“O Se Faifeautalai i Taimi Uma,” Liahona, Ian. 2024.
E Manatua E Le Mo Le Malosi o le Autalavou
O Se Faifeautalai I Taimi Uma
E Manatua Pea Peresitene M. Russell Ballard
A o auauna ai o se faifeautalai talavou i Egelani, sa i ai se aafiaga o Peresitene M. Russell Ballard na suia ai lona olaga e faavavau.
“Ou te manatua lo’u savali ai i autafa o le Vaitafe o Trent i Nottingham, Egelani. …
“A o ou savalivali i autafa o le vaitafe, . … sa ou faia se tatalo i lo’u loto. Sa ou manao ia lagonaina sina taitaiga mai le Alii. Sa ou aioi atu ia fiafia o Ia i le mea sa ou taumafai e fai. Sa ou fesili atu, ‘O ou faia ea le mea e te finagalo ai?’”1
“Sa oo mai i o’u luga se lagona lofituina o le filemu ma le malamalama. O le taimi tonu lava lena na ou iloa ai na silafia a’u e Iesu Keriso, [ma] e alofa o Ia ia te a’u, … Ou te le’i vaai i ni faaaliga ma ou te le’i faalogo i ni leo, ae sa semanu ou te le iloaina le moni ma le paia o Keriso pe ana faapea e tu mai o Ia i o’u luma ma valaau mai i lo’u igoa.
“Sa mamanuina lo’u olaga e lena aafiaga. Mai lena aso e oo mai i le asō, o faaiuga taua uma ua ou faia sa tosinaina i lo’u malamalama e uiga i le Faaola.”2
O lenei malamalama na mafai ai e Peresitene Ballard ona saunoa atu ma le lototoa o se molimau faapitoa a le Alii o Iesu Keriso. Sa ia aoao mai i tatou, e ala i faataitaiga ma molimau, le ala e “tutulai a’e ai, ia lava le lelei, ma ia saunia atoatoa e auauna atu i le Alii.”3
O Peresitene Ballard i Georgetown, Massachusetts, ISA, i le aso 13 o Me, 2022.
O Se Fiafia e Faasoa Atu le Talalelei
Soo se mea lava na ia alu i ai, sa faamuamua lava e Peresitene Ballard le faasoaina atu o le talalelei. “O le tala’iina o le Toefuataiga o le talalelei sa faapitoa lava ia te a’u i taimi uma,” o lana tala lea. “Sa ou fiafia e avea o se faifeautalai i Egelani. Sa ou fiafia i le avea ai ma se peresitene o le misiona i Kanata. Ma ou te fiafia i lo’u valaauga i le taimi nei [o se uso o le Korama a Aposetolo e Toasefululua], lea e mafai ai ona ou maua avanoa e faasoa atu ai le savali o le Toefuataiga o le talalelei i le lalolagi.”4
Na aoao mai Peresitene Ballard e mafai e i tatou uma ona faasoa atu le talalelei toefuataiina a Iesu Keriso i le na o le “avea ma ni tuaoi lelei ma e ala foi i le manatu i isi ma le faaalia o le alofa. … Ma a tatou faia faapea, o le a tatou faasusulu atu le talalelei i o tatou lava olaga, ma o le a susulu atu i [isi] faamanuiaga o loo ofoina mai e le talalelei.”5
O lo tatou alolofa mo le Alii ma isi o le a “taialaina ai i tatou i le faasoaina atu o le talalelei i tagata o aiga, uo, tuaoi, paaga faipisinisi, ma soo se isi lava tagata tatou te fetaiai a o tatou ola ai i le olaga.”6
Matou Te Manaomia Oe i le Taimi Nei!
Na aoao mai Peresitene Ballard e te le tau faatali e avea ma se faifeautalai faamisiona e amata faasoa atu ai le talalelei. Na ia tautino mai, “Ua manaomia e le Ekalesia o tatou talavou i le taimi nei. Ua manaomia oe e le Alii i le taimi nei!”7
“O le galuega aupito taua lenei e mafai ona tatou auai ai,”8 na aoao mai ai Peresitene Ballard. “Ia lagonaina lou leo i le folafolaina atu o le savali sili ma le mamalu o le Toefuataiga o le atoaga o le talalelei e faavavau a Iesu Keriso.”9