Kavenan We I No Gat En

Taem yumi mekem wan kavenan wetem God, yumi lego fasin blong blong wol fogud. God bae i no lego rilesensip we Hem i gat wetem olgeta we traehad blong joen wetem Hem. Be, olgeta we oli bin mekem wan kavenan wetem God oli save kasem wan spesel wei blong lavem mo gat sore. Long Hibru lanwis, kavenan lav ia oli singaotem se hesed (חֶסֶד).³

Hesed i nogat wan stret Inglis toktok we i semak long hem. Ol Transleta blong King Jemes Vesen blong Baebol oli bin traehad blong transletem hesed i go long Inglis. Plante taem oli jusum “fasin blong lav mo stap kaen.” Hemia i kasem kolosap be i no ful mining blong hesed. Ol narafala transleta, olgeta tu oli transletem, olsem “sore” mo “gud tumas.” Hesed hem i wan spesel toktok we i soem klia wan kavenan rilesensip we tugeta pati i agri blong stap tru mo fetful long tufala.

Selestial mared hem i wan kavenan rilesensip. Wan hasban mo waef tufala i mekem wan kavenan wetem God mo wetem tufala blong stap tru mo stap fetful long tufala.

Hesed hem i wan spesel wei blong lavem mo gat sore, we God i filim blong, mo givim long olgeta we oli mekem wan kavenan wetem Hem. Mo yumi givimbak hesed i go long Hem.

Pikja

wan niufala mared kapol aotsaed long wan tempol

Foto I Kam long Jerry L. Garns

From God i hesed[sore] long olgeta we oli mekem kavenan wetem Hem, Hem bambae i lavem olgeta. Bambae Hem i gohed blong wok wetem olgeta mo givim olgeta janis blong jenis. Bambae Hem i fogivim olgeta taem oli sakem sin. Mo sapos oli lus, bambae Hem i helpem olgeta blong faenem rod blong olgeta i kambak long Hem.

Taem yu mo mi i mekem wan kavenan wetem God, rilesensip blong yumi wetem Hem i kam moa kolosap bitim taem we no bin mekem kavenan yet wetem Hem bifo. Naoia oli fasem yumi tugeta. From kavenan we yumi mekem wetem God, Hem bae i neva taed long ol traehad blong Hem blong helpem yumi, mo bae yumi neva stopem ol sore mo longfala tingting blong Hem we hem i gat long yumi. Wan wan long yumi i gat wan spesel ples insaed long hat blong God. Hem i gat bigfala hop blong yumi.

Yu save long toksave blong Lod long histri taem Hem i givim long Profet Josef Smit. I bin kam tru long revelesen. Lod i bin talemaot long Josef, “Promes ia, i blong yufala tu, from se yufala i kamaot long laen blong Ebraham, mo promes ia, Lod i bin mekem long Ebraham” (Doktrin mo Kavenan 132:31).

Taswe, kavenan ia we i no gat en i bin kambak olsem pat blong bigfala Restoresen blong gospel we i fulwan. !Tingbaot hemia! Wan mared kavenan insaed long tempol i konek stret long kavenan blong Ebraham. Insaed long tempol oli introdiusum long wan kapol ol blesing we oli kipim blong olgeta we oli ol fetful laen blong ol sid blong Ebraham, Aesak, mo Jekob.

Semak olsem Adam, yu mo mi i bin kam insaed long rod blong kavenan long taem blong baptaes. Afta yumi mekem hemia i hapen fulwan taem yumi go insaed long tempol. Ol blesing blong kavenan blong Ebraham, oli kasem olgeta insaed long ol tabu tempol. Olgeta blesing ia, oli mekem se yumi laef bakegen long ded blong “kasem ol jea blong king, ol kingdom, ol paoa, ol ples blong prins i rul, mo ol ples blong rul, mo ‘go long ples we [yumi] kam olsem wan god mo kasem glori long evri samting’ [Doktrin mo Ol Kavenan 132:19].”⁴

