Erekyɛ Jesus Christ Asɛmpa no

Mfonyin

Jesus retsen nsa kɔ banyin yarfo do

Dɔ Nkaafo

Erekyɛ asɛmpa no ne fã a ohia kɛse nye erodɔ nkaafo. Sɛ yedua Christ-su ndzeyɛɛ do dze kyerɛ hɛn dɔ ma nkaafo a, nna yɛrekyɛ Jesus Christ N’asɛmpa no—ɔtɔfabi a yɛnnkã asɛm kor mpo. Na sɛ nkaafo no hu dɛ yɛdwen hɔnho ampaara a, wobue hɔn akoma mu dze tsie hɛn adwen nsusuii wɔ asɛmpa no ho. (Hwɛ Gary E. Stevenson, “Love, Share, Invite,” Liahona, Esusow Aketseaba 2022, 84–87.)

Yebotum akyɛ dza yɛpɛ no wɔ asɛmpa no ho. Ber a yɛyɛ iyi dɛ hɛn daa daa abrabɔ ne fã bi no, ɔrennyɛ dzen anaa ahokyer. Mfatoho, yebotum nye hɛn ebusua na anyɛnkofo akasa afa dza yɛyɛ no Kwesida ho. Anaa yebotum akã enyigye a yenya ber a yɛsom binom no akyerɛ hɔn. (Hwɛ Dieter F. Uchtdorf, “Missionary Work: Sharing What Is in Your Heart,” Liahona,, Esusow Aketseaba 2019, 15–18.)

Yebotum ato nsa afrɛ nkaafo ma woebosũa asɛmpa no ho nsɛm ara yie. Mfatoho, yebotum ato nsa afrɛ hɔn ma wɔaba Asɔr nhyiamu anaa dwumadzi bi, akenkan Mormon Nwoma no, wɔahwɛ Asɔr video bi, anaa woehyia asɛmpasomafo no. Sũahu yinom botum aboa hɔn ma wɔatse Sunsum no ne nkã na wɔapɛ dɛ wobosũa bi akã ho.

Mfonyin

mbaa mpanyimfo beenu a wɔtsena ase rekasa

Hom Mbisa mfa Hɔn Sũaho ho

Anyɛnkofo na ebusua mu mba aba asɔr anaa wɔnye asɛmpasomafo no ayɛ adzesuadze ekyir no, yebotum ebisa hɔn afa hɔn sũahu ho nsɛm. Asɛmpa nkyerɛkyerɛ no mu binom bɛyɛ adze fofor ama hɔn, ntsi yebotum eyi nsɛmbisa biara a wɔwɔ no ano ama hɔn. Yebotum akyerɛ hɛn dɔ na abamba wɔ hɔn mbɔdzembɔ ho dɛ wɔbɛba Christ nkyɛn.

Yɛdze obu ma dza binom gye dzi na ɔsom hɛn bo, na yɛbɔ mbɔdzen dɛ yɛdze bi bɛkã dza wɔagye edzi dadaw no ho. Mfatoho, nyɛnko bi a oenya ahotɔ wɔ Bible mu kyerɛwsɛm bi ho no botum enya ahotɔ wɔ nkyerɛkyerɛ a yɛkyɛ fi Mormon Nwoma mu no ho.

Mfonyin

nkataasia a wɔroboa ɔbaa panyin ma oetwa stiitsi mu

Hom Mboa Asɔrmba Afoforfo

Sɛ nkorɔfo bɔdɔm Asɔr no a, yebotum aboa ahyɛ hɔn gyedzi dzen. Yebotum ayɛ hɔn anyɛnkofo, eyiyi hɔn nsɛmbisa ano, na yɛama hɔn abamba ber a wɔgye ɔfrɛ horow no. Yebotum ahyɛ hɔn nkuran ma wɔakɔ do akã Jesus Christ do na woesũa N’asɛmpa ho nsɛm.

Mfonyin

asɛmpasomafo elderfo beenu na banyin bi a wɔabɔ mu rohwɛ foon do

Som Etuhoakyɛ Asɛmpakã Dwuma

Dza ɔkã yɛrekyɛ asɛmpa no wɔ hɛn daa daa abrabɔ mu ho nye, wobotum afrɛ Asɔrmba ma wɔasom dɛ etuhoakyɛ asɛmpakã dwumayɛfo. Sɛ wɔayɛ ahoboa a, mberantsɛ botum asom ber a woedzi mfe 18 rokɔ. Nkataasia na mbaa mpanyimfo so botum asom. Ibotum enya ho nsɛm mbordo efi ChurchofJesusChrist.org/callings/missionary.