si Joseph Smith midiktar sa mga pulong sa paghubad ngadto sa mga tigsulat, kasagaran si Oliver Cowdery. Tungod kay si Joseph mihubad og hingpit nga wala mailhi nga pinulongan, kinahanglan siyang mosalig sa Ginoo. Usa ka paagi nga mitabang ang Ginoo mao ang pagsangkap og pisikal nga mga himan nga makatabang ni Joseph sa paghubad. Ang mga saksi miingon nga si Joseph mitan-aw ngadto sa mga instrumento ug nga ang mga pulong mipakita kaniya sa Iningles. Ang mga instrumento sa paghubad naglakip sa “mga tighubad” o “Urim ug Thummim”—duha ka tin-aw nga mga bato nga gihigot sa metal nga bayanan aron si Joseph makatan-aw agi niini. Gihatag kini ngadto ni Joseph uban sa mga palid. Laing instrumento nga gigamit ni Joseph mao ang “bato sa manalagna” nga iyang tan-awon, kasagaran pinaagi sa pagbutang niini sulod sa kalo. Nakit-an ni Joseph kini nga bato sa sayo pa ug gigamit kini sa pagpangita og gitago o nawala nga mga butang. Pareho niyang gigamit ang mga tighubad ug ang bato sa manalagna samtang naghubad siya, kanunay nga nagsalig sa inspirasyon sa langit.
Ang paghubad sa Basahon ni Mormon tinuod gayud nga milagroso ug nahimo “pinaagi sa gasa ug gahum sa Dios.”