Long las toktok long OlTesteman, yumi rid abaot promes blong Malakae se Elaeja bambae i “tanem hat blong ol papa i go long ol pikinini, mo ol hat blong ol pikinini i go long ol papa” (Malakae 4:6). Long laen blong Isrel blong bifo, toktok ia long ol papa, i tekem tu, ol papa olsem, Ebraham, Aesak, mo Jekob. Promes ia oli i kam klia taem yumi ridim nara vesen blong ves ia long Moronae we Profet Josef Smit i bin talem, kot: “Hem [Elaeja] bae i planem insaed long hat blong ol pikinini, ol promes we Lod i bin mekem long ol papa, mo hat blong ol pikinini bae i tanem i go long ol papa blong olgeta” (Josef Smit—Histri 1:39). Ol papa ia i gat tu, Ebraham, Aesak, mo Jekob. (Luk long Doktrin mo Ol Kavenan 27:9–10.)

Pikja

pikja blong Jisas Kraes

Moa long storian ia long Kraes mo Yangfala Rij Rula, i kam long Heinrich Hoffman

Jisas Kraes: I Stap long Medel blong Ol Kavenan Ia.

Sakrifaes blong Atonmen blong Sevya i mekem i posibol blong Papa i mekem ol promes blong Hem oli kam tru wetem ol pikinini blong Hem. From Jisas Kraes i talem se “Mi nao rod ya, mo mi mi stamba blong trutok, mo mi stamba blong laef,” I no gat man i save kam long Papa blong mi, sapos mi mi no tekem hem i kam” (Jon 14:6). Promes blong kavenan blong Ebraham i kam posibol tru long Atonmen blong Sevya blong yumi, we i Lod Jisas Kraes. Jisas Kraes i stap long medel blong kavenan blong Ebraham.

OlTesteman i no wan buk blong skripja nomo, be hem i wan buk blong histri. Yu tingbaot taem yumi ridabaot mared blong Sarae mo Ebram. From se tugeta i no save gat pikinini, Sarae i bin givim woman slef blong hem, Hega, blong kam olsem waef blong Ebram tu, folem daereksen blong Lod. Hega i bonem Ismael.⁵ Ebram i lavem tumas Ismael, be hem bae i no pikinini ia we bae laen blong kavenan i pas tru long hem. (Luk long Jenesis11:29–30; 16:1, 3, 11; Doktrin mo Ol Kavenan 132:34.)

Olsem wan blesing blong God, mo folem fet blong Sarae, hem i bin bonem pikinini taem hem i wan olfala woman blong mekem se kavenan ia bae i save pas tru long boe blong hem Aesak (luk long Jenesis 17:19). Hem i bon long kavenan.

God i givim Sarae mo Ebram ol niufala nem—Sarae mo Ebraham (luk long Jenesis 17:5, 15). Wetem ol niufala nem ia i makem wan stat blong wan niu laef mo wan niu stamba tingting blong famli ia.

Ebraham i lavem tugeta Ismael mo Aesak. God i talem long Ebraham se Ismael bambae i gat plante mo bambae i kam wan bigfala nesen (luk long Jenesis 17:20). Long semtaem, God i mekem i klia se kavenan ia we i no gat en bambae i hapen tru long Aesak (luk long Jenesis 17:19).

Olgeta we oli akseptem gospel bambae oli kam pat blong laen blong Ebraham. Long Galesia yumi ridim:

“Yufala evriwan we i baptaes finis blong joen long Kraes, yufala i tekem Kraes finis.

“… Yufala i kam wan nomo long Jisas Kraes.

Mo sapos yufala i blong Kraes, ale, yufala i olsem ol laen ya blong Ebraham. Mo bambae yufala i save kasem ol samting ya we God i promes finis blong givim long ol laen ya blong hem” (Galesia 3:27–29).

From hemia, yumi save kam wan wetem Hem long kavenan tru long laen o long adopsen.

