Erom̧ juon Rikam̧ool

Pija

Moronai ej kwaļo̧k n̄an Mary Whitmer gold pileij ko

Mary Whitmer im Moronai, jān Robert Pack

Ilo spring ilo 1829, Mary im Peter Whitmer raar karuwaineneik Josep im Em̧m̧a Smith im Oliver Cowdery n̄an m̧weo im̧weer bwe jerbal in ukook eo an pileij gold ko en dedeļo̧k. Jerbal ko an Mary tōre ko rekar eļļap. Eaar oņake ruatimjuon armej ilo m̧weo im̧ōn make im bar jipan̄ ajri ro nejin me em̧ōj aer m̧arre me rej jokwe epaak.

Ļōm̧aro ļalem nejin Mary im ļōm̧aro nej nejin (tokālik) raar bar kam̧ool kōn pileij gold ko ilo Juun 1829. Ilo ejja allōn̄ eo wōt, Mary eaar bōk juon an make kam̧ool.

Nabōj in m̧weo im̧ōn, juon em̧m̧aan euwaņ bōran ilo juon pāāk ioon aeran ej itok ippān Mary im ba, “eta in Moronai. Āinwōt kolukkuun m̧ōk kōn aolep jerbal ko kwoj kōm̧m̧ani.” Do̧o̧r laļļo̧k pāāk eo jen aeran, Moronai eaar ba, “ebwe am̧ lukkuun tiljek im kijenmej ilo jerbal ko am̧. Kōn menin, ekkar, bwe kwon bōk juon kam̧ool bwe am̧ tōmak en kajoorļo̧k.” Innām eaar kwaļo̧k kobban pāāk eo an—pileij gold ko.¹

Mary eaar erom̧ juon rikam̧ool kōn pileij gold ko, āinwōt Rikam̧ool ro Jilu im Rikam̧ool ro Ruwalitōk, me naan in kam̧ool ko aer repād ilo kadkad in peij ko ilo Bok in Mormon. Ettā im tiljek eo an Mary eaar kepooj e bwe en juon rikam̧ool. Naan in kam̧ool eo an ekar jab jeje ilo kadkad in peij ko ilo Bok in Mormon, im etan ekar jab jeje ioon peij ko, bok ko, ak ilo kōļmenļo̧kjeņ an elōn̄ ro Rekwojarjar ro raar itok ālkin. Men̄e jipan̄ ko an ilo m̧weo im baam̧le raar jab emejaja jen elōn̄ armej, rekar emejaja ippān Anij.

Elder Dieter F. Uchtdorf jān Doulul eo an Jon̄oulruo Rijilōk ro eaar katakin:

“Irooj elukkuun oktak an ekajet jān ad kōm̧m̧ane. E ej m̧ōņōņō ippān ro rikarejeran, ejjab eo ej make kautiej e.

“Ro rej ettā ilo mour in renaaj kōņak kūrawūn in aiboojoj ilo mour eo juon.”²

Lo̧o̧k eo an Moronai em̧ōj an ukook ilo Bok in Mormon, im jemaron̄ bōk juon kam̧ool kōn m̧ool ko kar lo̧o̧ki ekkar n̄an kallim̧ur eo an Moronai eaar likūti ilo peij ko āliktata: “Im n̄e kom̧ naaj būki men kein, ikōņaan kōketak kom̧ bwe kom̧in kajjitōk ippān Anij, Jemān Indeeo, ilo etan Jisōs Kraist, eļan̄n̄e men kein rej jab m̧ool, im eļan̄n̄e kom̧ naaj kajjitōk kōn juōn bōro em̧ool, kōn lukkuun kōttōpar, im ewōr tōmak ilo Kraist, Enaaj kwaļok mool in nan kom̧, jān kajoor eo an Jetōb Kwojarjar” (Moronai 10:4).

Kwoj ke en̄jake āinwōt n̄e eddodo ko am̧ reļļap ak edik kile kijejeto ko am̧? Jemedwōj Ilan̄ ejeļā kajjiem̧, im E ejeļā em̧m̧an eo kwoj kōm̧man. Ilo am̧ kōm̧m̧an em̧m̧an (lale Jerbal 10:38), jerbal ilo ejjeļo̧k kam̧m̧olol, im kappukot jeje ko rekwojarjar, Jetōb Kwojarjar emaron̄ kapen m̧ool eo an gospel in n̄an eok.