iTabagone Qase Cake

Noda Kila na Ka Vinaka Sa Tu vei Keda

Mai vei Emily Abel

O dauvolaivola e vakaitikotiko e Utah, Amerika.

O na vakamacalataka vakacava na isolisoli ni kila? Me yacova mai oqo, au sa calata sara tikoga e dua vei ira na inaki bibi ni isolisoli oqo.

iVakatakilakila

woman looking away against background of sea and sky

iYaloyalo mai na Getty Images

Ena vuqa na noqu bula, au sa vakamatatataka kina na isolisoli ni kila me rawa ni kila na dodonu mai na cala, dina mai na cala. E dina ni dua o ya na tiki bibi ni isolisoli, au se qai vulica walega oqo ni levu cake sara kina.

Au a kunea e dua na iyautalei ena ivakamacala e ra ni dua na vosa ena koniferedi raraba ni Epereli 2020. E dua a cavuta na malanivosa nei Peresitedi Stephen L Richards (1879–1959), na iMatai ni Daunivakasala e liu ena Mataveiliutaki Taumada, ka a kaya, “Na mataqali kilaka cecere duadua sa ikoya na veika e nanuma vei ira na tani ka cereka na kedra ituvaki vinaka cake, na ivotavota vinaka e tiko vei ira.”¹

E sega beka ni vaka na rorogo ni serekali oya?

Na Yalo Tabu e rawa ni vukei keda me da cereka na ivotavota vinaka vei ira na tani. Sa kamikamica sara vei au na dina ni itukutuku o ya ka’u vinakata me’u vulica e levu tale. Au raica ni a vakavulica talega o Elder David A. Bednar ena Kuoramu ni iApositolo Le Tinikarua ni isolisoli ni kila ena vukei keda meda “kunea ka kauta mai na vinaka e rairai umani tu vei keda.”²

Tekivu mai na kena kilai oqo, au sa mai kila kina na bibi ni tiki ni isolisoli ni kila oqo. E gadrevi me da kunea na itovo vinaka e tu vei keda me rawa ni da vakatorocaketaka. Ni da vakayacora, eda na vakila ka cakacaka me vakat na luve ni Kalou eda sa vakatokai kina (raica na Same 82:6; Mosaia 5:7; Moronai 7:19).

Meda sa qai tekivu kunea vakacava na vinaka sa tiko vei keda? Oqo eso na sala meda rawa ni tekivu kina:

Vakanamata ena Vakayagataki ni Nomu Kaukauwa mo Vakalougatataki Ira na Tamata

E sa dua na dina vakaivunau ni tamata kece e tiko vei ira na isolisoli eso mai vua na Kalou (raica na Vunau kei na Veiyalayalati 46:11)—ka sega ni ka wale ni da vakasamataki ira. Na kena dina, sa kerea vei keda na Turaga! E vakavulica vei keda na ivolanikalou meda vakasaqara “vagumatua na isolisoli uasivi duadua, ka dau nanuma tikoga na inaki era a soli kina” (Vunau kei na Veiyalayalati 46:8; vakamatatataki).

Ni yaco me da kila vakavinaka cake na noda isolisoli se taledi, sa dodonu me da kunea na sala me da vakayagataki ira kina ena nodra qaravi na tamata.

E dua na sala mo kila kina na nomu isolisoli oya ena nomu taroga e dua o nuitaka! Tarogi ira na cava so na nomu kaukauwa. Kevaka o vakataki au, o na nanuma beka ni rorogo sakasaka. Ia nanuma, e sega ni ka me baleti iko; e baleta na kena kunei na ituvaki se itovo ni tamata yadua e dodonu mo solia vei ira na tacimu kei na ganemu e vuravura (raica na Mosaia 8:18).

