“Ibenyin wɔ Nyikyerɛ Fapem no mu,” Liahona, Sanda 2021
Bosoom Bosoom Liahona Amandzɛɛbɔ, Sanda 2021
Ibenyin wɔ Nyikyerɛ Fapem no mu
Mehyɛ hom nkuran dɛ hom ndua akwan a ɔsɛ fata do mfa ntsie Ewuradze yie na hom ntaa nyɛ ama hom eetum agye adwenmutsewee no a Ɔpɛ dɛ Ɔdze ma hom no.
Mfonyin no fi Getty Images hɔ.
Fankwa da 30, afe 2017, wiadze mfɛndzanan ehyiadzi n’ewiaber nhyiamu ekyir no, migyinaa asopitsi kɔhwɛɛ mo quorum kuwba dɔfo Elder Robert D. Hales. Nna wɔagye no ato asopitsi hɔ ɔnam akoma yarba a ɔkyee no nda kakra ara mu no.
Hɛn nsera nkɔmbɔdzi no yɛɛ ahomkã, a nna ɔyɛ dɛ ma ɔretse apɔw. Nna ɔno ara mpo tum gye ahom a, ɔyɛ sɛnkyerɛdze pa.
Naaso, ewimbir no, Sunsum no kasaa kyerɛ m’akoma na m’adwen dɛ ɔsɛ dɛ mesan kɔ asopitsi hɔ Kwesida. Wiadze mfɛndzanan ehyiadzi no Kwesida anapa nhyiamu ber no, menyaa nkenyan dzendzen dɛ mensan nkɔ. Metsee nkã dɛ ɔsɛ dɛ megya ewiaber edzidzi ekyir na meyɛ ntsɛm kɔ Elder Hales hɔ wɔ ne mpa nkyɛn sɛ anapa nhyiamu no ba ewiei ara a, a meyɛe.
Ber a mukodurii no, mutumii hun dɛ Elder Hales ne yarba no mu ayɛ dzen ara yie. Awerɛhow mu ara, mukodurii no mber simabaa 10 ekyir ara na otwaa mu kɔree, naaso ndaase mu ara nna menye no hokãfo fɛɛfɛw, Mary, nye hɔn mbabanyin beenu wɔ ne nkyɛn ber a ofii wiadze yi mu no.
Ɔyɛ me enyisɔ ara yie dɛ metsie Sunsum Krɔnkrɔn no ɔasa a okenyan me ma meyɛɛ biribi a nnkyɛ merennyɛ. Na mbrɛ osi yɛ me enyisɔ ara yie dɛ nyikyerɛ wɔ hɔ ampara na ɔsorsor ebue bio.
Afe yi hɛn ankorankor na adzesũa dan mu adzesũa betsim Nkyerɛkyerɛ na Ahyɛmudzi do. “Nyikyerɛ a ofir Nyame na nkenya dawurbɔ” yinom botum ehyira hɔn a wosũa na wɔdze ɔsor ahyɛdze horow no dzi dwuma. Wɔto nsa frɛ “nkorɔfo a wɔwɔ beebiara dɛ wontsie Ewuradze Jesus Christ ne ndze,”1 na nokwar ara “Ewuradze ne ndze wɔ hɔ ma adasa nyinara” (Nkyerɛkyerɛ na Ahyɛmudzi 1:2).
Esian, Sum, na Ndaadaa
Honandua mu na sunsum mu ehum akɛse kã asaase yi do abrabɔ ho, tse dɛ ma COVID-19 akaa hɛn no. Mber no a odzi Ne Mbae a Otsĩa ebien ne kan no, Agyenkwa no hyɛɛ ho nkɔm dɛ ɔbɛyɛ ahohiahia nda kɛse. Ɔsee dɛ, “Ɔkɔm nye atsetsee, nye asaase wosow bɛba mbeambea” (Joseph Smith—Matthew 1:29).
Dza ɔma dɛm ahohiahia no yɛ kɛse nye sum na ndaadaa a wɔatahye abɔ hɛn ho aporɔw no. Tse dɛ ma Jesus kãa kyerɛɛ N’esuafo no, “emumuyɛ bɔdɔɔ sõ” ansaana Ɔasan aba (Joseph Smith—Matthew 1:30).
