Dijitol Nomo: Blong Ol Yang Adalt
Faenem Hop long Bigfala Taem blong Trabol
Taem we KOVID 19 i bin kilim strong Itali, mi bin faenem wan risen blong hang long hop.
Hem we i raet i stap long Katansaro, Itali.
Mi laekem tumas ol toktok blong kamfot we oli kam long Jisas, we Hem i bin serem wetem ol disaepol blong Hem afta long Laef Bakegen long Ded blong Hem: “Pis i stap wetem yufala” (Jon 20:19). ?I wan sapraes we Sevya blong yumi i oltaem promesem olgeta we oli stap folem Hem se bae oli gat pis? Mi bin gat wan spesel eksperiens we i bin rimaenem mi long trutok ia i no longtaem i pas.
Mi Wari mo Stap long Kwarantin
Wan naet, taem mi bin stap wajem TV, olgeta long nius oli bin stap tokbaot KOVID-19 mo olsem wanem hem i kilim Itali, ples we mi mi stap long hem. Oli bin tokbaot hae namba blong ol pipol we oli bin ded from vaeres ia, mo oli tokbaot bigfala namba blong ol man we oli kasem sik, we i stap go antap yet. I nomata se hemia i bin nogud tumas, mi no bin wari tumas long tetaem ia. Be samples tu wik i pas afta, ol samting oli go nogud moa, mo wari blong mi tu.
Mi bin filim se mi no glad mo mi seksek long medel blong evri samting. Mi bin wari tumas se bambae mi sik. Mo, blong fas taem long laef blong mi, mi bin fraet tumas blong go long wok. Mi mas werem ol hanglav, mo wan mask eni taem we mi go aotsaed. Wan wik afta, ful kantri blong mi i sarem evri doa, mo evriwan i mas stap long strong kwarantin.
Long tetaem ia, mifala i no bin gat raet blong aot long haos blong mifala, be mifala i save aot nomo blong pem kaekae wan taem long wan wik. Blong stastap nomo insaed long haos, i bin wan had samting. Evri miting blong Jos oli bin stop blong wan sot taem, mo hemia i mekem mi mi no glad tumas; be wanem i mekem mi harem nogud moa, i taem we ol tempol oli klos from se mi bin plan blong go long siling blong wan famli we mi bin tijim long misin blong mi. Hat blong mi i brok mo mi nomo gat hop from ol situesen we i stap long wol.
Miusik I Tajem Mi
Wan moning, taem mi bin stap ridim ol skripja blong mi, mo stap lisin long wan singsing we oli singaotem “Pis long Kraes,” mi bin prea mo askem Papa long Heven: “?Olsem wanem bae mi save stap holemtaet mi i stap wetem hop long taem ia we i had?”
Long tetaem ia nao mi stat blong lisin gud long ol toktok blong singsing ia.
Hem i givim hop
Taem hop i lus.
Hem i givim paoa
Taem yumi nomo muv.
Hem i givim selta
Long taem blong trabol.
Taem i no gat pis long wol,
I gat pis long Kraes.1
Mi bin filim Spirit i testifae long mi se ol toktok ia oli bin tru. Mi bin sakem ae long olfala misinari nem tag mo harem ol toktok ia long maen blong mi: “Romina, mi wantem yu blong gat semfala pis ia we yu bin givim long ol narawan long taem blong misin blong yu, taem yu go serem mesej blong hop blong mi. Evri samting bae oli oraet. Bae mi no lego yu yu stap yuwan.”
Mekem se naoia, !mi wantem serem mesej ia blong hop! I nomata se mi bin filim fulap fraet mo wari long taem ia we i had long wol, mi bin rili save se, wetem Jisas Kraes, !i gat hop! Tanem yu i go long Hem. Lisin gud long Hem. Folem Hem. Yumi save faenem pis long Hem. I gat paoa blong stap biliv long Hem, mo taem yu mekem, bambae Hem i givim yu paoa ia blong hang strong long hop (luk long Ita 12:4).
Hang Strong long Hop
Taem hem i bin stap tokbaot hop, Elda Dieter F. Uchtdorf blong Kworom blong Olgeta Twelef Aposol i bin tijim: “Hop long God, gud fasin blong Hem, mo paoa blong Hem i mekem se yumi gat niu strong paoa long tingting long taem blong ol had jalenj.”2 Nomata se taem we yumi stap long hem i save mekem yumi fraet, yumi save jusum blong gat strong paoa long tingting mo trastem ol promes blong Lod. Taem we i gat jalenj long laef, yumi no nid blong askem Papa long Heven blong jenisim situesen blong yumi, be i gud blong yumi askem Hem blong jenisim fasin blong yumi. Yumi save lan mo groap long eni situesen.
Mi save se God i stap wetem yumi, mo Hem i lavem ol pikinini blong Hem—iven olgeta ia we oli stap long bigfala taem blong trabol blong wan wol sik ia. Mi save se, tru long Hem, evri samting bae i oraet. Mo mi save se mi oltaem save hang strong long pis we i kam taem mi stap biliv long Jisas Kraes. From Atonmen blong Hem we i no gat en, mi no nidim blong fesem ol hadtaem ia miwan.