Ebɛnadze nye Fie Ewimbir Nhyiamu?

Dwen dwumadzi bi a w’ebusua enyi gye ho na asɛmpa nsɛngyinado a ibɛpɛ dɛ wɔpɛnsampɛsam mu na wɔmbɔ mu nsũa. Bio so, san mu yi da kor bi na mber a dapɛn biara ebusua mu mba nyina anaa hɔn mu dodow botum ehyia mu. Asɔr no hyɛ asɔrmba nkuran dɛ wɔnyɛ ewimbir fie nhyiamu no Dwowda anafua. Mbom ebusua ebusua botum ehyia mu ber a oye ma hɔn.

Ebusua ebusua dodowara dze mpaabɔ hyɛ ewimbir fie nhyiamu ase na wɔdze mpaabɔ wie. Iyi to Sunsum Krɔnkrɔn no nsa ma Ɔba hɔn fie. Ewimbir fie nhyiamu yɛ mber mapã a mbofra na mpanyinfo wɔnye kuw kakraba sũa mpaa bɔ.

Ebusua ebusua dodowara so tow mbuei na mponee ndwom. Wɔtaa san mu yi ndwom fi asɔr ndwom buuku mu anaa Primary ndwom buukuu mu. Asɔr no wɔ asɔr ndwom ne sankubɔ a wɔatwe egu efir do wɔ music.ChurchofJesusChrist.org. Hom botum so ahwɛ Tabernacle Adwontokuw no a wɔwɔ Temple Square hɔn video horow no. Wɔrotow ndwom wɔ ewimbir fie nhyiamu ber mu no boa asɔrmba ma wosũa asɔr ndwom a wɔtow no asɔrfi no.

Asɔr no wɔ adzesũa ho mboa pii a obotum aboa ewimbir fie nhyiamu ne nyɛe. Hom botum afa sima kakrabaa dze akenkan na wɔapɛnsampɛnsam Liahona, Friend, anaa For the Strength of Youth no mu asɛm a wɔakyerɛw. Iyi so botum ayɛ ber a wɔdze bɔhwɛ Asɔr video ahorow no bi na wɔapɛnsampɛnsam mu. Anaa hom botum akenkan wiadze mfɛndzanan ehyiadzi kasa a wɔkãe, anaa wɔapɛnsampɛnsam dɛm dapɛn no n’akenkan a ɔwɔ Come, Follow Me no mu.

Mbofra botum akã ewimbir fie nhyiamu ho. Wobotum aboa ma wɔayɛ dwumadzi ho nhyehyɛɛ, wɔabɔ mpaa, anaa woeyi ndwom horow a wɔbɔtow na woedzi enyim ma wɔatow. Wobotum mpo akyerɛ adzesuadze no. Ansaana ewimbir fie nhyiamu bɛhyɛ ase no, ibotum ama w’abofra akenkan asɛm bi a ɔwɔ Friend dawurbɔ krataa mu anaa kyerɛwsɛm mu asɛm a ɔpɛ. Abofra no botum akã asɛm no akyerɛ ebusua dɛ adzesuadze no. Mbofra dodowara so pɛ dɛ wɔyɛ kyerɛwsɛm mu nsɛm no ho ɔyɛkyerɛ wɔ ewimbir fie nhyiamu mu. Hom mma mba mpanyimfo no nyɛ adzesuadze ho nhyehyɛɛ anaa wɔmfa wiadze mfɛndzanan ehyiadzi mu kasa ahorow a wɔkãe a wɔpɛ dɛ wɔkenkan. Nkyii wɔmma wondzi mpɛnsampɛnsamu no enyim.

Ebusua ebusua pii hɔn enyi gye dwumadzi horow a ɔkã ewimbir fie nhyiamu ho. Woridzi agor, wɔreyɛ nsaano ndzɛmba, anaa wɔrobɔ mu ayɛ edziban botum akã dwumadzi a wɔyɛ no fie mu ho.

Abowano dwumadzi horow no wobotum etu mpasar, anantsew akɔ beebi dɛ ebusua anaa wɔabɔ mu edzi agor wɔ abowano. Hom nhwehwɛ dwumadzi a ebusua mu mba no nyina botum edzi, na hom mbɔ mu nya enyigye. Hom nkwetsir akansi yerɛyerɛw a obotum epia Sunsum no efi hɔ akɔ.

Ewimbir fie nhyiamu yɛ mber mapã a ebusua ebusua botum asom binom. Mfatoho, hom botum aboa fipamfo binom a wɔayɛ mpanyimfo, ama hɔn a wonnyi dabew edziban, akyerɛw krataa akɛma asɛmpasomafo, anaa wɔatase nwuranwura.