Pikja

ol pipol oli kam tugeta long seves blong baptaes

Aesak mo boe blong Rebeka, Jekob, tufala i bin bon long kavenan. Antap long hemia, hem i bin jusum blong kam insaed wetem ful hat blong hem. Olsem we yu save, nem blong Jekob oli jenisim i go long Isrel (luk long Jenesis 32:28), we i minim “letem God i rul” o “wan we i rul wetem God.”⁷

Long Eksodas yumi ridim se “God i tingbaot kavenan blong Hem wetem Ebraham, wetem Aesak, mo wetem Jekob” (Eksodas 2:24). God i talemaot long ol pikinini blong Isrel se, “Sapos yufala i obei long mi, mo yufala i holem gud promes ya we mi mekem wetem ol bubu blong yufala long bifo, bambae yufala i namba wan man blong mi, i winim ol narafala man long wol.” (Eksodas 19:5).

Toktok ia “nambawan” oli transletem i kamaot long Hibru segullah, we i minim ol samting we valiu blong olgeta i hae—wan “tresa.”⁸

Buk blong Dutronome i tokbaot hamas kavenan ia hem i impoten. Ol Aposolinsaed long Niu Testeman oli save abaot kavenan ia. Afta we Pita i bin hilim wan sik man long doa blong tempol, hem i bin tij abaot Jisas long olgeta we oli stap lukluk. Pita i talem, “God blong ol olfala blong yumi bifo, God blong Ebraham mo Aesak mo Jekob, Hem nomo i leftemap nem blong man blong wok blong hem, Jisas” (Ol Wok 3:13).

Pita i endem toktok blong hem taem hem i talemaot long olgeta we oli stap lisin mo lukluk, “Ol promes we God i givim bifo long ol tok blong ol profet ya blong hem, oli blong yufala. Mo yufala i stap insaed long promes ya we God i mekem finis long ol olfala blong yufala bifo. Tok we God i givim long Ebraham, i talem se, Mi bambae mi yusum olgeta we bambae oli kamaot biaen long yu blong blesem ol man long olgeta narafala kantri long wol” (Ol Wok 3:25). Pita i mekem i klia long olgeta se pat blong misin blong Kraes i blong mekem kavenan blong God i kamtru.

Lod i bin givim wan semak toktok long ol pipol blong Amerika long bifo. Long ples ia, Kraes ia we i laef bakegen long ded, Hem i talemaot long ol pipol, se huia nao olgeta. Hem i talem:

“Mo luk, yufala i ol pikinini blong ol profet; mo yufala i blong laen blong Isrel; mo yufala i blong kavenan we Papa i bin mekem wetem ol papa blong yufala, we hem i talem long Ebraham: Tru long laen blong yu bae evri famli blong wol i kasem blesing.

“Papa i bin resemap mi fastaem blong yufala, mo i bin sendem mi blong blesem yufala blong mi tanem evriwan long yufala i go longwe long ol rabis fasin blong [yufala] wanwan; mo hemia, from yufala i ol pikinini blong kavenan” (3 Nifae 20:25–26).

?Yu yu luk hamas hemia hem i impoten? !Olgeta we oli kipim ol kavenan blong olgeta wetem God bambae oli kam wan grup blong ol sol blong stanap agensem sin! Olgeta we oli holemtaet ol kavenan blong olgeta, bambae oli gat paoa blong stanap agensem strong fasin blong wol we i stap gohed.

Pikja

wan man i stap tekem sakramen

Lod i givim komanmen blong serem gospel ia mo serem kavenan ia. Hemia nao from wanem yumi gat ol misinari. Hem i wantem se evri pikinini blong Hem blong oli gat janis blong jusum gospel blong Sevya mo wokbaot long rod blong kavenan. God i wantem konektem ol pipol long kavenan ia we Hem i bin mekem wetem Ebraham blong bifo:

Misinari wok i wan impoten pat blong kam tugeta blong Isrel. Kam tugeta ia, hem i wan wok we i moa impoten, we i stap tekem ples long wol tedei. I nogat wan nara samting we i bigwan moa bitim wok ia. I nogat wan nara samting we i moa impoten semak olsem wok ia. Ol misinari blong Lod—ol disaepol blong Hem—oli tekpat long bigfala jalenj ia, we i moa bigwan olgeta, i stamba wok we i gud moa olgeta, mo i wok we i nambawan long wol tedei.