Satan aboa n’akõdɔm ano na woregyam tsia Ewuradze n’edwuma nye hɛn a yɛreyɛ no. Osiandɛ esian a yerehyia no rodɔɔ sõ no ntsi, hia a yɛdze hia ɔsor kwankyerɛ no ayɛ kɛse akyɛn ber biara, na hɛn mbɔdzembɔ dɛ yebetsie Jesus Christ—hɛn Dzimafo, Agyenkwa, na Pomfo— ne ndze no ehia akyɛn ber biara.
Dɛ mbrɛ wɔfrɛɛ me Asɔr no ne President no ara no mekãa no, Ewuradze ayɛ krado dɛ ɔbɛda N’adwen edzi akyerɛ hɛn. Ɔno nye Ne nhyira horow mu kɛse kor a Ɔdze ma hɛn.2
Hɛn nda yi mu no, Ɔabɔ anohoba dɛ, “Sɛ hom bisa a, hom benya nyikyerɛ mu nyikyerɛ, nyimdzee mu nyimdzee” (Nkyerɛkyerɛ na Ahyɛmudzi 42:61).
Minyim dɛ Obobua hɛn ntotɔserɛ horow no.
Mbrɛ Yesi Tsie No
Yeruhu mbrɛ Sunsum no osi kasa ndɛ no hia tsitsir. Ama yeenya ankorankor nyikyerɛ, enya nsɛmbisa ho mbuae, na yenya bambɔ na akwankyerɛ no, yɛkaa nhwɛdo a Nkɔnhyɛnyi Joseph Smith ayɛ ama hɛn.
Odzi Kan, yɛdze hɛn ho hyɛ kyerɛwsɛm no mu. Yɛreyɛ dɛm no bue hɛn adwen na hɛn akoma mu ma Agyenkwa no ne nkyerɛkyerɛ na nokwar. Christ ne nsɛm no “bɛkã ndzɛmba nyinara a ɔsɛ dɛ [yɛ]yɛ akyerɛ [hɛn]” (2 Nephi 32:3), nkankara nda begyabegya yinom mu a yennyim dza ɔreba no.
Dza odzi do no yɛbɔ mpaa. Mpaabɔ hia ahokekã, ntsi yɛbrɛ hɛnho adze wɔ Nyankopɔn enyim, yɛhwehwɛ bea komm bi a yebotum ataa akɔ, na yeehue hɛn akoma mu ama No.
Ewuradze ase dɛ, “Hom ntwe mbɛn me na mobɔtwe abɛn hom; hom nhwehwɛ me enyiberdo na hom bohu me; hom mbisa na hom nsa bɛkã; hom mbɔ mu, na wobobue ama hom; (Nkyerɛkyerɛ na Ahyɛmudzi 88:63).
Yɛrotwe bɛn Ewuradze no dze awerɛkyekyer na nkuranhyɛ, enyidado na ayarsã brɛ hɛn. Ntsi, yɛbɔ mpaa wɔ Ne dzin mu kã hɛn haw na mberɛwyɛ horow, hɛn ahwehwɛdze na hɛn adɔfo, hɛn ɔfrɛ na nsɛmbisa horow ho nsɛm kyerɛ No.
Na nkyii yetsie.
Sɛ nkyɛ yeewie hɛn mpaabɔ no yɛbɔtweɔn kakra wɔ hɛn nkotodwe enyim a, adwendwen, atsenkã, na kwankyerɛ bɛba hɛn adwen mu. Yɛrekyerɛw dɛm adwen no a ɔba no bɔboa hɛn ma yɛakaa ndzeyɛɛ a Ewuradze pɛ dɛ yɛyɛ.
Sɛ yesi do yɛ nyɛbew yi a, wɔ Nkɔnhyɛnyi Joseph Smith ne nsɛm mu no, “yebenyin wɔ nyikyerɛ fapem no mu.”3
Efata dɛ Enya Nyikyerɛ
Yerutu hɛn tum a yɛdze tse Sunsum Krɔnkrɔn n’awɔse na mbrɛ yetum nya nyikyerɛ no mpon no, hia dɛ yɛfata. Yennhia emudziyɛ ana yɛafata, mbom ohia dɛ yɛbɔ mbɔdzen nya ahotsew ara yie.