Me ivakaraitaki, e dua na lewenikoro dauloloma a tukuna ni tiko vei au e dua na isolisoli me’u vukei ira na tamata me ra dau kune vakacegu. Dina ni’u a sega ni nanuma na vosa o ya me dua ga na malanivosa veilagiti, au sa tekivu vakaraica sara ga na isolisoli o ya ena noqu bula. Ni’u cakava oqo, au sa kila ni rawa ni vukei au na Tamada Vakalomalagi me’u vakayagataka na noqu kila ni veimaliwai me’u vakaitokanitaki ira eso ka vakalougatataka vakalevu cake na nodra bula eso ka vakalailai vei au.

Ena nomu kila na nomu isolisoli, sa rawa ni o digitaka vakavinaka mo vakayagataka me vakalougatataki ira na tamata (raica na Vunau kei na Veiyalayalati 82:18).

Vulica na Nomu Veivakalougatataki Vakapeteriaki.

iVakatakilakila

a young woman reading her patriarchal blessing

iTaba mai vei Judith Ann Beck

Na veivakalougatataki vakapeteriaki sa dua talega na ivurevure vinaka ni noda raica na noda isolisoli uasivi, e solia na Kalou. A kaya o Elder Larry R. Lawrence, e dua na lewe ni Vitusagavulu emeritesi: “Na Yalotabu e rawa ni vakaraitaka vei keda na noda malumalumu, ia sa rawa talega Vua me vakaraitaka vei keda na noda kaukauwa. … Ni da wilika na noda veivakalougatataki vakapeteriaki, eda vakananumi kina ni kila vinaka tu na Tamada Vakalomalagi na veika vakalou eda rawa ni cakava.”³

Na vulici ni nomu veivakalougatataki vakapeteriaki ena vukei iko mo vakanamata ki na kena vakatorocaketaki na ivakarau ni bula e rawa ni vukei iko mo yacova na veika o rawa ni rawata.

Vei au, au dau raitayalotaka na mataqali tina au nuitaka me’u na vakataka ena dua na siga. Au sega ni kila, au sa coriti tu ena noqu nanuma ni dua na tina vinaka e kaukauwa, tuvai, ka totoka—ka sa dau divi na nona keke ena iSoqosoqo ni Veivukei ena nona tabanalevu. Dina ni sega soti ni ca na veika oqori, na vulici ni noqu veivakalougatataki vakapeteriaki sa vakaraitaka vei au ni kauwaitaka vakalevu na Turaga ni’u sa tina yalovinaka ka dauloloma. Vei au, na ivakarau Vakarisito oqori sa ikoya me’u na maqusataka vakalevu cake me’u vakatorocaketaka.

Nanuma ka Vakasamataka lesu ena gauna ni Sakaramede

iVakatakilakila

bread being broken for sacrament

iTaba mai vei Jerry Garns

Na sakaramede sa gauna meda vakasamataka kina na iVakabula. E sa dua talega na gauna mo vakasamataka kina na nomu toso ki liu mo vakataki Koya. Ni o cakacaka mo kunea na nomu ivakarau vinaka, raica lesu ena veimacawa na nomu rawa ka, na veika o sotava, kei na sotavi ni bula veimaliwai ena rawa ni vukei iko mo raica eso na gauna a vakaraitaki kina na nomu isolisoli.

O Peresitedi Henry B. Eyring, iKarua ni Daunivakasala ena Mataveiliutaki Taumada, a kaya: “Ni ko dikeva na nomu bula ni yaco tiko na cakacaka ni sakaramede, au nuitaka ni nomu vakasama e sega ni dabe wale tiko ga ena veika cala ko a cakava ia me tu talega e na veika dodonu—na veitiki ni gauna ko a vakila kina ni marautaki iko na Tamada Vakalomalagi kei na iVakabula. E rawa ni ko taura e dua na tiki ni gauna ni yaco tiko na sakaramede mo kerea kina na Kalou me vukei iko mo raica na veika oqo.”⁴

Oqo eso na taro e rawa ni o tarogi iko kina se na Kalou ena gauna ni sakaramede:

Au a muria vakacava na ivakaraitaki i Karisito ena macawa oqo?
O cei au a qarava?
Na gauna cava au a vakila kina na Yalo Tabu ena macawa oqo? Na cava na vuna?
Na cava na ivakarau Vakarisito au tovolea tiko me’u taracake? Sa vakacava tiko o au?
E tiko beka e dua na ka ena noqu bula e dodonu me’u masulaka kina na veivuke?
E tiko beka e dua e gadrevi me’u veivosoti kina?
Na cava e dua na leqa, levu se lailai, ka rau a vukei au kina na Tamada Vakalomalagi kei Jisu Karisito ena macawa oqo?

