Mga Tumong, Paglambo, ug Pag-uswag—Bag-o nga mga Mensahe gikan sa mga Propeta ug Apostoles

“Ako sigurado nga daghan ninyo ang naggahin og panahon karon aron sa pagsulat sa inyong mga resolusyon alang sa umaabot nga tuig. Mahimo ba akong mohimo og pipila ka sugyot?

“Una, pagresolbar sa pagpalig-on sa inyong espirituhanong pundasyon. Kini mahimong maglakip sa paggahin og piho nga oras ug dapit sa pagtuon sa mga kasulatan, pag-ampo sa kanunay, paghimo sa pagsimba sa templo nga usa ka mas dako nga prayoridad, ug paghimo sa Dios nga mopatigbabaw sa tanang aspeto sa inyong kinabuhi.

“Ikaduha, pagresolbar nga magmabination sa uban. Sa dihang ang Manluluwas nga si Jesukristo mibisita sa Amerika, sama sa nahisulat diha sa Basahon ni Mormon, usa sa unang mga butang nga Iyang gitudlo mao nga kinahanglang wagtangon ang panagbingkil sa atong kinabuhi. Busa, palihog magmaloloy-on, magmasinabtanon, dili maghukom dayon, ug dali nga mopasaylo.

“Ikatulo, pagresolbar nga mahimong bug-os. Ang Ginoo ganahan og paningkamot. Ang Ginoo ganahan og pagkamakanunayon. Ang Ginoo ganahan og pagkamahugtanon. Samtang kita sigurado nga masipyat matag karon ug unya, ang atong makanunayon nga mga paningkamot sa pagpaminaw Kaniya ug pagsunod sa pag-aghat nga Iyang gihatag kanato makatabang kanato nga ‘magmalig-on diha sa Espiritu’ (Mosiah 18:26).

“Hinaot nga ang Dios mopanalangin kaninyo, akong minahal nga mga higala, ug unta kini mahimong maanindot nga tuig sa katuyoan ug mga posibilidad alang kanatong tanan.”

“Sa tanan nakong batan-on nga mga higala, ako manghinaot nga kamo makasabot sa kabililhon sa pagpaningkamot sa pagkab-ot ug pagdawat og mas taas nga edukasyon, ug ako manghinaot nga kamo makat-on gikan sa akong pagmahay.

“Sa dihang ako mikuha og mga kurso sa negosyo gikan sa mga propesor sa unibersidad, akong naamgohan nga mas dako ang akong kinitaan kay sa kinitaan sa mga magtutudlo. Ako, sa akong hunahuna, usa ka medyo maayo nga tigbaligya. Ako nakahinumdom nga naghunahuna: ‘Kon moundang ko og eskwela ug himoon ang tanang paningkamot sa pagpamaligya, mahimo gayod ko nga makabarog sa pinansiyal nga paagi.’

“Mora og resonable kato nga hunahuna niadtong higayona. Ug mao nga wala nako gihuman ang akong kataposang tuig sa kolehiyo. Ako nagbasol niana nga desisyon sa tibuok nakong kinabuhi.

“Kinsay nasayod kon unsa pa kaha nga laing mga oportunidad ang moabot nako kon gihuman pa nako kadto nga kataposang tuig sa eskwelahan. Kamo sa kanunay nag-atubang og importante nga mga desisyon kabahin sa mga pakigrelasyon, trabaho, ug eskwela, ug tingali dili kamo makahibalo sa eksakto nga mga lakang nga himoon sa umaabot. Ang pagkompleto sa inyong edukasyon makaseguro nga kadto nga mga lakang mogiya kaninyo diha sa usa ka maayo nga direksiyon.

“Kon mahimo ninyo, ako moawhag ninyo sa paghimo sa usa ka kurso nga importante nga elemento sa inyong plano sa kinabuhi. Ang Dios mopanalangin kanato sa pagsugod ug pagtapos og usa ka butang nga makahagit kanato.”

“Samtang ang usa ka bag-o nga tuig magsugod, kinahanglan maningkamot kita nga makabenepisyo gikan sa talan-awon sa unsay nangagi. Ako nangamuyo kaninyo sa paghinumdom nga ang nangagi pagakat-onan, apan dili pagapuy-an. Kita molingi sa kagahapon aron sa pagkat-on sa positibong butang gikan sa mga kasinatian ug dili ang mga negatibo.

