Ua Na’o Tusiga Faatekinolosi: Autalavou Matutua
O Le Mea Sa Aoaoina ai A’u e le Lotu i le Fale e Uiga i le Lolotu Faatasi
Sa ou faanoanoa ina ua taofia mo se taimi le tumau sauniga lotu a le Ekalesia ona o le faama’i oti. Ou te faafetai mo mea na ou aoaoina.
E alala le tusitala i Stockholm, Suetena.
O le alu i le lotu sa avea lava ma se tasi o faatumutumuga o lo’u vaiaso. Sa ou fiafia e mafuta faatasi ma uo ma aiga ma tuuese popolega o le lalolagi a o matou tapuai faatasi.
Ona amata ai lea ona suia mea uma ona o le faama’i oti. I le taimi lena, sa lei tele ni tagata na aafia i le koronavairasi i Suetena, ma sa faaauau pea le aoga e pei ona masani ai, o lea sa ou le malamalama ai lava pe aisea na lagona ai e taitai o le Ekalesia le manaomia ona taofi ia sauniga lotu. Faatasi ai ma le faaletonu o mea uma faavaomalo, sa ou naunau ai lava e feiloai ma au uo i le Aso Sa. Ae na ou iloa ai i lena taimi, ua taofia ia sauniga a le Ekalesia mo se taimi le tumau ae o le a matou tapuai i le fale. Sa ou faanoanoa ma sa fai sina le fiafia.
Ina ua oo mai le Aso Sa, sa fai lo’u ofu ma a’u vali, ma ou ‘ai i le taeao, ma matou saofafai faatasi ma ou matua. Sa ou vaai sa saunia ma le faaeteete e lo’u Tama le faamanatuga ma se ie paepae i luga o le falaoa ma le vai ma susue ana tusitusiga paia i tatalo o le faamanatuga.
E lei umi ae oo mai le taimi e usu ai le viiga o le faamanatuga. Ina ua amata ona tofitofi e lo’u Tama le falaoa, sa ou lagonaina le malosi o le Agaga. Sa foliga mai sa ia ta’u mai ia te au o le Togiola a Iesu Keriso na faapitoa lava mo au. Sa amata ona ou tagi, ma ina ua ou tilotilo atu i lo’u tina, sa ou vaaia ai sa tagi foi o ia ma ataata mai ia te au—sa ia lagonaina foi le Agaga.
E ui lava ina sa ou le talitonu muamua, ae ua ou iloa nei o le tagofia o le faamanatuga i le fale o se avanoa taua ma le matagofie. I vaiaso talu ai nei, sa sili atu ona ou lagonaina le agaga faafetai mo le perisitua ma mo le talalelei toefuataiina, lea ua ofoina mai ai ia i tatou le mafanafana ma le filemu i taimi o faigata. Ua ou lagonaina ai foi le alofa o le Tama Faalelagi mo i tatou uma o Ana fanau. Aemaise ai ua ou lagonaina le loto faafetai tele mo le perofeta, o le o loo fesoasoani ia i tatou ia iloa le mea e fai, e tusa lava pe tatou te le malamalama pe aisea.
Talu ona matou mauaina ia uluai faatonuga ia fai ia lotu i le fale, ua salalau le KOVITI-19 i le faitau afe o tagata i Suetena ma o loo faaauau pea ona aafia ai le toetoe lava o atunuu uma i le lalolagi. Ma ao ou fiafia i le sootaga vavalalata o le faia o lotu i le fale ma ni nai tagata e pele ia te au, ua ou iloa ai foi e le tutusa ma le alu i le lotu ma tapuai faatasi o se uarota po o se paranesi. O le faagaeetia e le tasi o le isi i le sauniga faamanatuga ma isi sauniga e lemasuia.
Sa aoao mai Elder D. Todd Christofferson o le Korama a Aposetolo e Toasefululua, “O se mafuaaga tele ua i ai se ekalesia a le Alii, o le fatuina lea o se nuu o le Au Paia o le a lagolago ai e le tasi le isi i le “ala sa’o ma le vaapiapi lea e tau atu i le ola e faavavau’ [2 Nifae 31:18].”1
Ua ou iloaina o le ekalesia, e tele atu mea e faatatau i ai nai lo le na o le faatasitasi ma uo i vaiaso taitasi. E faatatau i le tagofia o le faamanatuga, lagonaina o se lagona o le auai, lagolagoina e le tasi o le isi, ma le fausiaina o se nuu o le faatuatua i le malo o le Atua. O le a ou faafetai pea lava i le faamanuiaga o le mafai ona fai o le lotu i le fale i lenei taimi o le KOVITI-19 ma mo malamalamaaga fou ua ou maua e uiga i le taua o le feiloai po o le lolotu faatasi. O le a lagonaina atili le taua faapitoa o le sauniga faamanatuga pe a mafai ona tatou toe feiloai faatasi.