Fil Mornga’agen Yesus Kristus Nge Gelngin Nrayag ningan Thapeg

Gu baʼadag ni nggu weliy rogon nrayag ningad feked nga dakendad fare gelngin Somoel niʼir e Masta rodad, Yesus Kristus.

Sommʼon e ngad filed morngaʼagen.¹ “Rib momawʼ [ngodad] ningan ayuwegdad u fithikʼ e fekyath” (Doctrine and Covenants 131:6). Gelngin ni gadadra nangfan yalen fare Tathapeg nge nʼen ni rrinʼ ni fan ngodad, e arram gelngin ni gadadra nang nrayag nga piiʼ gelngin e pi nʼen nib tuʼuf ngalang e yafos rodad.

Gadad gidiiʼen Got ko tin Tomur e Rran, gadad ma yoeg fithingan fare muruwel rokʼ ni fare Bayul rokʼ Yesus Kristus, ni falʼag kanawoʼen e foskoyamʼ nifan ngak gubin e gidiiʼ me ngongliy kanawoʼen e yafos ni manemus nifan ngak e piʼin nra kalngaenʼ ko denen rokʼ me thapeg me ayuweg fapi gamiʼing nge mʼag ni rib gaʼfan.

U tan paʼ fare tonom rokʼ e Chitamangiy, fare Tathapeg e ir e chaʼen ni gafgow riy. Fare Tathapeg e ir e thaʼab fare gaf ko yamʼ. Fare Tathapeg e ir e ni gafgow nag ni pilwon e pi kireb nge pi denen rodad me chuweg e denen rodad ni kemus ni ngan kalngaenʼuy. Fare Tathapeg e ir e en ni chuwegdad u fithik e yamʼ ko dogur nge yamʼ ni thothup.

Tin baʼaray e thin ni woed e Bayul nge Foskoyamʼ e be yipfan e nʼen nike rrinʼ fare Tathapeg, ni woed rogon fare tonom rokʼ e Chitamangiy, nifan e athap ko biney e yafos nge bin migid e yafos nib manechubug ni bayiyib.