Mang e Pi Nʼen ni ma Buch ulan e Moʼolung ko Galasia ko rofen ni Madnom?

Gidiiʼen fare ward fa branch e ma mukun ni gubin e Madnom nifen fare moʼolung ko sakrament. (Gidiiʼ ni dani taʼareb rogon e mich rodad e krayag ni ngar bad ngar uned ngay.) Fare sakrament e yima piiʼ ngak gidiiʼen e galasia ko ngiyalʼ e biney e moʼolung ni nge ayuwegrad ni ngar pugoren ngorad Yesus Kristus (mu guy ko fare April 2022 Gospel Basics article ko boch morngaʼagen e sakrament). Biney e moʼolung ab muʼun e meybil ngay, tang nib thothup, nge numon ni ma piiʼ gidiiʼen e galasia ni morngaʼagen e gospel rokʼ Yesus Kristus.

Tomuren e moʼolung ko sakrament, me wear e gidiiʼ nra beeʼ ma bay e bin klass nge ulung ni nge yan ngay. Bitir ni 18 fana puul nge madaʼ ko 11 e duw e yad ma yan nga Primary. Bin sommʼon nge bin dalip e Madnom ulan fare puul, e gubin gidiiʼen e galasia ni yad ma un ko Sunday School. Ma bin lʼagruw nge bin aningeg e Madnom, e yad ma un fapi mo’olung ko Relief Society, Young Women, fa ulung ko priesthood.

Fapi meybil ko moʼolung ko Galasia e ma piiʼ gidiiʼen e galasia. Pi meybil ney ab ngoch ma mayib ni be thogthog nag fare Kan ni Thothup. Gidiiʼen e galasia e yad ma meybil ni yad ma yog e thin ni be dag e tuʼufeg ni be tayfan e Chitamangiy nu Tharmiy. Biney ab muʼun fapi thin ngay ni Thee, Thy, Thine, nge Thou ko ngiyalʼ ni yibe meybil ngak.

Reb fapi gidiiʼen e bishofric fa branch presidency e ma fith reb fapi gidiiʼen e galasia ni nge non ulan fare moʼolung ko sakrament. Tiney e numon e ma weliy morngaʼagen e gospel rokʼ Yesus Kristus. Pi gidiiʼ ney nra non e yad ma fanay e thin nib thothup nge thin ko tiyugangʼ ko Galasia ko napan ni yad be falʼag rogon e numon rorad. Ma ki yad ma micheg fapi tawaʼath ko yalen e gospel ulan e yafos rorad.

Tomuren e moʼolung ko sakrament, gidiiʼen e galasia e yad ma fil morngaʼagen e gospel ulan e klass nib achichig. Fapi lesson e bay ni morngaʼagen fapi chep nib thothup, machib ko general conference, fa morngaʼagen boch banʼen. Sensey e ma machib nag e biney e klass, machane gathi kemus ni fare sensey e be machib. Gubin gidiiʼen fare klass e rayag ni ngar weliyed e tin ni be yib ko tafney rorad ko nʼen ni yibe weliy morngaʼagen.

Taʼabiyay ulan fare puul, ab muʼun e moʼolung ko testimony ngay ko ngiyalʼ e moʼolung ko sakrament. Biney e bagaʼ ni ma buch ko bin sommʼon e Madnom ulan fare puul. Napan e biney e moʼolung, gidiiʼen e galasia e rayag ni ngar weliyed e michaenʼ rorad ngak Yesus Kristus nge fare gospel rokʼ. Ra ngan weliy e tin nib michuwunʼuy ngay e be yipʼ fan ni ngan weliy fapi nʼen nib riyulʼ ko gospel ni be thogthog nag fare Kan ni Thothup.

Gidiiʼen e galasia e yad ma falʼeg rogon rad ko fare moʼolung ko Madnom ni yad ma meybil, fil fapi chep nib thothup, min par ni falʼ rograd ni ngar thapaged fapi yiʼiy ni ma yib u dakaen e Kan ni Thothup. Faʼanra kan fithem ni ngam non fa ngam machib nag fapi lesson, meybil ko rogon nrayag ni ngam machib nag yalen fare gospel. Fanay fapi chep nib thothup. Micheg e tin nib riyulʼ. Pi tiyugangʼ ko Galasia rom e rayag ni ngar piiʼed e ayuw ngom, ni faʼanra btuʼuf.