“Ug kon kita makakat-on kon unsa ang kinahanglan nga makat-onan ug atong gibuhat ang atong labing maayo sa atong nasinati, dayon kita molantaw sa unahan ug mohinumdom nga ang hugot nga pagtuo kanunay nagtumong ngadto sa umaabot. Ang hugot nga pagtuo kanunayng adunay kalabotan sa mga panalangin ug sa mga kamatuoran ug sa mga panghitabo nga mobunga pa og maayong mga resulta sa atong kinabuhi.

“Tingali ang uban kaninyo naghunahuna—ilabi na samtang magpuyo kita latas sa inadlaw nga kagubot sa kalibotan sa atong palibot karon—‘Aduna pa kahay bisan unsang kaugmaon alang kanako?’ Unsay anaa sa bag-ong tuig alang kanako? Luwas ra ba kaha ko? Mamaayo ra ba ang kinabuhi? Ako ba makasalig sa Ginoo ug sa umaabot?

“Palihog hinumdomi kini: ang hugot nga pagtuo nagsalig nga ang Dios adunay talagsaon nga mga butang nga giandam alang sa matag usa kanato ug si Kristo mao ang tinud-anay nga ‘labawng sacerdote sa mga maayong butang nga nanagpangabot’ [Mga Hebreohanon 9:11].

“Ipabilin nga nakatutok ang inyong mga mata sa inyong mga damgo, bisan dugay ug layo pa. Pagpakabuhi aron makita ang mga milagro sa paghinulsol ug pagpasaylo, sa pagsalig ug balaanon nga gugma nga mopausab sa inyong kinabuhi karon, ugma, ug hangtod sa kahangtoran. Kana mao ang New Year’s resolution nga akong gihangyo kaninyo nga tumanon.”

Imahe

Si Kristo nagtudlo sa Iyang mga disipulo

“Akong nakat-onan sayo sa kinabuhi, nga dili na kinahanglan nga maghulat og bag-ong tuig aron adunay bag-ong pagsugod sa akong personal nga kinabuhi. Sa matag bag-o nga adlaw, moabot ang bag-o nga kadlawon—dili lamang alang sa kalibotan apan alang usab kaninyo ug kanako. Ug sa matag bag-o nga adlaw moabot ang bag-o nga pagsugod—usa ka kahigayonan sa pagsugod og usab ug likayan ang kapeligro sa paglangay-langay.

“Adunay mga higayon sa akong kinabuhi nga ako dili makatulog sa mga gabii nga nakigbisog sa mga problema, mga kabalaka o personal nga mga kaguol. Apan bisan unsa pa kangitngit ang gabii, ako kanunay nga nadasig sa hunahuna nga ‘sa pagkabuntag mobanos ang kalipay’ (tan-awa sa Salmo 30:5).

“Ang mga kasulatan misaad, ‘Dili gayod molubad ang gugma sa Ginoo; ug walay kinutoban ang iyang kaluoy; bag-o kini adlaw-adlaw’ (Mga Pagbangotan 3:22–23, Maayong Balita Biblia). Ug ang Ginoo midapit kanato nga ‘ipadan-ag ang inyong kahayag … aron makita nila ang inyong mga maayong buhat ug daygon nila ang inyong Amahan nga atua sa langit’ (Mateo 5:16, Maayong Balita Biblia).

“Niining umaabot nga mga adlaw, mga semana, ug mga bulan, bisan unsa pa kini kalisod, ang gugma sa Dios ug ang bunga sa Espiritu makapagahom nato nga makatabang niadtong anaa sa atong palibot (pamilya, mga higala, tanang tawo) ug tabangan sila nga mas makalahutay sa ilang mahagiton nga mga sirkumstansiya. ‘Apan ang Espiritu naghatag sa gugma, kalipay, kalinaw, pailob, kaluoy, kaayo, pagkamaminatud-on, pagkamapaubsanon, ug pagkamapinugnganon sa kaugalingon. Kining mga butanga wala mahisupak sa bisan unsang balaod‘ (Mga Taga-Galacia 5:22–23, Maayong Balita Biblia).”