Ewuradze n’enyi da hɛn daa daa mbɔdzembɔ, daa daa mpontu, daa daa nnuho do. Yɛrefata no dze ahotsew ba, na ahotsew gya hɛn kɔ Sunsum Krɔnkrɔn ne nkyɛn. Sɛ yɛfa “Sunsum Krɔnkrɔn no dze yɛ hɛn kwankyerɛfo” (Nkyerɛkyerɛ na Ahyɛmudzi 45:57) a, yɛfata dɛ yenya ankorankor nyikyerɛ.
Sɛ biribi repem hɛn adze ma yennkobue abobow no akyerɛ ɔsor kwan a, bia yebehia nnuhu. Nnuhu ma hɛn kwan ma yebue abow no ama yeetum aataa aatse Ewuradze ne ndze pefee.
Elder David A. Bednar a, ɔkã Duebien no hɔn Quorum ho no kyerɛkyerɛɛ dɛ, “Gyinapɛn no yɛ pefee. Sɛ biribi a yɛrodwen ho, rohwɛ, retsie, anaa yɛreyɛ ma yɛnye Sunsum Krɔnkrɔn no ntamu twe a, nna ɔsɛ dɛ yegyaa dɛ yɛrodwen, yɛrohwɛ, yɛretsie, anaa yɛreyɛ dɛm adze no. Mfatoho, sɛ dza ɔsɛ dɛ ɔdze enyigye brɛ hɛn no, twe hɛn fi Sunsum Krɔnkrɔn no ho a, nna nokwar ara dɛm enyikadze no nnyɛ mma hɛn. Osiandɛ Sunsum no nnkotum atsena dza ɔyɛ efĩfĩdze, ho nntsew, anaa ehuhudze no, ntsi ndzɛmba a ɔtsetse dɛm no nnsɛ mfata hɛn.”4
Sɛ yɛdze ahotsew ara yie kã setsie na akɔnkye ho, yɛrohwehwɛ enyiber do, kyerɛwsɛm adzesũa na nkɔnhyɛfo atseasefo hɔn nsɛm, nye temple na ebusua abakɔsɛm ho edwumayɛ a, ɔsorsor bobue. Ewuradze, wɔ N’afã no, bɛhyɛ N’anohoba no mã dɛ: “Medze mo Sunsum ne kyɛfa bɛma wo, dza obobue w’adwen mu” (Nkyerɛkyerɛ na Ahyɛmudzi 11:13).
Bia hom behia abotar, naaso Nyankopɔn nye hɛn bɛkasa wɔ Nankasa No kwan do na Ne mber pa mu.
Sunsum mu Ntseasee
Job kãa dɛ, “Mbom sunsum bi wɔ nyimpa mu, na Otumfo no no honhom na ɔma ntseasee” (Job 32:8). Afe fofor yi mu no, mehyɛ hom nkuran dɛ hom ndua akwan a ɔsɛ fata do mfa ntsie Ewuradze yie na hom ntaa nyɛ ama hom eetum agye adwenmutsewee no a Ɔpɛ dɛ Ɔdze ma hom no.
Ansaana Elder Hales rutwa mu akɔ dɛm Ɔbɛsɛ da no wɔ afe 2017 mu no, ɔyɛɛ asɛnkã tsiabaa a ɔbɛkã no wɔ wiadze mfɛndzanan ehyiadzi no ho ahosiesie a, oenntum ama. Dɛm asɛnkã mu no, ɔkyerɛɛw dɛ, “Hɛn gyedzi siesie hɛn ma yɛakɔ Ewuradze N’enyim.”5
Sɛ yenya nyikyerɛ a, yɛhwer mber wɔ Nyankopɔn N’enyim ber a Ɔda N’adwen, Ne pɛ na Ne ndze edzi kyerɛ hɛn (hwɛ Nkyerɛkyerɛ na Ahyɛmudzi 68:4). Yɛmfa hɛn gyedzi ndzi dwuma, mfrɛ No a, yɛrobɔ bra a ɔfata Ne nkenyan anohoba no, na yeridzi kwankyerɛ no a yenya no do.
© 2020 by Intellectual Reserve, Inc. All rights reserved. Wotsintsimii wɔ USA. Ngyiresi Borɔfo kasa ngye ntomu: 6/19. Nkyerɛasee ngye ntomu: 6/19. Monthly Liahona Message, January 2021 ne nkyerɛasee.Fante. 17463 502