2022
O Le Mana o le Afioga
Novema 2022

O Le Mana o le Afioga

Elder Mark D. Eddy

O Le Fitugafulu

O loo i ai le mana i upu a perofeta anamua ma ona po nei aua o a latou upu o afioga ia a le Alii.

I le Tusi a Mamona, tatou te faitau ai i se faaiuga taua na faia e le perofeta o Alema i se fuaiupu faapelepele o se mau. A o lei toeiloiloina na upu ua masani ai, faamolemole ia tatou manatunatu faatasi i tulaga faigata na faia ai lena faaiuga.

O se vaega o tagata, na faaigoaina i latou lava o sa Sorama, na tavavaeeseina mai ia sa Nifae1 ma faapotopoto i tuaoi o le laueleele e lata ia sa Lamana. 2 Na faatoilalo ai talu ai nei e sa Nifae le au sa Lamana i se taua e le mafaatusalia lea na fasiotia ai le fiasefulu o afe,3 ma sa “popole tele ai nei faia e sa Sorama se fesootaiga ma sa Lamana, ma avea ai ma ala o se toesega tele o le vaega a sa Nifae.” 4 I talaatu o popolega i le taua, sa iloa ai e Alema o sa Sorama, o “e ua uma ona talai atu i ai le afioga a le Atua ia te i latou,”5 ua liliu atu e tapuai i tupua ma “ua faapi’opi’o i ala o le Alii.”6 O nei mea uma na matua mamafa i luga o Alema ma “ua avea ma pogai o le faanoanoa tele.”7

O le iloa ai ua i ai o ia lava i nei tulaga lavelave ma le faigata, na manatunatu loloto ai Alema pe o le a se mea e ao ona fai. I lana faaiuga ua tatou faitau ai i upu na faasaoina e musuia ai ma aoao i tatou a o tatou folau i tulaga lavelave ma faigata o o tatou aso.8

“Ma o lenei, ona sa i ai i le talai atu o le afioga se uiga malosi e taitai atu ai tagata ia latou faia le mea tonu—ioe, sa i ai sona uiga mamana tele atu i luga o mafaufau o tagata nai lo le pelu, po o se isi lava mea, ua oo ia te i latou—o lea na manatu ai Alema e tatau ona latou faataitaia le mana o le afioga a le Atua.”9

Faatasi ai ma le tele o isi mau faaiuga e mafai ona fai, o le faatuatua o Alema na ta’ita’i ai i latou e faalagolago i le mana o le afioga. E le o se mea na faafuāveta nisi o lauga aupito mamana e maua i soo se mea o tusitusiga paia na folafola atu loa lava ina ua mavae lena faaiuga. I mataupu e 32 ma le 33 o le Alema tatou te faitau ai i lana lauga mamana e uiga i le faatuatua i le Alii o Iesu Keriso, ma i le mataupu e 34 tatou te maua ai ia aoaoga taua tele a Amoleka e uiga i le Togiola a Iesu Keriso.

Faapupulaga o le Mana o le Afioga

O le mea moni, i tusitusiga paia atoa tatou te faitau ai i faamanuiaga ofoofogia e liligi ifo i luga o i latou na filifili e faataitai le mana o le afioga a le Atua i o latou olaga.10 Ou te valaaulia outou tatou te manatunatu loloto faatasi i faataitaiga e tolu a o tatou liliu atu la tatou taula’i i le Tusi a Mamona—o se tusi na faamatalaina e Peresitene Russell M. Nelson o “la tatou taiala e ola ai i aso e gata ai.”11

Muamua, a o faamanatu atu i lona nuu le ala na laveaiina ai e le Alii o latou tamā, na aoao atu ai Alema: “Faauta, sa ia liua o latou loto; ioe, sa ia fafagu i latou mai se moe gase, ma sa latou ala mai i le Atua. Faauta, sa i ai i latou i totonugalemu o le pogisa; e ui i lea, sa faapupulaina o latou agaga i le malamalama o le afioga tumau-faavavau.”12 Atonu ua outou lagonaina e faapei sa i ai outou i le lotolotoi o le pogisa. Pe e te moomoo ea e fia maua se taitaiga faaleagaga? Afai o lea, faamolemole faataitai le mana o le afioga a le Atua.