“Bisan pa man sa nangagi nga mga kasakit sa kasingkasing, ang matag usa kanato makasugod pag-usab. … Kita makasugod pag-usab tungod kay ang atong Langitnong Amahan mao ang Dios sa bag-o nga mga sinugdanan.

“Matag adlaw, matag oras, mahimong usa ka bag-o nga pagsugod—usa ka oportunidad sa pagbag-o sa atong mga kaugalingon diha sa Balaang Espiritu. Ang kalooy sa Dios igo aron sa pag-ayo sa atong mga samad, modasig kanato sa pagpadayon sa unahan, molimpyo kanato sa sala, molig-on kanato alang sa mga moabot nga mga pagsulay, ug mopanalangin kanato sa paglaom ug Iyang kalinaw. Kini usa ka mensahe nga kinahanglan nga madungog sa tanan nga anak sa Dios.”

“Si Fred Astaire usa ka ilado nga aktor, mananayaw, ug mag-aawit sa American cinema. Siya nahimong bida sa dinosena nga mga pasundayag sa Broadway ug Hollywood. Usa sa iyang una nga mga awdisyon gitimbang-timbang niini nga mga pulong: ‘Dili makamao nga moarte. Opaw og gamay. Makasayaw og gamay.’

“Dili kaayo positibo nga report!

“Pinaagi sa pagpadayon ug kakugi, napalambo niya ang iyang mga abilidad hangtod nga siya nahimong usa sa labing bantogan nga tigpasundayag sa tibuok panahon—nailhan tungod sa iyang ‘pagka-ambongan, pagkasuwabe molihok, pagka-orihinal, ug pagkatukma.’

“Dili lamang siya ang nag-inusara nga nakigbisog sa pagduda sa kaugalingon o milahutay sa pagsaway.

“Si Walt Disney gitaktak gikan sa usa ka pahayagan tungod kay siya ‘nagkulang sa imahinasyon ug walay maayo nga mga ideya.’

“Si Vincent Van Gogh nakabaligya og gamay ra kaayo nga mga painting sa dihang siya buhi pa—daghan niini ngadto sa pamilya ug suod nga mga higala.

“Si Ernest Hemingway makausa nakadawat og pahibalo sa pagsalikway gikan sa usa ka editor kinsa nakakita nga ang iyang sinulat ‘makapalaay ug makapasakit,’ nag-ingon, ‘Ang akong batan-ong anak nga lalaki makahimo og mas maayo pa!’

“Tingali makita nato ang atong mga kaugalingon nga mas menos pa sa kon unsa kita. Dili takos. Walay talento. Walay butang nga espesyal. Kulang sa kasingkasing, hunahuna, mga kapanguhaan, karisma, o pamarog aron mas magamit sa Dios.

“Miingon ka nga dili ka perpekto? “Dili igo ang imong kamaayo? Daghan na ta!

“Ikaw na tingali ang tawo nga gipangita sa Dios.

“Ang Dios wala magkinahanglan nga ikaw mahimong talagsaon, labi na nga hingpit.

“Siya mokuha sa imong mga talento ug mga abilidad ug mopadaghan niini—bisan pa man kon kini mora og daginoton sama sa pipila ka pan ug mga isda. Kon ikaw mosalig Kaniya ug magmatinud-anon, Siya mopalambo sa imong mga pulong ug mga lihok ug mogamit niini aron sa pagpanalangin ug pagpangalagad ngadto sa katawhan!”

“Usahay kita mamalandong sa atong tanang mga responsibilidad sa panimalay, eskwelahan, trabaho, ug sa simbahan ug maghunahuna unsaon nga atong makab-ot ang pagbalanse sa daghang nag-indigay nga mga panginahanglan sa atong panahon. Imbis nga pugson ang atong kaugalingon nga maningkamot sa pagbuhat sa tanan sa samang higayon, kinahanglan nga atong ilhon ang pipila ka importanting mga butang nga mao ang atong labing taas nga mga prayoridad. Dayon kita makapaningkamot sa paghatag sa matag usa niini sa pagtagad nga gikinahanglan niini—tagsa-tagsa sa matag higayon.

