I Nidim wan Boe blong Sevem wan Vilej

Ova long 100 yia i pas, long ol aelan blong Samoa blong Pasifik Osen, wan yang man we nem blong hem Tom Fanene i bin wan impoten help long wan laef–mo–ded situesen blong ol memba blong Jos Ia blong Jisas Kraes blong ol Lata-dei Sent.

Tom i stap long wan vilej we oli singaotem Sauniatu, we ol Lata‑dei Sent long eria ia oli bin stanemap olsem wan ples blong olgeta blong kam tugeta mo mekem wan komuniti. Semmak olsem ol Sent blong God long ol nara taem mo ples, oli bin eksperiensem ol hadtaem mo ol merikel tu, taem oli bin stap wok blong bildim kingdom blong God tugeta. Wan hadtaem i kam long 1918, taem wan wol sik blong flu i kasem vilej.

I no longtaem afta we sik i kam, i bin nogud tumas, mo sik i go olbaot kwiktaem. Kolosap evri wan long kolosap 400 man blong vilej oli sik mo silip nomo long bed from sik ia. I gat sam long olgeta nomo oli bin oraet inaf blong stanap mo mekem ol samting: wan olfala man mo Tom we i gat 12 yia.

Famli blong Tom oli bin eksasaesem fet taem oli bin gotru sik bifo, mo oli bin luk ol merikel olsem ansa. Yangfala brata blong Tom, Ailama i bin sik sam yia bifo. Papa blong tufala, Elisala, i bin drim long wan drim we, insaed long hem, oli bin givim ol spesifik daereksen long wanem blong mekem blong lukaotem gud Ailama: faenem wan wili‑wili tri, karemaot sam skin blong hem mo kil kilimaot jus blong hem. Elisala i bin mekem hemia mo karem jus i go long Ailama, we i bin dring mo i no longtaem afta, hem i harem gud. So Tom i bin luk olsem wanem taem yu tekem aksen wetem fet i save help blong winim sik.

Long taem blong wol sik blong flu long 1918, Tom i bin eksasaesem fet taem hem i wok had blong tekem kea long ol pipol blong vilej. “Evri moning mi go long wan haos afta nara haos, blong fidim mo klinim ol pipol mo faenemaot huia i bin ded,” hem i talem.

Hem i kasem ol baket wota long wan spring wota mo karem wota i go long evri haos. Hem i klaem long kokonas, stikimaot kokonas, klinim olgeta, mo openem olgeta blong karem jus blong blong hem i go long ol sik man. Hem i kilim tu, evri faol blong vilej blong mekem sup blong wanwan famli.

Long taem blong bigfala sik ia, kolosap wan aot long fo pipol long Samoa oli bin ded from sik blong flu ia. Sam long ol pipol long vilej blong Tom oli bin ded tu. Tom i bin help blong digim ol gref mo berem moa bitim 20 long olgeta, we i tekem tu papa blong hem, Elisala.

Be tangkyu long hadwok blong Tom mo kea blong hem wetem lav, we i mekem plante pipol long vilej blong hem oli bin laef. Hem i mekem wan bigfala samting we i defren long olgeta pipol ia mo blong bildim kingdom blong Lod long Samoa. Hem i “stap putum fandesen blong wan bigfala wok.”

Mo long wei blong yuwan, yu tu yu stap mekem semmak.

Ating bae oli no singaotem yu blong mekem ol kaen samting we Tom i bin mekem, be yu stap eksasaesem fet long plante nara wei we bae i mekem bigfala samting i defren long yu, mo ol narawan, mo long wok ia blong bildim kingdom blong God.

Yu stap soem wan eksampol long famli blong yu, ol fren, mo ol narawan taem yu soem klin fasin, longfala tingting, kaen fasin, mo lav. Yu stap givim seves long ol narawan. Yu stap tekpat long skripja stadi mo prea. Yu stap serem ol trutok blong gospel blong Jisas Kraes we i kambak long wol.

Long ol yia we i pas, plante long yufala, i bin stap mekem ol samting ia taem yufala i stap go tru ol hadtaem blong wol sik ia. Ating yu no bin karem wota mo kokonas mo lukaotem 400 pipol oli kam oraet, be yu bin karem kamfot, hop, glad, mo pis i kam long ol pipol long plante nara wei.

Yia blong yu i no impoten bitim fet blong yu mo tingting blong yu blong wantem wok mo givim seves long ol narawan. Ol eksampol blong bifo, olsem Tom Fanene, i save helpem yu blong luk se oli nidim yu blong stanemap fandesen blong bigfala wok blong God.