Ni’u vakasamataka vakatitobu na vinaka ni Kalou ka dikeva noqu bula ena gauna ni sakaramede ka sega ni vakanamata ga ki na druka kei na cala e vukei au me’u vakararavi ga Vua.

Vakarabailevutaka na Nomu Veikacivi.

E soli vei keda na noda veikacivi me baleta e dua na vuna, kevaka sara mada ga eda sega ni kila taumada na vuna.

Au a kacivi ena dua na gauna ki na mataveiliutaki ni iSoqosoqo ni Veivukei ni noqu tabanalevu ni itabagone qase cake. Au sa mamarau me’u tekivu. Ia ni oti e vica na vula, au a yalolailai. Au a sega ni raica rawa e dua na tubu vakayalo vei ira au saga tiko me’u veiqaravi kina. Na noqu sasaga me’u sikova ka vakaitokanitaki e vaka me takali yani.

Dua na Sigatabu, sa vaka me’u vakila ni’u sa calata tiko na isolisoli vakayalo e vukea e dua me vinaka ena veiqaravi. Na noqu masu ena gauna ni sakaramede o ya me’u vakila na veivakadeitaki ni sa rawa ni’u qaravi na noqu veikacivi. Au a vakauqeti me’u kerea na veivakalougatataki ni matabete.

Au a laki raici noqu bisopi, ia ni sa vakotora na ligana e buradelaqu, e dua na imatai ni ka a kaya vei au o ya, “Na Tamada Vakalomalagi e vakavinavinakataka na yalovinaka o vakaraitaka vei ira na tamata.”

A savai au na Yalotabu, ka’u vakila vakadeitaki ni sa marautaka na Turaga na noqu sasaga. Au vakila ni tiko vei au e dua na tiki ni isolisoli e gadrevi me’u veiqaravi kina ena yalololoma. Au sa vakarautaka tu ga na noqu druka ka sega ni noqu qaqa.

Na nomu veikacivi sa madigi cecere mo kunea ka vakayagataka kina na nomu isolisoli vakayalo.

Sa Rawa Mo Tekivu Oqo

E sega ni gadrevi meda waraka meda tekivu cereka na noda vinaka sa tu e lomada.

E kaya vakaoqo o Peresitedi Dieter F. Uchtdorf, na iKarua ni Daunivakasala e liu ena Mataveiliutaki Taumada:

“Ena so na gauna eda yalolailai baleta ni da sega ni ‘levu cake’ ena dua na ka—levu cake vakayalo, rokovi, vuku, bulabula, vutuniyau, vakaitokani, se gugumatua. …

“Au sa vulica ena noqu bula ni sega ni gadrevi me da ‘levu cake’ ena dua na ka meda tekivu vakataka na tamata e vinakata na Kalou me da vakataka.”⁵

Sa rawa meda tekivu ena dua na masu. Tukuna vei Tamada Vakalomalagi na lomamu ena gauna oqo, kei na ka e vinakata na lomamu me baleti iko. Kerea vakatabakidua na isolisoli ni kila me vukei iko mo raica na nomu vinaka sa tu vei iko. Eso na gauna kamikamica ni noqu bula e yaco mai ena noqu cavuta na masu oqo. Au vakabauta ni sa tuvakarau na Tamada Vakalomalagi me vukei keda me da raica na veika kece e raica o Koya.

Ena vuku ni keda ivakatakilakila ni da luve ni Kalou, eda sa tuvai tudei ki na bula cecere (raica na Vunau kei na Veiyalayalati 78:17). Mai na isolisoli ni kila, sa rawa meda kila kina oqo vakaikeda.