Lona lua, manatunatu i le liliuga e le Alii o sa Lamana, lea na ia molimauina o se faifeautalai, na fai mai ai Amona, “Faauta, e fia le tele o afe o o tatou uso ua ia tatalaina mai tiga o seoli; ma ua aumai ai i latou e pesea le alofa togiola, ma ua tupu mai lenei mea ona o le mana o lana afioga ua i totonu o i tatou.”13 Uso e ma tuafafine, e toatele naua o loo tatou faatasi, o loo naunau atu mo se tasi tatou te alolofa i ai ina ia aumaia e pesea le alofa togiola. Ia tatou taumafaiga uma, ia tatou manatua e faataitai le mana o le afioga a le Atua, lea o loo ia i tatou.

Tolu, i le tusi a Helamana tatou te faitau ai, “Ioe, ua tatou vaai e mafai e soo se tasi e manao i ai ona piimau i luga i le afioga a le Atua, lea ua vave ma mamana, lea o le a veteina ai le poto leaga ma mailei ma fuafuaga uma a le tiapolo, ma taitai atu ai le tagata o Keriso i le ala lauitiiti ma vaapiapi, i luga atu o le vanu pagatia … ma faatulaueleele ai o latou agaga … i le aao taumatau o le Atua i le malo o le lagi.”14 Pe o e saili e veteina le poto leaga ma mailei ma fuafuaga uma a le tiapolo ia ua matuā fuaaoina ai filosofia o ō tatou taimi? Pe o e manao e faamatafi ‘ese le ao o le fenumia’i ona o le soona anoanoa’i o faamatalaga ia mafai ai ona taulai patino atili ai i le ala o feagaiga? Faamolemole faataitai i le mana o le afioga a le Atua.

I le avea ai ma se tasi na suia e le mana o le afioga a le Atua, ou te molimau patino atu ai i lenei mea moni, na matuā matagofie ona aoao mai e lo tatou perofeta pele, o Peresitene Russell M. Nelson: “Ia te a’u, o le mana o le Tusi a Mamona e aupito iloagofie i le suiga tele e oo mai i olaga o i latou o e faitau i ai ‘ma se loto faamaoni, ma le faamoemoega tonu, ma le faatuatua ia Keriso.’ E toatele tagata liliu mai ua lafoai mea e tele sa pele ia i latou ina ia ola ai i mataupu o lena tusi. … O le a avea ma au meafaigaluega e sili ona aoga e aumaia ai agaga ia Iesu le Keriso.”15

O Le Punavai o le Mana

I nei faapupulaga ma isi, tatou te molimauina ai le mana o le afioga a le Atua i olaga o Ana fanau. Atonu tatou te fesili, o le a le punavai o lena mana po o le malosiaga?

A o tatou manatunatu i lenei fesili, e tatau ona manatua o le fasifuaitau “o le afioga” e pei ona faaaoga i tusitusiga paia, e itiiti ifo ma le lua ona faauigaga. Na aoao mai talu ai nei e Elder David A. Bednar e faapea “o se tasi o suafa o Iesu Keriso ‘O Le Upu’” ma “o aoaoga a le Faaola o loo tusifaamaumau i tusitusiga paia, ‘o le upu po o le afioga’” lea.16

