Erohwehwɛ Ahoɔdzen dze Bɔn Akyɛ

Christiannyi mapã bi a ofi Netherlands a wɔfrɛ no Corrie ten Boom nankasa nyaa tum a wɔdze serɛ Nyankopɔn dɛ Ɔmboa no ma ɔmfa obi no bɔn nkyɛ no ho dase.

Wɔdze ɔno na n’akyerɛbaa too dadua mu wɔ mboano daduafie wɔ Amansuon Ɔsatu II ber no mu. Corrie na binom bi tumii sɔɔw akotorka a Nazi daduafie hwɛdofo no dze hɔn faa mu no. Ɔnam akotorka no ntsi n’akyerɛbaa Betsy mpo wui. Corrie nyaa nkwa.

Ɔko no ekyir no, Corrie hun ahosan tum bi a edze obi no mfom kyɛ no a inya. Nna ɔtaa kyɛ n’asɛm yi wɔ bagua mu. Naaso da kor dze wɔtoo ne nsɛm no taferbanyinmbɔmu kɛsenara.

Bagua mu kasa kor bi ekyir no, efiadze ahwɛdofo no mu kor a nna hɔn tsir mu yɛ dzen papaapa no pinkyɛɛn no.

Ɔkaa kyerɛɛ Corrie dɛ ɔkõ n’ekyir no ɔabɛyɛ Christiannyi a ɔasakyer efi no bɔn ber a nna ɔyɛ daduafie hwɛdofo no nyinara ho.

Ɔtseen ne nsa na ɔkãa dɛ, “Edze mo bɔn bɛkyɛ me anaa?”

Dza Corrie esua na ɔnye nkorɔfo akyɛ afa fakyɛ ho nyinara no oenntum anntsen ne nsa ammfa annkyɛ papa yi—oemmfi noara ne pɛ mu.

Ekyir yi ɔkyerɛɛw dɛ, “Ebufuw no mu no, bɔn no ho awerdzi hyɛɛ m’adwen mu mã, muhun hɔn bɔn no. … Mobɔɔ mpaa dɛ, Ewuradze Jesus, fa mo bɔn kyɛ me, na boa me ma memfa no bɔn nkyɛ no.

“Mepeer dɛ mebɛyerɛw m’ano, (na) meperee dɛ mebɛma me tsir do. Menntum. Mennya atsenkã biara, mennya mbɔbɔrhu anaa ayamuyie ketseketse mpo. Na mesanee bɔɔ mpaa kommyɛ mu. Jesus, murunntum mmfa nnkyɛ no. Ma me Wo bɔnfakyɛ no.

“Metseen me nsa suoo ne nsamu no, dza ɔyɛ nwanwa kɛse sii. Fitsi m’abatsir dze fa m’abasa na oduaa me nsa mu no ɔyɛ dɛ ahom bi fii mo mu wuraa no mu, ber a m’akoma mu ɔdɔ huee maa ɔhɔho yi ma nkyɛ ɔreyɛ abor mo do.

“Na ntsi muhun so dɛ nnyɛ hɛn bɔnfakyɛ anaa hɛn papayɛ do na wiadze ayarsã tsim do, mbom wɔ Nedze no do. Sɛ Ɔkã kyerɛ hɛn dɛ yɛndodɔ hɛn atamfo a, ɔma hɛn ɔdɔ noara kã ahyɛdze no ho.”¹

Onyankopɔn wɔ hɔ dɛ ɔbɔboa wo ma edzi Ne mbrasɛm do, a mbrasɛm a ɔfa bɔnfakyɛ ho kã ho—mpo sɛ ɔyɛ dzen a. Obotum aboa wo dɛ mbrɛ Ɔboaa Corrie ten Boom no.

Abrabɔ yɛ mbirenyi. Ɔyɛ basabasa. Na nkorɔfo a Nyame-dze hɔn pɛ ahyɛ hɔn nsa ahyɛ mu mã.

Dɛm ber no, sɛ obi si gyinae wɔ biribi ho a ɔhaw wo papaapa a—anaa mpo sɛ ɔannhyɛ da yɛ biribi tsia wo a—ibotum enya ayarsa tum ber a ibɔ mpaa dze hwehwɛ mboa na ibɔ mbɔdzen dɛ edze bɔn kyɛ.

Edze nkaafo hɔn bɔn kyɛ hɔn a wo kra nya ahosan. Sɛ Nyankopɔn boa wo ma edze obi no bɔn kyɛ no a, esoɛ adzesoadze duduudur a osi w’abatsir do a nna nkyɛ ɔtwe wo ekyir. Sɛ kwan a wodua do nya ahosan mapã no yɛ dzen mpo a, Nyame ntsi, wonko rennantsew da.