Kuv Yog Yexus Khetos Ib tug Thwj Tim

Daim Duab

2024 lub cim txog cov Tub Hluas Ntxhais Hluas lub Ntsiab Lus

Koj puas tau xav txog vim li cas tom qab Yexus kho neeg mob, Nws tau hais rau ib txhia kom lawv tsis txhob qhia leej twg (saib Malakaus 7:36)? Tej zaum yog vim nws xav tau ib co neeg uas muaj cwj pwm li Nws. Tej zaum koj yuav xav tias yog tib neeg tau hais txog qhov uas Yexus kho lawv zoo ces yuav zoo rau Yexus vim yuav muaj neeg coob xav coj raws li Nws. Tiam sis, Yexus tsis xav tau cov neeg uas coj raws li Nws xwb. Nws xav tau cov thwj tim.

Yexus hais rau Petus thiab Adales tias, “Los nrog kuv mus” (Mathais 4:19). Joseph Smith Kev Txhais nqe ntawd hais tias, “Kuv yog tus uas cov yaj saub tau sau hais txog; los nrog kuv mus” (Joseph Smith Kev Txhais, Mathais 4:18 [nyob hauv Mathais 4:19, lub cim a]). Nws tsis caw lawv lam nrog Nws nyob ib chim xwb. Nws xav kom lawv ua Nws cov thwj tim tas mus li.

Nws tsis xav kom lawv saib Nws qhia neeg, hlub neeg, thiab ua tej txuj ci tseem ceeb xwb. Nws xav kom lawv ua li ntawd thiab. Nws xav kom lawv ua Nws txoj hauj lwm. Kev xaiv Yexus Khetos txhais tias lawv yuav kawm pab lwm tus ib yam li Nws pab lawv thiab xav zoo li Nws xav. Lawv yuav xyaum ua neej raws li Nws ua, thiab Nws yuav qhia lawv thiab pab lawv hloov los ua neeg zoo li Nws ntxiv.

Daim Duab

Yexus Khetos

Lo lus Kilis rau ib tug thwj tim yog mathetes. Lo lus no tsis yog ib tug uas kawm ntawv los yog ib tug uas coj raws li lwm tus xwb. Lo lus no txhais tias yog ib tug uas xyaum ua hauj lwm. Nyob rau hauv Yexus Khetos lub caij nyoog, cov thwj tim tau xaiv tus xib hwb uas lawv xav kom qhia lawv vim lawv lub hom phiaj yog kev hloov los ua ib tug xib hwb thiab. Yexus Khetos tsis tau ua raws li lwm tus ua. Nws twb hloov kab lig kev cai thiab nrhiav tau Nws cov thwj tim. Hnub no, Yexus Khetos hu kom peb los cuag Nws. Nws hu kom peb los ua Nws cov thwj tim thiab tshaj tawm Nws txoj lus rau Nws cov neeg kom lawv yuav muaj txoj sia uas kav ntev mus ib txhis (saib 3 Nifais 5:13).

Ib tug ntxhais hluas nyob hauv Haiti hauv cheeb tsam Caribbean qhia tias nws xav ua Khetos tus thwj tim thaum nws caw nws tus phooj ywg uas tsis yog ib tug mej zeej ntawm lub Koom Txoos nrog nws mus rau lub rooj sab laj FSY. Thaum xub thawj nws tus phooj ywg txiv tsis xav tso cai rau nws tus ntxhais mus. Cov thawj coj hauv lub Koom Txoos piav tias nws tus ntxhais yuav muaj tej lub sij hawm zoo siab thiab cov pab cuam uas yog cov tub hluas ntxhais hluas zoo yuav saib xyuas nws tus ntxhais. Tus txiv tsev no tso cai rau nws tus ntxhais mus, thiab tom qab pom tias nws tus ntxhais lub neej twb hloov, nws kuj tso cai rau nws tus ntxhais mus koom lub Koom Txoos tej kev sib ntsib thiab—rau lub hlis tom qab ntawd—ua kev cai raus dej.

Ib tug tub hluas hauv Argentina nyob hauv cheeb tsam Amelikas Qab Teb qhia tias nws xav ua Khetos ib tug thwj tim thaum nws muab ib co khoom qab zib faib rau ib tug phooj ywg thaum lawv caij npav mus kawm ntawv. Thaum pom ib lub uas lawv muab kasfes ua, nws piav tias nws tsis tau sim kasfes vim tias tsis muaj leej twg nyob hauv nws tsev neeg uas haus. Ua rau nkawd sib tham txog lub Koom Txoos, ces twb muab nws tus phooj ywg caw los koom tej kev sib ntsib, es nws tus phooj ywg tau koom lub Koom Txoos thiab ua ib tug tub txib nyob hauv lub teb chaws Chile.

Tsis yog txhua tus uas koj qhia txog lub Koom Txoos los yog caw lawv los koom tej yam ntxim saib ntxim ua hauv lub Koom Txoos yuav xav tuaj. Tsis ua li cas. Tsis yog txhua tus uas Yexus Khetos qhia hauv lub ntiaj teb no tau nrog Nws koom ua ke thiab. Tiam sis, thaum peb xaiv ua Yexus Khetos cov thwj tim thiab tshaj tawm Nws txoj lus, Nws yuav pab peb ua siab loj thiab muab Vajtswv txoj kev pab rau peb. Peb yuav kawm hloov los ua neeg zoo li Nws, thiab cov thwj tim yeej ua li ntawd.