Emwen seni Soufos mi Manau

Soufos ra angei pwarata seni Kot. Nupwen ekkewe soufos ra chengen ne osukuna kich, a chok ussun nge Kot a kapas ngeni kich (nengeni Doctrine and Covenants 1:38). Sia tongeni nuku pwe ra apasa ngeni kich met Kot a mochen sipwe sinei.

Meinisin soufos ra pwarata ussun Jises Kraist. Ra osukuna ngeni kich pwe I ewe Noun Kot. Ra osukuna ngeni kich ussun Manauan, an nenien apiru, me An Achasefan. Me ra pwar ngeni kich ifa ussun ach sipwe tapweno mwirin I me anneasosichi An kewe annuk.

Ekkewe Soufos ra osukuna ewe kapas allimen Jises Kraist. Ra awewei ekkewe feioch sia angei nupwen sia anneasosichi ekkewe annuk me ekkewe niwin sia angei ika sise. Ren ekkoch fansoun, meni repwe chengen ne apasa ngeni kich ussun mettochun non fansoun mwach.

Kot a aiti aramas seni ekkewe soufos seni chok nepoputan. Ekkewe soufos ra manau non fansoun Testamen Noom pachenong Adam, Noah, Abraham, Moses, Isaiah, me ekkoch. Mi pwan wor soufos nein ekkewe aramas non ewe Puken Mormon. Ekkei soufos pachenong Liai, Mosaia, Alma, me Moronai. Sia tongeni kaeo met ra aitikich ren anneani ekkewe pukepin.

Joseph Smith i ewe akkomwan soufos ren fonsoun ikenai. I a eniwinisefani ewe Mwichefenin Jises Kraist ngeni ewe fonufan. Russell M. Nelson i ewe soufos me Presetenin ewe Mwichefen ikenai. Noun kewe chon emwen non ewe Aewin Presetensi me ewe mwichen Engon me Ruemon Apostel pwan ir soufos. chon osini, me kewe chon pwarata.

Ewe soufos a kapas ngeni kich non ewe mwichenap me pwan ekkoch fansoun. A osukuna ngeni kich ren met Kot a mochen sipwe sinei me ifa ussun sipwe tapweno mwirin Jises Kraist ikenai. Sia tongeni kuna an kewe osukun non ewe Liahona me won ChurchofJesusChrist.org.

Sipwe feioch ika sia tapweno mwirin an ewe soufos kewe osukun. Nupwen sipwe tapweno mwirin ewe soufos, sia tongeni sinei pwe sia fori met Kot a mochen sipwe fori. Sia tongeni mefi kinamwe non manauach me arap ngeni Jises Kraist.