Be i gat moa—plante moa. I gat bigfala nid blong serem gospel long ol pipol long narasaed blong vel. God i wantem evriwan, long tugeta saed blong vel, blong stap glad long ol blesing blong kavenan blong Hem. Rod blong kavenan i open long evriwan. Mifala i plis long evriwan blong wokabaot long rod ia wetem mifala. I nogat wan narafala wok raon long wol, olsem ya, we yumi pat insaed long hem. From “se Lod i gat sore long olgeta evriwan we bae oli singaotem tabu nem blong hem wetem ol tru hat blong olgeta” (Hileman 3:27).

From se Melkesedek Prishud i kambak, tugeta, ol woman mo ol man we oli kipim kavenan oli save kasem “evri blesing blong jos long saed blong spirit blong gospel” (Doktrin mo Ol Kavenan 107:18; oli ademap italik).

Long dedikesen blong Ketlan Tempol long 1836, anda long daereksen blong Lod, Elaeja i bin kam kamaot. ?Stamba tingting blong Hem? “Blong tanem … hat blong ol papa i go long ol pikinini, mo hat blong ol pikinini i go long ol papa” (Doktrin mo Kavenan 110:15). Elias tu i bin kam kamaot. ?Stamba tingting blong Hem? Blong folem Josef Smit mo Oliver Cowdery “dispensesen blong gospel blong Ebraham, mo i talem se tru long mifala mo laen blong mifala, evri jeneresen afta long mifala bae i gat blesing” (Doktrin mo Kavenan 110:12). Taswe, Masta i bin givim long Josef Smit mo Oliver Cowdery prishud atoriti mo raet blong givim ol spesel blesing blong kavenan blong Ebraham long ol narawan.⁹

Long jos, yumi wokabaot long rod blong kavenan yumi wan mo tu tugeta wetem ol narawan. !Semak olsem ol mared mo ol famli we ol serem wan spesel samting tugeta we i krietem wan spesel lav, niufala rilesensip we yumi joenem yumi tugeta tru long kavenan we i go stret daon long God blong yumi!

Hemia wanem Nifae i minim taem hem i talem se God “i lavem olgeta we oli wantem hem se hem i God blong olgeta” (1 Nifae 17:40). Hemia i from wanem, olsem pat blong kavenan, wan spesel sore mo lav—o hesed—hem i stap oltaem blong evriwan we oli mekem mo kam tugeta long wan rilesensip we i klosap wetem God, iven “gogo kasem plante taosen yia” (Dutronome 7:9).

Stap mekem wan kavenan wetem God bae i jenisim rilesensip blong yumi wetem Hem blong oltaem. Hem i blesem yumi wetem ekstra lav mo sore.¹⁰ Hem i afektem huia yumi, mo olsem wanem God bae i helpem yumi blong kam kaen man ia we Hem i wantem. Yumi kasem promes se, yumi save, kam wan “nambawan tresa” long Hem (Ol Sam 135:4).

Olgeta we oli mekem ol tabu kavenan mo kipim, hem i oli olgeta we oli kasem promes long laef we i no save finis mo blong kam olsem wan god, “we i presen blong God we i moa bigwan long evri narafala presen blong hem” (Doktrin mo Ol Kavenan 14:7). Jisas Kraes i givim mo kipim ol kavenan (luk long Hibru 7:22; 8:6). Olgeta we oli kipim kavenan, mo lavem God, mo letem Hem blong rul ova long evri narafala samting long laef blong olgeta, oli mekem Hem i gat bigfala paoa long laef blong olgeta.

Long dei blong yumi tedei, yumi gat janis blong kasem wan petriakel blesing mo lanem abaot koneksen blong yumi i gobak long ol petriak blong bifo. Ol blesing ia oli givim wan lukluk long wanem we i stap long fored.

