Sakramen: Wan Wei blong Tingbaot Sevya

Pikja

placeholder altText

Las Sapa, i kam long Saemon Diwi

Long naet bifo oli hangem Hem long kros, Jisas Kraes i mit wetem ol Aposol blong Hem long Las Sapa. Long ples ia, hem i fas taem we Sevya i givim sakramen long olgeta. Hem i talem i klia se hemia i wan wei blong olgeta oli tingbaot Hem. Sakramen hem i wan odinens we yumi tekem bred mo wota blong tingbaot Atonmen blong Kraes. Bred hem i ripresentem bodi blong Kraes, mo wota hem i ripresentem blad blong Hem.

Yumi tekem sakramen evri Sandei long sakramen miting. Yumi singim wan hym taem ol man we oli holem prishud oli brekem bred long smolsmol pis.

Olgeta man we oli holem prishud we oli brekem bred oli talem ol spesel prea. Ol prea ia oli stap insaed long Doktrin mo Ol Kavenan 20:77, 79. Ol prea ia oli mekem yumi tingbaot promes we yumi bin mekem wetem Papa long Heven mo wanem Hem i bin promesem yumi.

Ol nara man we oli holem prishud oli pasem sakramen long ol memba blong wod o branj. Taem yumi takem sakramen, yumi tingbaot Sevya mo sakrifaes blong Hem from yumi. Yumi komitim yumiwan bakegen blong holemtaet ol kavenan (ol promes) we yumi bin mekem wetem Papa long Heven.

Pikja

gel ia i stap tekem mo kakae bred long taem blong sakramen miting

Yumi stap kwaet mo soem respek taem oli blesem mo pasem sakramen. Hem i wan taem blong yumi tingbaot laef blong Jisas Kraes, ol tijing, mo Atonmen long Hem. Yumi save tingbaot tu olsem wanem yumi save folem eksampol blong Hem.