Na faapupula mai e le perofeta o Nifae le sootaga i le va o nei faauigaga e lua ina ua ia tusia: “Ia outou faalogologo i nei upu ma talitonu ia Keriso; ma afai tou te lē talitonu i nei upu ia outou talitonu ia Keriso. Ma afai tou te talitonu ia Keriso o le a outou talitonu i nei upu, ona o afioga i latou a Keriso, ma sa tuu mai i latou e ia ia te aʼu.”17 O lea ua tatou aoao ai e faapea e i ai moni lava le mana i upu a perofeta anamua ma ona po nei aua o a latou upu o afioga ia a le Alii.18 A’u uo pele, o le taliaina o lenei upumoni faavavau, e taua tele i lo tatou ola ai faaleagaga i aso e gata ai19 i le taimi, e pei ona sa valoia, “o le a oo mai se oge i le nuu, e le o se oge i mea e ai, po o se galala i le fia inu vai, a o le oge i le faalogologo i afioga a Ieova.”20

O le tumutumuga lava ia, o le mana o le afioga a le Atua o le Alii o Iesu Keriso.21 A tatou malamalama atili atoatoa i lenei mea, e mafai ona tatou faia se sootaga taua e faavavau i le va o le matafaioi a Ana perofeta ma le Togiola lava Ia. O lo tatou alolofa mo Ia, lo tatou naunau e faalatalata atili ia te Ia, ma tumau i Lona alofa,22 o le a musuia ai i tatou e faataitai le mana o le afioga i o tatou olaga—o le mana lea e tafe mai ia te Ia o lo tatou Faaola patino ma le Togiola23 ma le mana lea e tafe mai ia te Ia e ala i upu a “ipu filifilia a le Alii.”24 O le a oo ina tatou iloatino e faapea, po o le a le aoga o isi faapogai ia tatou suesuega o le Faaola ma upu a Ana perofeta, e le tatau lava ona suitulaga na mea ia i latou. E tatau ona tatou matuai feinu soo,25 sa’o mai le punavai.26

E momoli atu o’u alofaaga ia te outou taitoatasi, o’u uso e ma tuafafine. I lena alofa, ou te aioi atu ai ia te outou ia outou iloa le mana o le afioga a le Atua, aemaise e ala i le Tusi a Mamona, i aso uma o lo outou ola. A o tou faia o lea, o le a outou lagonaina lenei folafolaga faaperofeta mai ia Peresitene Russell M. Nelson: “Ou te folafola atu a outou suesueina ma le agaga tatalo le Tusi a Mamona i aso uma, o le a outou faia ni faaiuga lelei atu—i aso uma. Ou te folafola atu a outou mafaufau loloto i mea tou te suesueina, o le a matala mai pupuni o le lagi, ma o le a outou mauaina tali i a outou lava fesili ma le taitaiga mo o outou lava olaga. Ou te folafola atu a e faatofuina oe lava i le Tusi a Mamona i aso taitasi, e mafai ona puipuia oe mai mea leaga o le aso.”27

Ou te molimau atu ua tuuina mai e lo tatou Tama Faalelagi ia i tatou le afioga aua e alofa atoatoa o Ia ia te i tatou, ma e finagalo ia taitasi i tatou ma toe foi atu ma mau faatasi ma Ia e faavavau i le aiga. Ou te molimau atu na “liutino tagata … le Upu,”28 o Iesu le Keriso, ma Lona mana e laveai ai ma togiolaina i tatou. Ua ou iloa e tafe mai Lona mana e ala mai i upu a Ana perofeta, i le tuanai ma le taimi nei.

O le tatalo o lo’u loto ia tatou maua le poto ma le agamalu e pipiimau ai29 i le afioga a le Atua ma tutumau ai i luga o le ala o feagaiga lea e tau atu i le faaeaga ma le ola e faavavau.30 Talosia ia faaauau pea ona tatou iloa ma maua le suiga tele o loo avanoa mo i tatou taitoatasi e ala i le mana o le Afioga.31 I le suafa o Iesu Keriso, amene.

Faamatalaga

  1. Tagai Alema 30:59.

  2. Tagai i le Alema 31:3.

  3. Tagai i le Alema 28:2.

  4. Alema 31:4. Faamolemole manatua na i ai talu ai ia Alema ma lona nuu se “fesootaiga” i le va o sa Amilikī ma sa Lamana, lea na tau atu i le faanoanoaga tele ma le toilalo (tagai i le Alema 2:21–38; 3:1–3).

