Kōjeraam̧m̧an ko Reļam Waan an Tōmak eo Edim

Ejjab to ālkin juon jepel ekōmettak, Sistert Fineone Fisi’ihoi Mork im jodikdik ro nejin rekar em̧m̧akūtļo̧k jān New Caledonia n̄an New Zealand, kōjatdikdik n̄an jino juon ijjino ekāāl.

Āinwōt juon m̧am̧a emake iaan ilo an loloorjake kapijuknen eo an ekar lukkuun pen n̄an Sister Mork, bōtaab kōrā in ekar lukkuun kōjatdikdik wōt ioon Jemād Ilan̄ n̄an jipan̄ e ilo iien in epen, ilo an jeļā bwe baam̧le eo an enaaj jeraam̧m̧an ekkar n̄an tōmak im pokake eo aer.

Lokjak eo an ikkijen jāān ekar meraļo̧k ke ļaddik eo erūtto nejin, Michael, ekar dedeļo̧k an jikuuļ im kar jino jerbal. Michael ekar bōk eddoin kōļļāik wōņeen m̧ōn jokwe eo aer; menin ekar kōm̧m̧an bwe Sister Mork en maron̄ em̧m̧anļo̧k an kakke aikuj ko an ajri ro jet nejin. Jon̄an kōrā in ekar jino kakkoņ jāān n̄an wōņāān juon em̧. Āliktata, kōrā in im ļaddik eo nejin rekar maron̄ kam̧akūt baam̧le eo aer n̄an m̧weo im̧ōer make ilo Mangere East, South Auckland.

Jet iiō ko tokālik, ekar iien an Michael etal im mijen, ekar makoko in etal kōn an ļōmņake jinen. Ekar abōb in etal im mijen kōn an inepata kōn jinen. Ewi wāween an kōrā in naaj maron̄ kōļļāik wōņāān m̧weo im̧ōer ekāāl kōn kōļļā eo an me ejjab ļap? Ekar bar juon menin inepata eļap n̄an Sister Mork, bōtaab kōrā in ekar jeļā bwe eļapļo̧k an aorōk n̄an pokake ankilaan Jemedwōj Ilan̄.

Kōrā in ekar jiron̄ ļeo nejin, “Eļan̄n̄e kopojak in etal im mijen, etal. Irooj enaaj lale kōm.”

Jet allōn̄ ko tokālik, ļōmņak in ekar bar waļo̧k ilo naan in kōjeraam̧m̧an eo kar leļo̧k n̄ane jān būreejtōn eo an Auckland New Zealand Papatoetoe Stake eo ekar kōjeņoļo̧k Michael āinwōt juon mijenede n̄an Kabun̄ eo an Jisōs Kraist im Armej ro Rekwojarjar ilo Raan Ko Āliktata. Michael ekar bōk kūr n̄an etal im jerbal ilo Cote d’Ivoire Abidjan Mijen, West Africa.

“Ealikkar ilo aō keememejļo̧k,” Sister Mork ekar ba, “Būreejtōn Moroni Westerlund ekar kōjeraam̧m̧an ļaddik eo nejū bwe en tōmak im niknik, innām ekar jiron̄ e, ‘Jab inepata kōn jinōm. Irooj enaaj lale e im kōjeram̧man e kōn aolep an aikuj.’”

Naan in kōjeraam̧m̧an eo ekar pād wōt ippān Sister Mork im ekutkut an boktok aenōm̧m̧an n̄an e ke Micheal ekar ettoļo̧k. Ekar jab juon iien epidodo. Kōrā in ekar wōr wōt ruo nejin ilo jikuul im ejabwe jāān n̄an kabwe aikuj ko aolep wiik, bōtaab Sister Mork ekar kije n̄an kautiej wōt kijejeto in jerbal in mijinede an ļaddik eo nejin ilo an pād wōt ilo an kam̧m̧oolol im niknik. Ekar kakūrm̧ool kūr ko an ilo Kabun̄ in, jerbal ilo tampeļ emakijkij jon̄an wōt an maron̄ im kōļļā juon m̧ōttan jon̄oul.

“Ilo jet wāween kōm kar maron̄ mour ilowaan kajjojo wiik.” Kōrā in ekar barāinwōt kile bwe, jekdo̧o̧n apan̄ ko aer kōn jāān, baam̧le eo an rekar m̧ōņōņō.

