Sa Digital Lamang: Mga Young Adult
Unsay Natudlo Kanako sa Pagsimba diha sa Panimalay [Church at Home] mahitungod sa Panagtigum
Naguol ko dihang ang mga miting sa Simbahan temporaryo nga gihunong tungod sa sakit nga mikatap sa tibuok kalibutan. Karon mapasalamaton ko sa unsay akong nakat-unan.
Ang tagsulat nagpuyo sa Scania, Sweden.
Ang pagsimba kanunay nga usa sa pinakaimportante sa akong semana. Ganahan ko nga makig-uban sa akong mga higala ug pamilya ug paghikling sa mga kabalaka sa kalibutan samtang dungan kami nga magsimba.
Dayon ang tanan nagsugod sa pagkausab tungod sa sakit nga mikatap sa tibuok kalibutan. Nianang panahona, wala kami daghang mga kaso sa coronavirus sa Sweden, ug nagpadayon gihapon ang eskwela sama sa naandan, mao nga wala gyud kaayo ko kasabut nganong ang mga lider sa Simbahan mibati sa panginahanglan nga ihunong ang mga miting. Uban sa tanang kaguliyang sa tibuok kalibutan, gusto kaayo kong makighimamat sa akong mga higala inig ka-Dominggo. Apan akong nahibaloan nga ang mga miting sa Simbahan temporaryong gihunong ug nga kami magsimba diha sa panimalay. Nasubo ko ug nasagmuyo og gamay.
Dihang miabut ang Dominggo, nag-ilis ko ug namulbos sa nawng, namahaw, ug milingkod tupad sa akong mga ginikanan. Akong nakita nga mainampingon nga giandam sa akong papa ang sakramento nga gitabunan og puti nga panapton ang pan ug ang tubig ug miabli sa iyang mga kasulatan ngadto sa mga pag-ampo sa sakramento.
Sa wala madugay miabut na ang pagpanganta sa himno sa sakramento. Dihang gisugdan sa akong papa ang pagpikaspikas sa pan, gibati nako sa hilabihan ang Espiritu. Sama og nag-ingon Siya kanako nga ang Pag-ula ni Jesukristo para gayud kanako. Misugod ko sa paghilak, ug sa dihang akong gitan-aw ang akong mama, akong nakita nga naghilak pud siya ug mipahiyom kanako—mibati usab siya sa Espiritu.
Bisan og maduhaduhaon ko sa sinugdanan, karon nasayud ko nga ang pag-ambit sa sakramento diha sa panimalay usa ka talagsaon kaayo ug matahum nga oportunidad. Sa bag-ohay lang nga mga semana, akong gibati ang dako nga pagpasalamat sa pagkapari ug sa gipahiuli nga ebanghelyo, nga nagtanyag kanamo og kahupayan ug kalinaw atol sa samok nga mga panahon. Gibati usab nako ang gugma sa Langitnong Amahan para kanatong tanan nga Iyang mga anak. Ug labaw pang gibati nako ang pasalamat alang sa propeta, kinsa nagtabang nato aron mahibalo unsay buhaton, bisan og wala kita makasabut og ngano.
Sukad sa pagdawat nato og inisyal nga mga instruksyon sa pagsimba diha sa panimalay, ang COVID-19 mikuyanap ngadto sa liboan ka mga tawo sa Sweden ug padayon nga nakaapekto sa hapit tanang nasud sa yuta. Ug samtang ganahan kaayo ko sa katalagsaon sa pagsimba diha sa panimalay kauban sa pipila ka mga minahal, nakaamgo usab ko nga dili kini sama sa pag-adto sa simbahan ug magsimba isip usa ka ward o branch. Ang pagkabayaw pinaagi sa usag usa atol sa miting sa sakramento ug sa ubang mga miting dili kahulipan.
Si Elder D. Todd Christofferson sa Korum sa Napulog Duha ka mga Apostoles mitudlo, “Usa ka dakong rason nga ang Ginoo adunay usa ka simbahan mao ang pagmugna og usa ka komunidad sa mga Santos nga mosuporta sa usag usa diha sa ‘higpit ug pig-ot nga dalan nga padulong sa kinabuhing dayon’ [2 Nephi 31:18].”1
Akong naamguhan nga ang simbahan diay mas sobra pa kay sa panagkauban sa mga higala matag semana. Mahitungod kini sa pag-ambit sa sakramento, sa pagbati nga nahisakop, pagsuporta sa usag usa, ug sa pagtukod og usa ka komunidad sa pagtuo sa gingharian sa Dios. Kanunay akong mapasalamaton sa mga panalangin nga makahimo sa pagsimba diha sa panimalay atol niini nga panahon sa COVID-19 ug sa bag-ong mga panabut nga akong nadawat mahitungod sa importansya sa panagkauban. Ang miting sa sakramento mas mabatyagan pa nga mas espesyal kon kita magkatigom pag-usab.