Nyankopɔn N’Asɔfodzi no

Kasafua kor a yɛdze dzi dwuma wɔ nkyerɛase akwan ebien do wɔ Asɔr yi mu nye asɔfodzi. Kasafua no gyina hɔ ma Nyankopɔn no tum na tumdzi ne nyina. Naaso, wɔ kwan kuma bi mu no, yɛdze asɔfodzi—so kyerɛ “tum na tumdzi a Nyankopɔn dze ma hɔn a wɔahyɛ hɔn asɔfo a wokitsa asɔfodzi a wɔdze dzi dwuma wɔ ndzɛmba nyina ho a, ohia ma Nyankopɔn ne mba hɔn nkwagye.”¹

Asɔfodzi no a wɔdze hyɛ nyimpa sɔfo no nnyɛ Nyankopɔn no tum ne nyinara. Nkyerɛmu-mfonyin a odzi do yi kyerɛ asɛm yi mu.

Nkyerɛmu-mfonyin yi mu no, ihu Nyankopɔn no tum ho mfatoho, a onnyi ewiei na onnyi hẽ. No mu no, esan so hu mfatoho binom a ɔfa Nyankopɔn no tum na tumdzi ho a Ɔdze hyɛ mbanyin a wodzi mu asɔfo dɛ wɔmfa ndzi dwuma wɔ Christ N’Asɔr mu.

Asɔfodzi no mu nhyira horow nyina wɔ hɔ ma Egya a Ɔwɔ Sor ne mbabaa na mbabanyin adɔfo nyina. Dza wɔakyerɛw no nkorkor a ɔtɔ do ebien no kyerɛ nhyira a ɔba wo hɔ a odua nyia okitsa asɔfodzi nsaafee anaa wɔdze asɔfodzi no tum ahyɛ no sɔfo no do.

Iyi nye nhyehyɛɛ a Nyankopɔn akyekyer ama N’Asɔr ne nhyehyɛɛ na nhwɛdo wɔ asaase yi do. Nyankopɔn N’asɔfodzi tumdzi ho mfatoho binom so nye deaconfo anaa akyerɛkyerɛfo hɔn kuw president a ɔwɔ nsaafee dze kyerɛ kwan wɔ no quorum dwumadzi mu, egya ne nhyira a ɔma no wɔ fie, na temple ayɛdze na ahyɛmudzi horow.

Asɔfodzi dzibew ne nhyɛɛ no wɔdze hyɛ mbanyin nkõ asɔfo dze, naaso President Dallin H. Oaks, Ɔpamfo a Odzi Kan wɔ President a Odzi Kan na n’Apamfo mu, akyerɛkyerɛ fapem bi a ohia ase: “Asɔfodzi no yɛ ɔsor tum na tumdzi a yekitsa dɛ yɛdze bɛyɛ Nyame N’edwuma ama Ne mba nyina enya ho mfaso. Asɔfodzi nnyɛ hɔn a wɔahyɛ hɔn asɔfo akɔ asɔfodzi dzibew bi mu anaa hɔn a wɔdze no tumdzi no dzi dwuma no. Mbanyin a wokitsa asɔfodzi no nnyɛ asɔfodzi no. … Ɔnnsɛ dɛ yɛfrɛ hɔn a wɔahyɛ hɔn asɔfo no asɔfodzi no.”²

Wɔnnhyɛ mbaa asɔfodzi dze, naaso President Russell M. Nelson kyerɛkyerɛɛ mu dɛ, “sɛ woyi wo si hɔ dɛ som wɔ ɔfrɛ biara mu wɔ nyia okitsa asɔfodzi nsaafee no kwankyerɛ ase—tse dɛ wo bishop anaa stake president a—wɔma wo asɔfodzi tumdzi dɛ fadzi dwuma wɔ dɛm ɔfrɛ no mu.”³ Iyi ne mfatoho binom nye Young Women adzesũakuw presidencyfo, asɛmpasomafo nkyerɛbaa a wɔrekyerɛkyerɛ asɛmpa no, baanodzifo wɔ ward na stake ahorow mu a woeyi hɔn esi hɔ dɛ wɔnkyerɛkyerɛ na wondzi baano, na ayɛdze edwumayɛfo wɔ temple.

Nhyira a hom young men na young women nya no yɛ hom dze osian ahyɛmudzi a hom yɛ no wɔ enuma ber mu nna ahyɛmudzi a hom bɛyɛ no wɔ temple. Mpo sɛ nnyi obiara a okitsa asɔfodzi wɔ wo fie a, ibotum enya Nyankopɔn N’asɔfodzi tum ne nhyira wɔ w’abrabɔ mu ber a isie ahyɛmudzi a enye No ayɛ no (hwɛ 1 Nephi 14:14).

Ber a yɛbɔ bra dɛ mbrɛ hɛn ahyɛmudzi tse no, yenya nhyira a ɔhyɛ hɛn dzen na ohyira hɛn. Yɛto nsa frɛ wo dɛ dwendwen asɔfodzi ne nhyira wɔ w’abrabɔ mu no ho—nhyira a ɔba a ɔnam Nyankopɔn N’asɔfodzi tum no a onnyi ewiei na dza ɔba a ɔnam asɔfodzi tumdzi a wɔdze ahyɛ binom asɔfo na wɔma hɔn asodzi ho kwan wɔ Nyankopɔn N’Asɔr mu pɔkyee do.