« ភាពខ្លួនទីពឹងខ្លួនពង្រឹងដល់យើង » ទស្សនាវដ្តី លីអាហូណា ខែ សីហា ឆ្នាំ ២០២៣ ។
សារលិខិតទស្សនាវដ្តី លីអាហូណា ប្រចាំខែ ខែ សីហា ឆ្នាំ ២០២៣
ភាពខ្លួនទីពឹងខ្លួនពង្រឹងដល់យើង
ការមានភាពខ្លួនទីពឹងខ្លួនមានន័យថាយើងអាចមើលថែរចំពោះតម្រូវការរបស់ខ្លួនឯង និងក្រុមគ្រួសាររបស់យើងបាន ។ នៅពេលយើងមានភាពខ្លួនទីពឹងខ្លួន នោះយើងក៏អាចបម្រើព្រះអម្ចាស់ និងមើលថែអ្នកដទៃបានកាន់តែប្រសើរថែមទៀតផង ។ ប៉ុន្តែភាពខ្លួនទីពឹងខ្លួនមិនមែនមានន័យថា យើងត្រូវប្រឈមមុខនឹងឧបសគ្គរបស់យើងតែម្នាក់ឯងនោះទេ ។ យើងអាចសុំជំនួយមកពីមិត្តភក្តិ គ្រួសារ សមាជិកក្នុងវួដ ឬសាខា និងអ្នកជំនាញនានានៅពេលយើងត្រូវការផងដែរ ។
គោលការណ៍ភាពខ្លួនទីពឹងខ្លួន
ការក្លាយខ្លួនជាអ្នកមានភាពខ្លួនទីពឹងខ្លួន តម្រូវឲ្យមានការអប់រំ ការគោរពប្រតិបត្តិ និងការខិតខំប្រឹងប្រែង ។ យើងខំឲ្យអស់ពីសមត្ថភាពដើម្បីមើលថែខ្លួនឯង ហើយយើងអាចសុំជំនួយពីអ្នកដទៃនៅពេលចាំបាច់ ។ ទោះជាយ៉ាងណាក៏ដោយ ដើម្បីក្លាយជាមនុស្សដែលមានភាពខ្លួនទីពឹងខ្លួនពិតប្រាកដ នោះយើងក៏ត្រូវតែរៀនមានជំនឿលើព្រះយេស៊ូវគ្រីស្ទផងដែរ ។ បន្ទាប់មកនៅពេលយើងធ្វើការដើម្បីជួយខ្លួនយើង នោះទ្រង់នឹងពង្រឹងដល់យើង ។
ភាពខ្លួនទីពឹងខ្លួនខាងវិញ្ញាណ
យើងអាចកសាងភាពខ្លួនទីពឹងខ្លួនខាងវិញ្ញាណរបស់យើងដោយការធ្វើការដើម្បីពង្រឹងទីបន្ទាល់របស់យើងអំពីព្រះយេស៊ូវគ្រីស្ទ ។ យើងធ្វើបែបនេះនៅពេលយើងអធិស្ឋាន សិក្សាគម្ពីរ ចូលរួមនៅក្នុងសាសនាចក្រ គោរពតាមបញ្ញត្តិ និងធ្វើកិច្ចការផ្សេងៗទៀតដែលនាំយើងឲ្យខិតទៅជិតព្រះគ្រីស្ទ ។ ការដឹងថាទ្រង់នឹងជួយដល់យើង នោះនឹងផ្ដល់សេចក្ដីជំនឿដល់យើងឲ្យនៅរឹងមាំទោះជាជីវិតលំបាកក៏ដោយ ។
ភាពខ្លួនទីពឹងខ្លួនបណ្តោះអាសន្ន
ភាពខ្លួនទីពឹងខ្លួនបណ្តោះអាសន្នរួមបញ្ចូលទាំងការចេះមើលថែរលើតម្រូវការខាងរាងកាយរបស់ខ្លួនឯង និងក្រុមគ្រួសាររបស់យើង ។ នេះរួមមាន អាហារ លំនៅដ្ឋាន សុខភាព និងតម្រូវការផ្សេងៗទៀត ។ យើងធ្វើបែបនេះដោយការទទួលបានការអប់រំល្អ ការរៀនសូត្រ ឬការពង្រីកជំនាញដែលចាំបាច់នានា ការខិតខំប្រឹងប្រែង ការប្រើពេលវេលារបស់យើងដោយឈ្លាសវៃ និងការគ្រប់គ្រងលុយរបស់យើងបានល្អ