“Kon ikaw anaa sa panimalay, pilia nga himoon ang panimalay nga prayoridad. Kon ikaw anaa sa eskwelahan, pilia nga himoon ang eskwelahan nga prayoridad. Kon ikaw anaa sa trabaho, pilia nga himoon ang trabaho nga prayoridad. Kon ikaw nagsimba diha sa panimalay o sa simbahan, pilia nga himoon ang pagsimba nga prayoridad.

“Morag yano ra paminawon, apan kinahanglan nga dili kita mapungot ug mag-usik sa paningkamot ug panahon sa pagsulay sa pagkab-ot og hingpit nga balanse sa tanang importante nga mga butang nga kinahanglan nga atong buhaton. Kon sinsero kitang mag-ampo alang sa tabang sa Dios sa pag-ila unsay labing importante, Siya mogiya ug motabang nato sa pagtutok sa atong mga paningkamot matag adlaw.”

“Akong naobserbahan sa akong kinabuhi ug sa kinabuhi sa ubang tawo ang daghang nagtuyok-tuyok nga mga panghitabo—kapakyasan ug kalamposan, kagul-anan ug kalipay, pagkaguba ug pag-ayo, trahedya ug kadaogan, panagbingkil ug panaghiusa, kasagmuyo ug katagbawan, ug dili maihap nga uban pa.

“Apan kon karon, uban sa tabang sa Dios, kita makat-on gikan sa kapakyasan, dayon kita makaangkon og mas dako nga kalamposan samtang kita mopadayon sa unahan.

“Kon karon, uban sa tabang sa Dios, atong mabuntog ang kagul-anan, nan kita makasinati og mas dakong kalipay samtang kita mopadayon sa pagserbisyo ug pagtahod Kaniya.

“Ug kon karon, uban sa tabang sa Dios, kita makasugakod og maayo sa mga kasamtangan nga kasagmuyo, nan kita mahimong mapanalanginan sa pagdawat og mahangtorong katagbawan.

“Ang yawe mao ang paghinumdom sa kanunay sa kabantog ug kaayo sa Dios—ug pag-ila sa atong pagsalig ngadto Kaniya alang sa direksyon ug kalig-on diha sa atong indibidwal nga mga kinabuhi.

“Ang akong pagdapit ngadto kaninyong tanan—batan-on ug tigulang—mao ang paghigugma sa Dios ug sa inyong mga silingan, pag-amuma alang niadto nga nanginahanglan, ug kanunay nga ipadayon ang mahangtoron nga panglantaw kabahin sa plano sa Dios sa kalipay—usa ka panglantaw nga moabot lapas pa sa temporaryo nga mga pagsulay ug kasamok sa mortal nga kinabuhi.”

“Ang kagustohan nga molampos mahimong mosangpot sa mahinungdanon nga mga nabuhat. Sigurado, kini makapagahom ug makapamunga og nindot nga mga ganti ug mga kontribusyon ngadto sa kalipay niadtong imong gihigugma ug gani sa katilingban sa kinatibuk-an. Sa hilabihan, hinoon, nabug-atan pag-ayo sa imong kaugalingon nga mga gilaoman o gituohan nga gilaoman sa uban, kini mosangpot sa kabalaka, pagkaperpeksiyonista, o depresyon ug mahimong makapabug-at sa kaminyoon, pamilya, serbisyo sa uban, ug gani sa Kristohanong pagkadisipulo. Unsaon nimo pagseguro nga makaani og positibo nga mga resulta ug makalikay sa negatibo diha sa imong kinabuhi?

“Gikan sa akong kaugalingong kasinatian, ako makaingon nga kini klaro: sunda ang duha ka dako nga sugo, ug sa gihatag nga han-ay sa prayoridad—‘Higugmaa ang Ginoo nga imong Dios sa tibuok nimo nga kasingkasing, ug sa tibuok nimo nga kalag, ug sa tibuok nimo nga hunahuna. Kini mao ang dako ug unang sugo. “Ug ang ikaduha sulosama ra, Higugmaa ang imong silingan sama sa imong kaugalingon.’ Ang paghigugma ug pagsunod ni Jesukristo mohatag og katuyoan, kaangayan, ug kahulogan sa imong kinabuhi. Kini mosentro sa imong kinabuhi diha sa serbisyo.”

