« ការរៀបចំសាសនាចក្រនៃព្រះយេស៊ូវគ្រីស្ទ » លីអាហូណា ខែ តុលា ឆ្នាំ ២០២៣ ។
សារលិខិតប្រចាំខែទស្សនាវដ្ដី លីអាហូណា ខែ តុលា ឆ្នាំ ២០២៣
ការរៀបចំសាសនាចក្រនៃព្រះយេស៊ូវគ្រីស្ទ
ព្រះយេស៊ូវគ្រីស្ទគឺជាព្រះសិរសានៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ទ្រង់បំផុសគំនិតដល់ពួកព្យាការី និងពួកសាវកដើម្បីដឹកនាំ សាសនាចក្រនៅសព្វថ្ងៃនេះ ដូចជាទ្រង់បានធ្វើនៅសម័យព្រះគម្ពីរសញ្ញាថ្មី ។ ថ្នាក់ដឹកនាំសាសនាចក្រដទៃទៀតជួយដល់ពួកលោក ។
សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ គឺជាសាសនាចក្ររបស់ព្រះអង្គសង្រ្គោះ ។ សាសនាចក្រនេះគឺ « ស្អាងឡើងលើជើងជញ្ជាំងនៃពួកសាវក និងពួកហោរា ហើយព្រះយេស៊ូវគ្រីស្ទនោះឯង ទ្រង់ជាថ្មជ្រុងយ៉ាងឯក » ( អេភេសូរ ២:២០ ) ។ ការណ៍នេះមានន័យថា ទ្រង់គឺជាផ្នែកដ៏សំខាន់បំផុតនៃគ្រឹះនេះ ។ ទ្រង់ដឹកនាំសាសនាចក្រនេះតាមរយៈពួកព្យាការី និងពួកសាវក ដែលទ្រង់បានជ្រើសរើសដើម្បីធ្វើជាអ្នកដឹកនាំ ។
គណៈប្រធានទីមួយ
ប្រធានសាសនាចក្រគឺជាព្យាការីរបស់ព្រះនៅលើផែនដីសព្វថ្ងៃនេះ ។ លោកគឺជាសាវករៀមច្បង និងជាបុគ្គលតែម្នាក់គត់នៅលើផែនដី ដែលទទួលវិវរណៈដើម្បីដឹកនាំសាសនាចក្រទាំងមូល ។ ព្រះអម្ចាស់បំផុសគំនិតលោកឲ្យដឹងថា តើសាវកពីររូបទៀតណាដែលត្រូវហៅឲ្យបម្រើជាទីប្រឹក្សារបស់លោក ។ ពួកលោកបង្កើតជាគណៈប្រធានទីមួយ ។ ពួកលោកទាំងបីរូបគឺជាព្យាការី អ្នកមើលឆុត និងជាអ្នកទទួលវិវរណៈ ។
កូរ៉ុមនៃពួកសាវកដប់ពីរនាក់
សមាជិកទាំងឡាយក្នុងកូរ៉ុមនៃពួកសាវកដប់ពីរនាក់ ក៏ជាព្យាការី អ្នកមើលឆុត និង អ្នកទទួលវិវរណៈផងដែរ ។ ពួកលោកត្រូវបានហៅឲ្យបម្រើជាសាក្សីពិសេសរបស់ព្រះយេស៊ូវគ្រីស្ទ ។ ពួកលោកធ្វើដំណើរពេញទូទាំងពិភពលោកដើម្បីបង្រៀន និងថ្លែងទីបន្ទាល់អំពីទ្រង់ ។ ( សូមមើល គោលលទ្ធិ និងសេចក្ដីសញ្ញា ១០៧:២៣, ៣៣ ) ។
កូរ៉ុមនៃពួកចិតសិបនាក់
សមាជិកនៃក្រុមពួកចិតសិបនាក់គឺត្រូវបានហៅជាសាក្សីនៃព្រះយេស៊ូវគ្រីស្ទ ( សូមមើល គោលលទ្ធិ និងសេចក្តីសញ្ញា ១០៧:២៥ ) ។ ពួកលោកជួយកូរ៉ុមនៃពួកសាវកដប់ពីរនាក់បង្រៀនដំណឹងល្អ និងស្ថាបនាសាសនាចក្រនៅទូទាំងពិភពលោក ។
រូបថតដោយ ម៉ាកឈីកូ ហ័រី
ថ្នាក់ដឹកនំាក្នុងមូលដ្ឋាន
គណៈប្រធានស្តេក ឬគណៈប្រធានមណ្ឌលរបស់អ្នក គណៈប៊ីស្សព ឬគណៈប្រធានសាខា និងគណៈប្រធានអែលឌើរកូរ៉ុម និងគណៈប្រធានសមាគមសង្រ្គោះក៏ព្រះជាអ្នកហៅផងដែរ ។ ពួកគាត់អាចជួយអ្នករៀន និងរស់នៅតាមដំណឹងល្អ ។ អ្នកអាចរៀនអំពីការហៅទាំងនេះនៅក្នុងអត្ថបទមូលដ្ឋានគ្រឹះនៃដំណឹងល្អ នៅក្នុង ខែ មីនា ឆ្នាំ ២០២២ « ការបម្រើនៅក្នុងការហៅរបស់សាសនាចក្រ » ។
© 2023 by Intellectual Reserve, Inc. All rights reserved. បោះពុម្ពនៅ ស.រ.អា. ។ ការអនុម័តជាភាសាអង់គ្លេស ៖ ៦/១៩ ។ ការអនុម័តឲ្យបកប្រែ ៖ ៦/១៩ ។ ការបកប្រែនៃ Monthly Liahona Message, October 2023. Language. 19048 258