Innām juon allōn̄, wōņeen dān eo an Sister Mork eaar kanooj ļap. Kōrā in ekar jab meļeļe etke, bōtaab ekar kōm̧m̧an jon̄an eo emaron̄e n̄an kōļļāik wōņeen. Allōn̄ eo tok juon, wōņeen dān ekar ļapļo̧k wōt. Wōņeen dān eo ekar ļapļo̧k wōt im ejjab to kōrā in ekar likjab ilo an kōļļāik men ko jet kōn wōt an kar kajjieon̄ kōļļāik wōņeen dān eo.

Ilo raan eo Sister Mork enaaj keememeje aolep iien, ekar kōjeņoļo̧k juon m̧ōttan jon̄oul eo an im kōļļāik bill ko an wiik eo. Innām ekar lo bwe m̧ōttan wōt kar $15 taļa bwe ippān. Ekar lo̧kjenan. Elmen an naaj naajdik baam̧le eo an ilo aolepān allōn̄ eo kōn $15 wōt taļa?

Kōrā in ekar bōjrak inam̧ōj in juon m̧ōn wia pejtebōļ im ekar jar n̄an Jemed Ilan̄ m̧okta jān an deļo̧n̄. Ekar wia jejjo pejtebōļ ko me ej kam̧m̧oolol bwe rekar wōtļo̧k kaki. Ekar wōr wōt $10 taļa an bwe n̄an wia jālele ilo m̧ōn wia eo tok juon. Kōrā in ekar kappok men ko edik wōņeer im lo ruo pakij in jālele ak $5 taļa wōņeer. Ke ej jutak ilo lain eo im kōttar n̄an kōļļāiki, kōrā in ekar ļōmņake an nej kōmate m̧ōn̄ā eo im ejeļā ke enej aikuj bar kōbwebwein m̧ōn̄ā eo bōtaab enej bar aikuj joļo̧k eļapļo̧k jān jon̄an jāān eo ippān.

Rijerbal eo ekar riin̄i m̧weik ko an, ke ekar ej kōpelļo̧k waļōt eo an, Sister Mork ekar bwilōn̄. Iturin wōt $10 taļa eo an . . . juon $20 taļa ej pād ie.

Ekar kanooj tarpok jon̄an ekar jab maron̄ kadedeļo̧k an kōļļā. Ekar joļo̧k bōd n̄an rijerbal eo, ilo̧k jān m̧ōn wia eo im joļo̧k iien n̄an kajjieon̄ ļōmņak kōn $20 taļa eo. Ekar lale rijiit ko an n̄an lale n̄e ekar baj likjab in kōļļāik aolep men ko ekar aikuj kōļļāiki. Ekar bwūne juon m̧ōttan jon̄oul eo an im lo ke ejejjet im ekar bar kakoņe. Ekar etale im lale n̄e rijiit eo an jān m̧ōn wia pejtebōļ eo ekar bōd an leļo̧k an bwe. Ekar mōk itok jān an lale aolep kōmeļeļe in men ko ekar wiaki im kōļļāiki, Sister Mork ekar dān in kemejaaļaļ. Ilo būruōn, ekar jeļā bwe menin ekar juon kabwūlōn̄lōn̄.

Ke ej tōpar m̧weo im̧ōn, ekar jiron̄ ajri ro nejin kōn men eo ekar waļo̧k. Ekar lukkuun obrak kōn m̧ōņōņō im dānin kōmjaļaaļ, ekar kwaļo̧k an kam̧ool n̄an er kōn kajoor in tōmak ilo Anij, iakwe eo An n̄an kōj im kōn kōjeraam̧m̧an ko me rej itok jān pokake kien ko an Anij im kōjpārok bujen ko ad Ippān.

Baam̧le eo ekar bukwelōlō im kam̧m̧oolol Jemed Ilan̄ kōn An lale er—āinwōt an stake būreejtōn eo aer kar kalim̧m̧ur ke E enaaj lale er.

Ejja wiik eo wōt, juon m̧ōttaer jān Kabun̄ in ekar lo unin an ļapļo̧k wōņeen dān eo an: juon baib ium̧win m̧weo im̧wer ekar ettal. In m̧ōttaer—ekar juon eo ewōr an pejnej in kōm̧m̧ani m̧ōko—kar kōm̧m̧ane ettal eo, innām ekar makoko in bōk wōņeen jān jerbal in ekar kōm̧m̧ane.

Wōņeen dān eo ekar bar ro̧o̧l n̄an wōņeen eo edik me eminene kake, Sister Mork ekar kiiō bwe jāān ko ippān, im aolepān allōn̄ ko jet ekar jab bar inepata m̧ae iien eo Michael ekar ro̧o̧l tok jān mijen eo an.