Imahe

monyeka nga adunay wala tiwasa og pintal nga nawong

“Ang Daruma nga monyeka usa ka gipangga nga simbolo sa kulturang Hapon sa maayong swerte ug paglahutay. Kini gigamit sa pagtakda og mga tumong ug pagsaulog sa katumanan ug kalamposan. Kon adunay usa ka tawo nga mopasalig sa usa ka tumong, ilang koloran ang usa ka mata ug mangayo og balaanong tabang aron makab-ot kini. Human nga makab-ot ang tumong, ilang koloran ang pikas isip timaan sa pagpasalamat.

“Samtang ang atong mga tumong sa bag-ong tuig mahimong maglakip sa paglambo sa pisikal o temporal nga paagi, ako moawhag kaninyo sa pagpakigtambag sa inyong Amahan sa Langit ug usab pagtakda og makahuloganong personal nga espirituhanong mga tumong. Mga tumong nga molig-on sa inyong pundasyon ug hugot nga pagtuo ni Jesukristo. Palihog hinumdomi nga magpasalamat Kaniya, Siya ang tighatag sa tanang maayo nga mga gasa.”

“Kamo tingali mobati nga nabug-atan sa tanang butang nga gusto ninyong palamboon samtang kini nga bag-ong tuig magsugod. Palihog pagmapailobon ug pagmasinabtanon sa inyong kaugalingon.

“Kanunay natong gilisod-lisod pag-ayo ang atong kaugalingon. Ang Ginoo midapit kanato sa pagduol kon unsa kita, sa paghimo sa tanang mga butang ‘diha sa kaalam ug kahusay’ [Mosiah 4:27]. Wala Siya maglaom nga kita modagan og paspas nga labaw pa kay sa atong kusog, basta kita makugihon ug maisogon”

“Sa usa ka okasyon, ang Manluluwas Mismo miingon: ‘Busa, unsa nga matang sa mga tawo kamo mahisama? Sa pagkatinuod Ako moingon nganha kaninyo, gani sama nga Ako mao’ [3 Nephi 27:27]. Kini nga pagkahingpit sigurado nga dili moabot hangtod nga kita mahidangat sa pikas nga bahin sa tabil. Pinaagi sa Iyang mga propeta, ang Ginoo nagdapit kanato sa pagpangita og mga paagi nga mapalambo ang atong mga kaugalingon, dili dihadiha dayon, apan pagtulon-an human sa usa ka pagtulon-an.

“Ang tabang nga atong madawat gikan sa Ginoo diha sa atong mga tumong ug matarong nga mga paningkamot walay kinutoban, ug Siya mosuporta kanato sa bisan unsang maayo ug matarong nga paningkamot. Ang akong tibuok kinabuhi nga tawag isip usa sa Iyang espesyal nga mga saksi nakadugang og mas daghang kusog sa akong determinasyon nga magpadayon sa paghimo og mga paglambo sa nagkadaiyang dapit sa akong kinabuhi aron mahimong mas sama kang Kristo. Matag paningkamot nga mahimong mas sama Kaniya mopadugang sa atong espirituhanong kapasidad sa pagserbisyo Kaniya. Kita mahimong kanunay nga magmapasalamaton ngadto sa Ginoo alang sa tabang nga Iyang gihatag kanato sa paghimo og personal nga mga kalamboan. Sa akong bahin, layo pa kaayo ang akong latason. Apan ako nakahimo na og pag-uswag, sa ginagmay, uban sa hingpit nga kalipay ug pagpasalamat!

“Ako modapit kaninyo sa pagkonsiderar og mga paagi sa pagsunod sa matarong nga mga tinguha sa inyong kaugalingon nga kinabuhi, bisan unsa pa ang inyong kahimtang. Ipasalig ko kaninyo nga ang Ginoo nahigugma sa matag usa kanato ug Siya anaa kanunay sa pagtabang kanato, bisan unsa pa man ang sitwasyon nga atong giatubang.”