Na cava o kaya ni ra sega ni vakabauta na nomu itokani ni rawa ni yaco na ka vakataka na iMatai ni Raivotu?

Ena taro vakayalo eso, e sega ni kena ibalebale ga ni da sa gadreva; eda sa gadreva talega na vakabauta me kilai kina ni sa rawa ni yaco dina na iMatai ni Raivotu. Eda rawa ni taracake na vakabauta oya ena nona kerei na Tamada Vakalomalagi ka vakarorogo voli ki na Yalotabu.

Kerei ira na nomu itokani me ra vulica na iVola Tabu. Kevaka era vakabauta tu ni sa vosa ni Kalou, sa dodonu mera na vakabauta ni sa vosa tiko na Kalou vei keda nikua ena raivotu me vakataka na iMatai ni Raivotu baleta ni a cakava vakakina vei Atama, Mosese, Aisea, kei na parofita tale eso ena vuqa na sala duidui.

Na dina ni kena yaco tu na vukitani me vica na drau na yabaki e sega ni kena ibalebale ni sa tarova na Kalou na Nona raivotu. Sa gadrevi meda yalomalumalumu ka kerea vua na Kalou ena lomada taucoko kei na yalodina, me vaka e vakayacora o Josefa Simici.

Au na taroga ira na noqu itokani, “O ni vakabauta tu li na Kalou? O ni vakabauta tu li ni sa bulia o Koya na ka kecega? O ni vakabauta tu li ni a rairai o Koya vei ira na parofita ena gauna e liu? Kevaka sa vakakina, cava na vuna o ni sega ni vakabauta kina ni sa rawa ena gauna oqo? E sa rawa.”

Au wasea na noqu ivakadinadina vei ira na noqu itokani ni sa dau vakatakila na Tamada Vakalomalagi na ka eso vei ira na Luvena, ni ra kerei koya ena yalodina me ra kila na dina. A gadreva tu o Josefa Simici me kila na dina, ka cakacakataka o koya na nona vakabauta. Sa rawa talega ni o sotava na marau totoka kevaka o kerea na Tamada Vakalomalagi ena masumasu ena yalomu taucoko.