  5. Alema 31:8.

  6. Alema 31:1.

  7. Alema 31:2.

  8. Tagai i le Mamona 8:34-35.

  9. Alema 31:5; faaopoopo le faamamafa.

  10. Tagai, mo se faataitaiga i le, 1 Nifae 15:24; Alema 32:41–43; 36:26; 37:8, 44–45.

  11. Russell M. Nelson, “Fetaiai ma le Lumanai i le Faatuatua,” Liahona, Nov 2020, 76.

  12. Alema 5:7; faaopoopo le faamamafa.

  13. Alema 26:13; faaopoopo le faamamafa.

  14. Helamana 3:29–30; faaopoopo le faamamafa.

  15. Russell M. Nelson, “O Le Tusi a Mamona: O Se Vavega Ofoofogia” (saunoaga na tuuina atu i le semina mo peresitene o misiona fou, 23 Iuni, 2016), o loo sii mai ai ni vaega o le Moronae 10:4.

  16. David A. Bednar, “Peitai Sa Matou Le Amanaiaina i Latou,” Liahona, Me 2022, 16.

  17. 2 Nifae 33:10; faaopoopo le faamamafa.

  18. Tagai i le Mataupu Faavae ma Feagaiga 1:38.

  19. Tagai i le Mataupu Faavae ma Feagaiga 1:14–18.

  20. Amosa 8:11.

  21. Tagai i le Alema 34:6.

  22. Tagai i le Ioane 15:10.

  23. Tagai i le Mareko 5:25–34.

  24. Moronae 7:31.

  25. “O loo i ai se auala e sili atu ona lelei e saunia ai, aua e le umi se taimi e faaaoga ai lena faatuatua tele [pe a le galueaina]. E mafai ona tatou filifili e faaauau le suesueina o afioga a Keriso i tusitusiga paia ma aoaoga a perofeta soifua. O le mea lenei o le a ou faia. O le a ou toe foi i le Tusi a Mamona ma sailiili loloto e le aunoa i ai” (Henry B. Eyring, “Sauniuniga Faaleagaga: Ia Vave Amata ma Ia Tumau Ai,” Liahona, Nov. 2005, 39).

  26. “Mo a’u, o le faitauina o tusitusiga paia e le o se tulimataiga faaleatamai. Ae, o se mataupu o le alofa i le afioga a le Alii ma ana perofeta. …

    “Ou te le popole tele e faitau tusi ia ua tusia e faamalamalama mai ai mea na o loo maua i tusitusiga paia. Nai lo o lena, e sili ia te au le uai atu o lo’u mafaufau i le puna o na upu, ma tofo i le vai mama o le puna o le upu moni—o le afioga lea a le Atua e pei ona ia tuuina mai, ma pei ona toe fuataiina mai i tusi ua latou talia o tusitusiga paia. O le faitauina o tusitusiga paia, e mafai ai ona tatou maua le faamaoniga a le Agaga e faapea, o mea sa tatou faitauina e sau lea mai le Atua mo le faamalamalamaina, faamanuiaina, ma le olioli o ana fanau” (Gordon B. Hinckley, “Ia Fiafia i Tusitusiga Paia,” Liahona, Iun. 1986, 2).

  27. Tagai ia Russell M. Nelson, “O Le Tusi a Mamona: Faamata e Faape’i Lou Olaga e aunoa ma Ia?,” Liahona, Nov. 2017, 60.

  28. Ioane 1:14.

  29. Tagai i le 1 Nifae 8:30.

  30. “O le ala o feagaiga ua na o le pau lea o le ala e tau atu i le faaeaga ma le ola e faavavau” (Russell M. Nelson, “O Le Mana o le Malosiaga Faaleagaga,” Liahona, Me 2022, 98).

  31. Tagai i le Alema 5:11–13.