Fet long Jisas Kraes

Pikja

ol pikinini mo ol yut oli kam tugeta raon long wan buk

?Wanem Nao Hem I Fet?

Fet hem i wan strong bilif o tras long wan samting. Blong gat fet hem i blong gat hop mo bilif long ol samting se oli tru, iven sapos yumi no save luk olgeta o andastanem olgeta fulwan (luk long Hibrus 11:1; Alma 32:21).

Pikja

Pikja blong Jisas Kraes

Ol ditel long Kraes mo Yangfala Rij Man, i kam long Heinrich Hoffman

Fet we Jisas Kraes I Stap long Medel

Jisas Kraes i mas stap long medel blong fet blong yumi olsem Sevya mo Ridima blong yumi we i save sevem yumi. Blong gat fet long Jisas Kraes i minim blong gat tras long Hem. Hem i minim se yumi mas trastem Hem fulwan—trastem paoa, waes tingting mo lav blong Hem. Hemia i minim tu blong biliv mo folem ol tijing blong Hem.

Pikja

kapol oli stap stadi long ol skripja

Mekem Fet blong Yumi I Kam Antap

Fet i wan presen we i kam long God, be yumi mas lukaotem mo wok from blong holemtaet i stap strong. Yumi save mekem fet blong yumi i kam antap taem yumi prea mo stadi skripja mo ol tijing blong ol lata-dei profet. Yumi save mekem fet blong yumi i kam strong taem yumi stap laef long stret mo gud fasin mo kipim ol kavenan blong yumi.

Fet i moa bitim blong bilif nomo. We i tekem aksen folem bilif ia. Yumi soem fet blong yumi long wei we yumi stap laef long hem. Fet long Jisas Kraes i save lidim yumi blong folem eksampol blong Hem we i stret gud evriwan. Fet blong yumi i lidim yumi blong obei ol komanmen, sakem sin blong yumi, mo mekem mo kipim ol kavenan.

Pikja

Jisas i mekem wan blaenman i lukluk bakegen

Fet I Save Lidim Yumi i go long Ol Merikel

Tru fet i mekem ol merikel, we i tekem ol visen, ol drim, ol hiling, mo ol narafala presen we oli kam long God. Ol skripja oli gat fulap stori blong ol pipol we oli kasem merikel we i kam long Lod from fet blong olgeta long Hem. Luk long “Merikel” long Gaed long Ol Skripja blong luk ol narafala eksampol.

Blong gat fet long God mo long plan ia blong sevem man bae i save givim paoa long yumi long taem blong ol jalenj blong yumi. Fet i save givim yumi paoa blong wokbaot i go fored mo fesem ol hadtaem wetem strong paoa long tingting. Iven sapos yu no sua abaot fiuja blong yu, fet blong yumi long Sevya i save givim pis long yumi.

Pikja

papa i holem smol pikinini blong hem mo tufala stap lukluk peinting pikja blong Jisas

Fet long Jisas Kraes I Lidim Yumi blong Kasem Laef we I No Save Finis

Taem yumi praktisim fet long Kraes, bae i lidim yumi blong kasem laef we i no save finis. Kraes i mekem rere wei blong yumi blong kasem laef we i no save finis. Taem yumi stap laef folem fet we yumi gat long Hem, yumi save kasem fogivnes from ol sin blong yumi mo bae yumi gobak stap wetem God bakegen.