Ngak a Oltirakl er a Jesus Kristo

siasing/Llecheklel

Llecheklel a 2024 Youth Theme

Ngarngii a tal bla molbedebek el kmo ngera uchul, er a uriul ra lomekungir a rechad, ea Jesus a millekoi ra re bebil er tir me lak el louchais ra rechad (mesa Markus 7:36)? A tara uchul a locha kmo tirkel moltirakl er Ngii el lousbech er tir te ua ngera teletelir el chad. Ke locha momdasu el kmo selsekum ma rechad a mesaod omekungil mlo er tir eng tia ea locha ungil teletael el Jesus a obal mengesuseu ra rechad el moltirakl ra Jesus. Ngdi, a Jesus a dimlak el di lousbech er a re oltirakl er ngii. Ngii a ulusbech er a re mochedal.

A Jesus a millekoi el mora Petrus ma Andrew, “Moltirakl er ngak” (Mateus 4:19). A Joseph Smith Translation er sel bades a kmul kmo, “Ngak ngikel ngii a lulluches el kirel a re profet; moltirakl er ngak” (Joseph Smith Translation, Mateus 4:18 [ra Mateus 4:19, footnote a]). Tial ongit a diak el kuk di bo lobengkel telkib el taem. Ngii a soal tir a bol chedal e loltirakl er Ngii el mo cherechar.

Ngii a dimlak el dil soal a lomes er Ngii lolsisechakl ra rechad, oubeltik el reng ra rechad, e loruul ongasireng. Ngii a mle soal a bo loruul osisiu el tekoi. Ngii a soal urellel a bol lurrerir. A melilt ra Kristo a belkul a kmo temo mesuub el mesiou el di uai Ngii ra losiou e omdasu el uai Ngii sel lomdasu. Te mo melasem el kiei el uai Ngii ra le kiei, e Ngii a mo olsisechakl er tir e mesterir a ngeseu el lousbech el mo merael el di mo uai Ngii.

siasing/Llecheklel

Jesus Kristo

A tekoi er a Greek el oltirakl a mathetes. Ng lmuut el klou a belkul ra oltirakl malechub eng mesuub. Ng blechoel a belkul el mesuub. Sera ltemel a Kristo, ea rultirakl a mle blechoel melilt ra mastang el tir a sorir el mesuub er ngii el omes er sel tara taem e temo mastang. A Kristo a dimlak loltirakl er tial blekeradel. Ngii a mileltii e bai osiik er tirkel moltirakl er Ngii. Chelechal taem, a Kristo a omekedong el me rekid me debo re Ngii. Ngii a oleker er kid el moltirakl er Ngii e omerek a Tekingel mora Rechedal me bol nguu a diak a ulebengelel klengar (mesa 3 Nephi 5:13).

A tal ngeasek el redil ra Haiti ra Caribbean a ulechotii a klemeriar reng el mo oltirakl er a Kristo meng olengit ra sechelil el diak el chedal a Ikelesia me lobengkel el mora ongdibel ra FSY. A kot ea demal a sechelil a dimlak el soal el kongei ra ngelekel mel bong. A re merredel ra Ikelesia a silodii el kirel a ikel lungil blekeradel el mengiil er ngii me tirkel mekekerei el chad el counselors el momtebechel er ngii. Ngkal demal a kilngei ra ngelekel mel bong, ea uriul me lomes ra klekakerous el blal relii ra klengar er ngii, e dirrek el kilngei mel ngara miting ra Ikelesia ea—elolem el buil ruriul— e bol meltecholb.

A tal ngeasek el sechal er a Argentina ra South America a ulechotii a klemeriar reng er ngii el moltirakl ra Kristo el milrous a bebil ra kelel kiande el mora sechelil ra le ngara mlai el mora skuul. Sera bochar sel telib ra kelel el telemtemul a kohi, eng nguluuchais el kmong direkak a tal bol seual a telemtemul leng diak a imol chad er a blil el melim a kohi. Sei ea milchelii a cheldechduch el kirel a Ikelesia, meng mlo uchul a ongit el mora miting, el ngii a milleketek ma sechelil a mlo chedal a Ikelesia e mlo mesiou ra mision er ngii ra Chile.

Ngdiak el bek el chad el mouchais er tir el kirel a Ikelesia malechub kolengit me le bora tekoi ra Ikelesia a sorir el mong. Ngdi Ungil. Ng diak el rokui el chad el Kristo a lulekoi er tir seral temel el mesiou a mle sorir elmo teloi el dirrek. Ng di, sel dolilt el moltirakl ra Jesus Kristo el omerek ra tekingel, Ngii a meskid a klisichel a rengud ma chedaol ngeseu. Kede mesuub el mekerang a bode uai Ngii, e taikid ea rael el roltirakl a mengetmokl er ngii.