Pikja

Jisas i stap toktok wetem Pita

?Yu Lavem Mi Moa Bitim Ol Samting Ia? i kam long David Lindsley

Koling blong yumi olsem kavenan Isrel i blong mekem sua se evri memba blong Jos i luksave glad mo ol blesing we i kam taem yumi mekem kavenan wetem God. Hem i wan singaot long evri man mo woman, boe mo gel we oli kipim kavenan, blong serem gospel wetem olgeta we oli stap raon long olgeta. Hem i wan singaot blong sapotem mo leftemap tingting blong ol misinari blong yumi, we oli go aot wetem ol instraksen blong baptaes mo help karem Isrel i kam tugeta, blong mekem se tugeta yumi save kam ol pipol blong God mo Hem bambae i God blong yumi (luk Doktrin mo Ol Kavenan 42:9.).

Evri man mo evri woman, we i tekpat long ol odinens blong prishud, mo oli mekem mo kipim ol kavenan wetem God, oli save yusum paoa ia blong God. Yumi tekem nem blong Lod long yumi wanwan. Yumi tekem nem blong Hem long yumi olsem wan pipol. Blong stap glad blong yusum stret nem blong Jos Ia blong Jisas Kraes blong Ol Lata-dei Sent hem i wan impoten wei we yumi olsem wan pipol i tekem nem blong Hem long yumi. I tru, evri gudfala fasin blong Jos Ia blong Jisas Kraes blong Ol Lata-dei Sent mo ol memba blong hem oli soemaot God hesed.

From wanem nao Isrel i seraot? From ol pipol oli bin brekem ol komanmen mo stonem ol profet. Wan Papa we i lavem yumi tumas be i sore long yumi i help blong seraotem yumi long ol defdefren ples, longwe long yumi.¹¹

Be, Hem i seraotem olgeta wetem wan promes se wan dei bae Isrel i kam tugeta bakegen insaed long grup blong Hem.

Traeb blong Juda i bin gat responsabiliti ya blong i rere long wol from Fasfala Kaming blong Lod. Long traeb ya, Meri i kasem koling ia blong stap olsem mama blong Pikinini blong God.

Traeb blong Josef, tru long hem mo pikinini boe blong Asenat, Efrem mo Manase (luk long Jenesis 41:50–52; 46:20), i kasem responsabiliti blong lidim kam tugeta blong Isrel, blong rere long wol from Seken Kaming blong Lod.

Long hesed rilesensip ia we i nogat en, bae hapen we God i wantem blong karem tugeta Isrel. !Hem i Papa blong yumi we i stap long Heven! Hem i wantem wanwan long ol pikinini blong Hem—long tugeta saed blong vel—blong harem mesej blong gospel blong Jisas Kraes we i kambak.

Kavenan rod i wan rod blong lav—we i gud tumas hesed, fasin blong kea wetem plante lav long narawan,mo blong lukaot long narawan. Blong filim lav ia hem i fri mo i leftemap tingting. Bigfala glad we bae yu filim, bae yu filim taem yu fulap wetem lav blong God mo blong ol nara pikinini blong Hem.

Blong lavem God bitim wan narawan o wan nara samting hem i kondisen ia we tru long hemia, bae givim tru pis, kamfot, paoa long yu wan, mo glad.

Rod blong kavenan ia i abaot rilesensip blong yumi wetem God— hesed rilesensip wetem Hem. Taem yumi mekem wan kavenan wetem God, yumi mekem wan kavenan wetem Hem we bae Hem i kipim tok blong Hem oltaem. Hem i mekem evri samting we Hem i save mekem, we i no blokem fridom blong yumi, blong helpem yumi kipim blong yumi.

Buk blong Momon i statem mo endem wetem ful refrens blong kavenan ia we i no gat en. Long taetol pej i go kasem ol testemoni blong Momon mo Moronae long en, Buk blong Momon i mekem refrens long kavenan ia (luk long Momon 5:20; 9:37). Taem ia we Buk blong Momon i bin kamaot, i wan saen long ful wol se Lod i bin statem wok blong karem Isrel i kam tugeta, mo Hem i mekem olgeta kavenan we Hem i bin mekem long Ebraham, Aesak, mo Jekob.”¹²

Ol dia brata mo sista blong mi, yumi kasem singaot ia long wan impoten taem long histri blong wol blong tijim wol long gudfala mo paoaful kavenan we i no gat en. Papa blong Yumi long Heven i trastem yumi fulwan blong tekpat long bigfala wok ia.