ភាពខ្លួនទីពឹងខ្លួនខាងអារម្មណ៍
ភាពខ្លួនទីពឹងខ្លួនខាងខាងអារម្មណ៍ គឺជាសមត្ថភាពក្នុងការសម្របខ្លួនទៅនឹងបញ្ហាផ្លូវចិត្តដោយភាពក្លាហាន និងជំនឿ ។ យើងទាំងអស់គ្នាមានបញ្ហា និងឧបសគ្គនានា ។ អរគុណចំពោះដំណឹងល្អ ដែលយើងដឹងថាយើងអាចជ្រើសរើសរបៀបឆ្លើយតបទៅនឹងឧបសគ្គទាំងនោះ ។ ការឆ្លើយតបដោយសេចក្តីជំនឿលើព្រះអម្ចាស់បង្កើនសមត្ថភាពរបស់យើង នៅក្នុងការប្រឈមមុខទៅនឹងការលំបាកផ្សេងៗទៀតដោយមានសេចក្ដីសង្ឃឹមកាន់តែច្រើន ។
ការអប់រំ
យើងគួរតែរៀនជានិច្ច ។ ព្រះចង់ឲ្យយើងអប់រំគំនិតរបស់យើង និងបង្កើនជំនាញរបស់យើងពេញមួយជីវិតនេះ និងជីវិតបន្ទាប់ទៀត ។ យើងកាន់តែរៀន នោះយើងអាចមានឥទ្ធិពល និងផ្តល់ប្រយោជន៍ដល់ខ្លួនឯង គ្រួសាររបស់យើង និងអ្នកដែលខ្វះខាតកាន់តែច្រើន ។
ពរជ័យនៃការធ្វើជាអ្នកមានភាពខ្លួនទីពឹងខ្លួន
ពួកព្យាការីបានបង្រៀនថានៅពេលយើងកែលម្អភាពខ្លួនទីពឹងខ្លួនរបស់យើង នោះយើងនឹងទទួលបានពរជាមួយនឹងសេចក្តីសង្ឃឹម និងសេចក្ដីសុខសាន្តកាន់តែខ្លាំងឡើង ។ យើងនឹងអាចជួយដល់ក្រុមគ្រួសាររបស់យើង និងអ្នកដទៃដែលខ្វះខាតបាន ។ ហើយយើងនឹងទទួលបានពរដោយមានឱកាសកាន់តែច្រើន និងមានសមត្ថភាពដើម្បីបន្តរីកចម្រើន ។
ធនធានរបស់សាសនាចក្រ
ស្តេករបស់បងប្អូនអាចមានក្រុមភាពខ្លួនទីពឹងខ្លួន ។ ក្រុមទាំងនេះអាចបង្រៀនបងប្អុនអំពីគោលការណ៍នៃភាពខ្លួនទីពឹងខ្លួន និងជំនាញនានា ដូចជាការគ្រប់គ្រងលុយរបស់បងប្អូន ឬការស្វែងរកការងារល្អប្រសើរជាងនេះ ។ បងប្អូនអាចរកឃើញធនធានដែលទាក់ទងទាំងនេះនៅក្នុងបណ្ណាល័យដំណឹងល្អ ។ ជ្រើសរើស « សៀវភៅ និងមេរៀន » បន្ទាប់មក « ភាពខ្លួនទីពឹងខ្លួន » ។
©២០២៣by Intellectual Reserve, Inc. All rights reserved. បោះពុម្ពនៅ ស.រ.អា. ។ ការអនុម័តជាភាសាអង់គ្លេស ៖ ៦/១៩ ។ ការអនុម័តឲ្យបកប្រែ ៖៦/១៩ ។ ការបកប្រែនៃ Monthly Liahona Message, August 2023.Language.19046 258