“Te Nakoanibonga bon Mwaakan te Atua,” Riaona, Aokati 2021
Rongorongo man te Riaona ni katoa Namwakaina, Aokati 2021
Te Nakoanibonga Bon Mwaakan te Atua
E kakabwaiaira te Atua rinanon mwaakan te nakoanibonga. Kakabwaian te nakoanibonga a tauraoi nakoira ni kabane.
Te nakoanibonga bon mwaakan te Atua. E kamanena te mwaaka ni kakabwaiaia ni kabane Natina ao ni buokiia n oki ni maeka ma Ngaia. Te Atua e anga mwaakan te nakoanibonga nakoia Natina i aonnaba. N te mwaaka aio, taan kairiri n te nakoanibonga a kona ni kaira te Ekaretia ao taan taua te nakoanibonga a kona ni karaoi otenanti aika tabu, n aron te bwabetito are buokira ni kaniira nakon te Atua. Te mwane ao te aine nako are e kakaonimaki ni karekei otenanti n te nakoanibonga ao ni kawakin (berita aika tabu) e na uki kawaina nakon mwaakan te Atua.
Mwaakan te Nakoanibonga e anganaki Iotebwa Timiti
Ngke e mena Iesu iaon te aba, E kaira Ana Ekaretia ni mwaakan te nakoanibonga. E anganiia naba te mwaaka aio nakoia Ana Abotoro. N tienture aika bati imwiin matena, e mwaiti kaain te aro aika bwaka man te Ekaretia. A bita te euangkerio n te aro ae aki eti ao aron mwakurin te Ekaretia. Ana Nakoanibonga te Atua akea n te tai anne i aonnaba. Inanon 1829 Iesu E kanakoa Ioane te tia Bwabetito ao te Abotoro are Betero, Iakobo, ao Ioane n angan IotebwaTimiti te nakoanibonga. Ana Ekaretia Iesu Kristo ibukiia Aika Itiaki ni Boong aika Kaitira bon tii ngaia te rabwata i aon te aba ma te kariaiakaki aei mai iroun te Atua.
Kiingin te Nakoanibonga
Kiing n te Nakoanibonga bon te kariaia ni kaira kabonganan te nakoanibonga, n aron te anga te kariaia ni karaoi otenanti. Iesu Kristo e taui ni kabane kiingin te Nakoanibonga. Te Beretitenti n te Ekaretia bon tii ngaia te aomata n te aonnaba are kona ni kamanena kingin te nakoanibonga ni kaira te Ekaretia. I aan ana kairiri, tabeman a kona ni kamanenai king aika onoti ni karaoa ana mwakuri te Atua. Taan kairiiri n aroia bitiobi ao titeiki beretitenti a kamanenai taian king ni kairiiri inanon aia uoote ao titeiki. Ibukina bwa te wewete nakon te mwakuri e roko mairouia taan kairiri are iai irouia kingin te nakoanibonga, mwaane ao aine ake a mwakuri ni weteakiia a kamwakura te kariaia n te nakoanibonga ngkana a karaoa tabeia.
Te Nakoanibonga ae te Merekitereka ao te Nakoanibonga ae te Aaron
Te nakoanibonga iai uoua mwakorona: Te Nakoanibonga ae te Merekitereka ao te Nakoanibonga ae te Aaron. Rinanon te Nakoanibonga ae te Merekitereke, taan kairiiri n te Ekaretia a kairi mwakuri n tamnei n te Ekaretia, n aron mwakuri ni mitinare ao tembora. Te Nakoanibonga ae te Aaron e mwakuri iaan te kariaia man te Nakoanibonga ae te Merekitereka. E kamanenaaki ni karaoi otenanti n aekan te bwabetito ao te toa.
Kakabwaia n te Nakoanibonga
Rinanon berita aika tabu ao otenanti, te Atua e karaoi kakabwaia n te nakoanibonga bwa a na tauraoi nakoia Natina ni kabane. Kakabwaia aikai n raonaki ma te bwabetito, ana bwaintangira te Tamnei are Raoiroi, te toa, ao otenanti n te tembora. Mwaane ao aine aika a entaute n te tembora a karekea te bwaintangira are mwaakan ana nakoanibongate Atua rinanon aia berita. Ti kona naba ni karekei kakabwaia ni katoki aoraki, karaunano, ao ni kairi.
Tera Ae E Taekinna Booki aika Tabu Ibukin te Nakoanibonga?
Te nakoanibonga are iai ni boong ake ngkoa bon tiitebo ma are iai ngkai (taraa Moote 6:7).
Kingin Nakoanibonga a ibuobuoki ni kakoaua bwa ti kabobonga ana mwakuri te Uea n aron te kawai ae riai (taraa Reirei ao Berita aika Tabu 42:11).
Mwaane ake a taua te nakoanibonga a kona ni kamanena “tii iaon tuan te raoiroi” (Reirei ao Berita aika Tabu 121:36).
Tabeua mwakuri irouia ake a taua te nakoanibonga a taekinaki inanon Reirei ao Berita aika Tabu 20:38–67.
© 2021 iroun Intellectual Reserve, Inc. A bane n tauaki mwiin taian kariaia ibukin katootongana. Boreetiaki i USA. Kariaiakaki n te Ingiriti: 6/19. Kariaiakaki rairana: 6/19. Rairan te Monthly Liahona Message, August 2021. Kiribati. 17472 859