’Imi i te hāro’aro’ara’a

Hōho’a

te vahine ’e te lamepa hinu

Fa’ahōho’ara’a nā Emily Jones

Tā tātou fā ’a ’imi ai tātou i te hāro’aro’a i te ’evanelia a Iesu Mesia, ’o te fa’arahi ïa i te fa’aro’o i te Atua ’e i tāna fa’anahora’a hanahana nō te ’oa’oa ’e ia Iesu Mesia ’e i tāna tusia tāra’ehara ’e nō te fa’atupu i te fa’afāriura’a hope’a ’ore. Nā te reira fa’aro’o rahi ’e te fa’afāriura’a e tauturu ia tātou ’ia rave ’e ’ia ha’apa’o i te mau fafaura’a i te Atua, ’o tē ha’apūai i tō tātou hina’aro ’ia pe’e ia Iesu ’e ’o tē fa’atupu i te hō’ē tauira’a vārua rahi i roto ia tātou. Nā teie tauira’a e hōro’a ia tātou i te hō’ē orara’a hau atu i te ’oa’oa, ’e te faufa’a atu, ’e te maita’i, ’e e tauturu ia tātou ’ia tāpe’a noa i te hi’ora’a ātea mure ’ore.

Hōho’a

e tamaiti e tai’o ra i te pāpa’ira’a mo’a

Nō te fa’atupu i te reira, ’ia vai noa tātou i roto ia Iesu Mesia nā roto i te utuhira’a ia tātou iho i roto i te mau pāpa’ira’a mo’a, ma te ’oa’oa i roto ia rātou, ma te ’ite i tāna ha’api’ira’a tumu ’e ma te tūtava i te ora mai iāna ato’a i ora na. I reira noa tātou e ’ite ai iāna ’e e fa’aro’o ai i tōna reo, ma te ’ite ē, mai te mea e haere mai tātou iāna ra ’e e ti’aturi iāna, e ’ore roa ïa tātou e po’ia ’e e ’ore ato’a e po’ihā (hi’o Ioane 6:35).

Hōho’a

e tamāroa tē pure ra

E’ita te reira e tupu noa nā roto i te pea. E ’ere i te ’ohipa ’ōhie te fa’atanotanora’a ia tātou i ni’a i te mau fa’aurura’a teitei a’e o te paieti ; tītauhia ’ia pi’i i te Atua ’e ’ia ha’api’i nāhea i te fa’atae i te ’evanelia a Iesu Mesia i te pū o tō tātou orara’a.

Hōho’a

e tamāhine e tāpe’a ra i tōna māfatu

Tē fa’a’ite pāpū nei au ia ’outou ē, mai te mea ē, e ’imi tātou i te rāve’a nō te hāro’aro’a i te ’evanelia a Iesu Mesia ma te tu’utu’u ore, ma te ’ā’au ato’a, ma te pāpū, ’e ma te parauti’a, ’e mai te mea e ha’api’i atu tātou i te reira i te tahi ’e te tahi ma te ’ōpuara’a mau ’e i raro a’e i te fa’aurura’a a te Vārua, e nehenehe teie mau ha’api’ira’a e taui i te ’ā’au ’e e fa’auru i te hō’ē hina’aro ’ia ora mai te au i te mau parau mau a te Atua.