“Tera te Kainutu?” Riaona, Aokati 2022.
Rongorongo man te Riaona ni katoa namwakaina, Aokati 2022
Tera te Kainutu?
Te Kainutu bon te tai are e a tia ni katauaki inanon te wiiki bwa ana tai te utu n ikotaki. N te tai aio, ko kona “n reiakina te euangkerio, kakorakorai koaua, karekea te inanoi, ao te kimwareirei i marenaia” (Aeniboki: Te Beku n Ana Ekaretia Iesu Kristo Ibukiia Aika Itiaki ni Boong aika Kaitira, 2.2.4, ChurchofJesusChrist.org). Te Kainutu e na bon kakaokoro ibukiia utu nako. Ma te kouru bwa e na karaoaki te tai aio bwa te tai n kaaniia Te Tia Kamaiu.
Te Katauraoi
Iangoa ami waaki ni kakukurei are e na kaungga nakoia kaain te utu ao te atuu n reirei ae e na uaia ni maroroakinaki ao n reiakinaki. Irarikin anne, rinea te bong ao te tai n te wiiki ae koraki are a kona ni bane n kaitibooaki iai kaain te utu ae bwanin. Te Ekaretia e kaungaia membwa bwa a na booa aia kainutu ni katoaa tairikin te Moanibong. Ma a kona utu ni bon karaoia nakon te tai are e tamaroa nakoia.
Tataro
Angiia utu a kauka ao ni kaina aia kainutu ma te tataro. Aio e bon kaoa te Tamnei ae Raoiroi nakon mweengaia. Te Kainutu bon te tai ae baireaki ibukiia ataei ao ikawai bwa a na reiakiniia te tataro n te kurubu ae uarereke.
Katangitang
Angiia naba utu a bon anene ni kaukuuki ao ni kainiin. A rinei kunaia ma te boki n anene n taromauri ke man aia boki n anene Ataei n te Buraimwarii. Te Ekaretia bon Iai naba ana katangtang te biaano ake a tia n raweaki ake bon man te boki n anene n music.ChurchofJesusChrist.org. Ko konaa naba n mataku n witeoo man te Tabaenako Kuaea man te Tembora Tikuea. Te anene n tain te kainutu e kona n buokiia membwa n reiakiniia anene ake a aneeneneaki n tain te taromauri.
Reirei
E bon tiraua ana ibuobuoki te Ekaretia ake a na kona n kabebetea aron te kainutu. Ko konaa naba n anaa tabeua te miniti n wareka ao n maroroakina te rongorongo man te Riaona, te Rao, ke Ibukin Kakorakoraia Kairake. Aio naba te tai are ko kona n mataku ao n maroroakina witeoon te Ekaretia. Ke kona n wareka rongorongo man te maungatabu ni kabuta, wareware n booki aika tabu, ke n maroroakina kanoan te wareware n te wiiki anne man Nakomai, Iriirai.
Kairekerekeaia kaain te Utu
A kona naba ataei n ira te waaki n te kainutu. A kona n ibuobuoki n katauraoan iango ni kakukurei, tataro, ke n rinea ao n kairii anene. A kona naba n anga reirei. Imwain te kainutu, ko konaa n buoka am ataei n wareka te karaki man te Rao maekatiin ke tao aia karaki man koroboki aika tabu. Te ataei ngkanne e kona n karakina te karaki anne nakoia kaain te utu bwa ana reirei. Angiia ataei a tatangiria naba n katea kaain te karaki man booki aika tabu ibukin te kainutu. Anganiia ana ataei ake a ikawai bwa ana katauraoi ibukiin te reirei ke tao n rinea te rongorongo man te maungatabu ni kabuta ae a tangiria ni kan warekia. Ao ngkanne anganiia bwa a na kaira te marooro.
Waaki ni Kakukurei
A mwaiti utu aika a ungan kakaraoi waaki ni kakukurei bwa kanoan naba aia kainutu. Waaki ni kakukurei ake a kona n karaoaki inanon te mweenga n aron te takakaro, ke te uaia ni kuuka.
Ibukin waaki ni kakukurei i tinaniku n aron te rianna, te nako n tamwarakei taabo aika a ririeta, ke te uaia n takakaro ae kaunga i tinaniku. Kakaea te waaki ni kakukurei ae e kona n karaoaki irouia kaain te utu ae bwanin ao man reke te unga irouia. Kataia kararoaa te namakin n kaiangatoa are e na kona n kakionakoa te Tamnei ae Raoiroi.
Mwakuri n Ibuobuoki
Te kainutu bon te tai ae tamaroa ibukiia utu n karaoa te mwakuri n ibuobuoki. Ko kona n buokiia kaain rarikim aika a kara, nikirii kanaia ake akea mweengaia, kororeta nakoia mitinare, ke rikoi maange, bon katoto tabeua.
© 2022 iroun Intellectual Reserve, Inc. A bane n tauaki mwiin taian kariaia ibukin katootongana. Boreetiaki i USA. Kariaiakaki n te Ingiriti: 6/19. Kariaiakaki rairana: 6/19. Rairan te Monthly Liahona Message, August 2022. Kiribati. 18316 859