Na Matabete ni Kalou

E dua na tikinivosa eda vakayagataka ena Lotu ena rua na sala sai koya na matabete. Na vosa oqo e vakaibalebaletaki ki na kaukauwa kei na lewa taucoko ni Kalou. Ia, eda vakayagataka talega na matabete ena dua na sala yalani cake—meda raica “na kaukauwa kei na lewa sa solia na Kalou vei ira na lewe ni matabete mera cakacaka ena veika kecega e gadrevi mera vakabulai kina na luve ni Kalou.”¹

Na matabete e soli vua na tamata e sega ni kaukauwa taucoko ni Kalou. Na ivolakabi tarava e vakaraitaka na tikina oqo.

Ena ivolakabi oqo o na raica kina eso na ivakaraitaki ni kaukauwa ni Kalou, ka sa tawayalani ka sega na kena iyalayala. Iloma, o na raica talega kina na ivakaraitaki ni kaukauwa kei na lewa ni matabete ni Kalou ka vakatikora, se solia o Koya vei ira, na tagane bula kilikili mera vakaitavi ena Lotu i Karisito.

Na veivakalougatataki kece sara ni matabete sa vakarautaki tu vei ira kece na luvena yalewa kei na tagane daulomani na Tamada Vakalomalagi. Na ikarua ni lisi e matataka na veivakalougatataki e yaco mai vei iko mai vua e dua e taura tu na idola ni matabete se sa vakatikori vua na lewa ni matabete.

Oqo na ituvatuva sa tauyavutaka na Kalou me baleta na isoqosoqo kei na qaravi ni Nona Lotu e vuravura. Eso tale na ivakaraitaki ni lewa ni matabete ni Kalou e oka kina e dua na peresitedi ni kuoramu ni dikoni se ivakavuvuli ka tu vua na idola me dusimaka na cakacaka ni nona kuoramu, na veivakalougatataki nei tama e soli ena dua na vuvale, kei na cakacaka vakalotu kei na veiyalayalati ni valetabu.

E dina ga ni veitabaki ki na itutu ni matabete e soli duadua ga vei ira na turaga, e vakamacalataka kina o Peresitedi Dallin H. Oaks, na iMatai ni Daunivakasala ena Mataveiliutaki Taumada e dua na ivakavuvuli bibi: “Na matabete sa dua na kaukauwa kei na lewa vakalou ka tauri tu ena veivakabauti me vakayagataki ena cakacaka ni Kalou me yaga vei ira kece na Luvena. Na Matabete e sega ni o ira era sa tabaki ki na dua na itutu ni matabete se o ira era vakayagataka na kena lewa. O ira na turaga era taura tu na matabete era sega ni matabete. … Me da kakua ni vakatokai ira na tagane tabaki me ra matabete.”²

E dina ni ra sega ni tabaki ki na matabete na marama, a vakamacalataka o Peresitedi Russell M. Nelson, “ni o sa vakatikori mo veiqaravi ena dua na veikacivi ena ruku ni nona veidusimaki e dua e tu vua na idola ni matabete … sa soli vei iko na lewa ni matabete mo cakacaka ena veikacivi o ya.”³ Eso na ivakaraitaki ni ka oqo e oka kina na mataveiliutaki ni kalasi ni Goneyalewa, o ira na marama daukaulotu era vunautaka tiko na kosipeli, iliuliu ena tabanalevu kei na iteki era sa vakatikori me ra veivakavulici ka veiliutaki, kei ira na liganicakacaka vakalotu ena valetabu.

Na veivakalougatataki o ni ciqoma na cauravou kei na goneyalewa sa nomuni ena veiyalayalati o ni vakayacora ena papitaiso kei na veiyalayalati o ni na cakava ena valetabu. Kevaka madaga e sega na matabete e tiko e nomu vale, e rawa ni o vakalougatataki tikoga ena kaukauwa ni matabete ni Kalou ena nomu bula ni o rokova na veiyalayalati o sa cakava vata kei Koya (raica na 1 Nifai 14:14).

Ni da sa bulataka tiko na noda veiyalayalati, eda na ciqoma na veivakalougatataki ka na vaqaqacotaki keda ka vakalougatataki keda. Keitou sa sureti kemuni mo ni vakasamataka vakatitobu na veivakalougatataki ni matabete ena nomuni bula—na veivakalougatataki e yaco mai ena vuku ni kaukauwa ni matabete tawayalani ni Kalou kei ira era lako vakatabakidua mai na lewa ni matabete e soli ka lesi ena Lotu ni Kalou.