“Unsa man ang RelasyontTali sa Pagka-orden nang daan ug sa Kabubut-on?,” Liahona, Okt. 2023.
Dali, Sunod Kanako
Unsa man ang Relasyon tali sa Pagka-orden nang daan ug sa Kabubut-on?
Diha sa kinabuhi sa wala pa dinhi sa yuta, ang Manluluwas ug ang uban nga mga lider gi-orden nang daan ngadto sa ilang mga misyon sa yuta.
Paghulagway pinaagi ni Jim Madsen
Si Pablo misulti sa mga taga-Efeso nga sila pinili sa Dios nga mamahimong Iyang katawhan, “sa wala pa buhata ang kalibotan gipili na kita sa Dios diha kang Kristo” (Mga Taga-Efeso 1:4). Sa kinabuhi nga wala pa dinhi sa yuta, ang Dios mipili, o mi-orden nang daan, og mga tawo sa pagtuman og piho nga mga misyon sa ilang mga kinabuhi. Nagpasabot ba kana nga ang atong mga kinabuhi dili maapektohan sa atong mga pagpili?
Ang Papel sa Gi-orden nang daan
Ang mga propeta ug ang Manluluwas gi-orden nang daan sa wala pa sila matawo (tan-awa sa Jeremias 1:5; Pinadayag 13:8; 1 Nephi 10:7–8; Abraham 3:22–23), ug “ang doktrina kabahin sa gi-orden nang daan magamit ngadto sa tanang miyembro sa Simbahan.”1 Apan kana wala magpasabot nga kita garantisado sa mga panalangin. Sa sukwahi, kita gisaaran og piho nga mga panalangin sumala sa atong hugot nga pagtuo sa Dios ug sa pagkamasulundon sa Iyang mga sugo.
Ang Papel sa Kabubut-on
Ang Dios mihatag kanato sa kabubut-on, “ang abilidad ug kahigayonan nga gihatag sa Dios kanato sa pagpili ug paglihok alang sa atong kaugalingon.”2 Ang Dios nakakita sa atong potensiyal ug nasayod sa mga sangpotanan sa atong mga lihok. Apan anaa ra kanato ang pagpili sa dalan sa pagkadisipulo nga modala kanato balik ngadto Kaniya.
“Ang gi-orden nang daan wala mogarantiya nga ang mga indibidwal makadawat sa pihong mga calling o mga responsibilidad. Ang maong mga oportunidad moabot niining kinabuhia isip resulta sa matarong nga paggamit sa kabubut-on, sama nga ang gi-orden nang daan miabot isip resulta sa pagkamatarong didto sa kinabuhi nga wala pa dinhi sa yuta”3