“Te Toa: Te Kawai n Uringa Te Tia Kamaiu,” Riaona, Eberi 2022.
Rongorongo n te Riaona Ni Katoa Namwakaina, Eberi 2022
Te Toa: Te Kawai n Uringa Te Tia Kamaiu
Te Kabane n Amwarake,, iroun Simon Dewey
N te tairiki imwain are E tauraki n te kaibangaki, Iesu Kristo e ikotaki ma Ana Abotoro n te Kabane n Amwarake. Ikanne E anganiia te toa n te moan tai. E kabwarabwaraa bwa aio te anga are a na kona n uringnga iai. Te Toa bon te otenanti ike ti taua iai te kariki ao te ran ni kauringa Maten Kristo ibukira. Te kariki e tei ibukin rabwatan Kristo, ao te ran e tei ibukin raraana.
Ti taua te toa ni katoa Taabati n tain te botaki n toa. Ti anene n taromauri inanon te tai are taan taua te nakoa n ibonga a tatabeutaa ni kauarerekea te kariki.
Taan taua te nakoa n ibonga ake a tatabeutaa te kariki a taekina te tataro ae onoti. Tataro aikai a kuneaki n Reirei ao Berita aika Tabu 20:77, 79. Tataro aikai a kauringiira baika ti a tia n berita ibukina nakon Tamara are i Karawa ao baike E a tia ni berita nakoira.
Taan taua te nakoa n ibonga ake tabeman a kabuta te toa nakoia kaain te uoote ke te mwaanga. Ngkana ti taua te toa, ti uringa ara Tia Kamaiu ao Ana anganano ibukira. Ti bon manga kakorakorai ara berita (aika tabu) are ti a tia ni karaoia ma Tamara are i Karawa.
Ti kainabwabu inanon tain kakabwaiaan ao tibwaan te toa. Bon ara tai n iangoa maiun Iesu Kristo, ana reirei, ao Ana Mwakuri ni Kamaiu. Ti kona naba n iangoa arora bwa ti na kona n ira Ana katooto.
© 2022 iroun Intellectual Reserve, Inc. A bane n tauaki mwiin taian kariaia ibukin katootongana. Boreetiaki i USA. Kariaiakaki n te Ingiriti: 6/19. Kariaiakaki rairana: 6/19. Rairan te Monthly Liahona Message, April 2022. Kiribati. 18314 859