Man Tii Bwaai Aika a Maiu Man te Iti: Kairake n Ikawai
Teraa ae Reiakinai te Taromauri n te Mweenga iaon te Uaia ni Bootaki
E rotai te nanokawaki ngke e a katokaki te bootaki n Taromauri n te tai ae uarereke ibukin butin te aoraki. Ngkai I rangi ni karabwarabwa ibukin te bwai ae I a tia n reiakinna.
E maeka te tia korokaraki i Scania, Sweden.
Te nanako n taromauri bon teuana te bwai ae e kakawaki inanon au wiiki. I tangiria ni bootaki ma raraou ao utu ao ni katikui kangaangan te aonaaba ngkai ti uaia ni bootaki n taromauri.
Ma a bane ni bitaki bwaai ni kabane ibukin butin te aoraki aei. N te tai anne, e bon karako ae rotaki n te coronavirus i Sweden, ao te reirei e waki nako n aron teina mai mwaina, ngaia are I aki rangi ni mataata bwa bukin teraa taan kairiiri n te Ekaretia a namakinna bwa e na katoki taian bobotaki. N aron te mangaongao ni bwaai ni kabane ni kabutaa te aonaaba, E ingainga nanou ni kan kaitibo ma raraou n te Tabati. Ma I reiakinna bwa bootaki n te Ekaretia a katokaki moa n te tai ae uarereke ao ti nang karaoa ara taromauri ni mweengara. I bon nanokawaki ao n uun teutana.
Ngke e a roko te tabati, I karina kunikaiu ao I kabotonaineai, I kana au kaingabong, ao I tekateka ma au karo. I noria bwa tamau e a kaman katauraoa raoi te toa ni katoka te kunikai ae mainaina iaon te kariki ao te ran ao e tauraoi ana boki ae tabu ni iteranibaan te tataro n toa.
Ngkane e a roko tain aneneakin anenen te toa. Ngke tamau e a moana tatabeutaan te kariki, I namakina te Tamnei ae moan te korakora. E taraa n ae E tuangai bwa Ana Mwakuri ni Kamaiu Iesu Kristo e bon kaineti ibukiu. I a moana n tang, ao ngke I taraa tinau, I noria bwa e bon tang naba ma moana ae e moangare—e bon namakina naba te Tamnei.
E ngae ngke kanga I aki kakoauaa mai moana, I a ataia ngkai bwa anaakin te toa n te mweenga bon te tai ae karekea te reitaki ae tamaroa. Inanon wiiki aika a tibwa nako, I a namakina riki te kakaitau ibukin te nakoanibonga ao ibukin te euangkerio ae kaokaki, are e anganiira te mweraoi ao te rau inanon taai ni kangaanga. I namakina naba ana tangira Tamare are i Karawa ibukiia Natina. Ao I a tia n namakina te kakaitau riki ibukin te burabeti, are e buokiira bwa ti na ataa te bwai ae ti na karaoia, e ngae ngke ti aki mataata bwa bukin teraa.
Imwiin are ti karekea te kaetieti ni karaoan te taromauri n te mweenga, te COVID-19 e a butanako nakoia ngaa aomata i Sweden ao e reitinako n ewekii aba nako n te aonaaba. Ao ngkai I tangira te namakin n te reitaki man karaoan te taromauri n te mweenga ma tabeman ake a tangiraki, I a tia n ataia bwa bon tiaki aron are te nako n te tabo n taromauri ao n uaia n nebonebo bwa kaain te uoote ke te mwaanga. Karekean te unganano i bon imarenara n tain te bootaki n toa ao bobotaki riki tabeua e bon aki kona n oneaki mwiina.
Unimwaane D. Todd Christofferson man te Kooram n Abotoro n te Tengaun ma Uoman e reirei, “Oin raoi bukin ae te Uea e katea te ekaretia bon ibukin katean te botanaomata Aika Itiaki are a na boutokaiia imarenaia iaon te “kawai ae eti man irariki are e kairi ngkami nakon te maiu ae akea tokina’ [2 Nibwaai 31:18].”1
I a ataia ae te ekaretia e riaon riki ae ti karekean te uaia ni bobotaki ma raraom ni katoa wiiki. Bon ibukin anaakin te toa, karekean te namakin bwa ti kaaina, boutokaira i marenara, ao katean te botanaomata ae onimaki n abanuean te Uea. I aki toki ni kakaitau ibukin te kakabwaia ni kona ni karaoa te taromauri n te mweenga n tain te COVID-19 ao n te nonori are I karekea iaon kakawakin te uaia ni bobotaki. Te bootaki n toa e na anga te namakin ae moan te onoti ngkana ti a manga bane ni ikotaki ni botaki.