Ngehi Emen Tohnpadahk en Sises Krais

Kilel

Kilel en Oaralap en 2024 en Me Pwulopwul kan

Miehier pak kumwail kin medewehda dahme kahrehda, mwurin kamwahuiala aramas akan, Sises kin mahsaniong irail en dehr indahng emen (kilang Mark 7:36)? Ehu kahrepe pahn kak kohsang ni soangen tohnpadahk kan me E ketin kupwurki. Mweihn kumwail kak medewe ma aramas pahn koasiahda mwomwen arail mwahudasang arail soumwahu kan e pahn wia ehu ahl mwahu ohng Sises en kak diar sapwellime sounpapah kan. Ahpw, Sises sohte ketin kupwurkihte sounpapah kan. E ketin anahne tohnpadahk kan.

Sises ketin mahsaniong Piter oh Andru, “Idawehn Ie” (Madiu 4:19). Nan ire tikitik en nan pwuhk en The Joseph Smith Translation e koasoia, “Ih ngei met me soukohp akan intingihdier; idawehn ie” (Joseph Smith Translation, Madiu 4:18 [nan Madiu 4:19, footnote a]). Luhk wet kaidehn ohngete irail en iang Ih ohng ni lepin ansoute. E ketin kupwurki irail en wiahla Sapwellime tohpadahk kohkohlahte.

E sohte kupwurki ira en kilangete Ih ni ah wie padapadahkehng aramas, poakoahng aramas, oh ni ah kin kasalehda manaman kopwuriamwei kan. E ketin kupwurki ira en pil iang wia dahme e kin wia. E ketin kupwurki Sapwellime doadoahk en pil wia arail doadoahk. En pilada Krais wehwehki irail pahn esehla papah duwehte E kin papah oh arail madamadau en pil duwehte Sapwellime madamadau. Irail pahn kaiahnkihda momourki Ah mour, oh E pahn ketin kasukuhlih irail oh ketkiong irail sawas me irail anahne pwe irail en kak duwehla Ih.

Kilel

Sises Krais

Ni lokaiahn Greek irail kin inda tohnpadahk iei mathetes. Kawewehpe iei sikisang sohn idawehn de tohn skuhl. E kin kalapw wehwehki soangen aramas me kin kaskuhlda sang aramas emen oh isepen doadoahk kin tikitik. Ni ansou me Krais ketket sampah, tohnpadahk kan kin pilada sounpadahk me irail kin men kaskuhl sang pwe irail en kak pil wiahla sounpadahk. Krais sohte idawehn soangen pilipil me irail kin wia. E ketin wekidala oh peihn rapahkihda Sapwellime tohnpadahk kan. Rahnwet, Krais kin ketin eker kitail en kohdo Reh. E kin ketin eker kitail en wia Sapwellime tohnpadahk kan oh kalohkihwei Sapwellime mahsen rehn Sapwellime aramas akan pwe irail en kak ahniki mour soutik (kilang 3 Nihpai 5:13).

Peinakapw men sang Haiti nan Caribbean kaselahda ah ineng en men wia emen tohnpadahk en Krais ni ah luke emen kempoakepah me sohte wia tohn Mwomwohdiso en iang ih kohla ni kapokon en FSY. Ni tapio en ah kempoakepahu pahpa sohte mweidada nah serepeino en iang kohla. Kaun akan en Mwomwohdiso ahpw kawewehieng duwen irair kaselel kan me serepeino pahn alehdi oh irail sounkaweid lih pwulopwul mwahu kan me pahn apwahpwalih wasahu. Eri papahu ahpw kiheng mweimwei en iang patehng, oh mwurin ah kilang wekidekla me e ahniki nan ah mour, e pil kiheng mweimwei en kin iang patehng kaudek kan en Mwomwohdiso oh—mwurin sounpwung wenou—e pepdaislahr.

Mwahnakapw men sang Argentina nan South America pil kasalehda ah ineng en wia tohnpadahk en Krais men sang ni ah ehukieng kempoakepah men kene kirahka ni ansou ira iang pwoas kohla skuhl. Ansou me e kilangada ehu kirahka me nemen koahpi, e kawewehda me saik pak ehu e songada nemen koahpi pwe sohte emen nan ah peneinei kin nim koahpi. Met me kahrehda arail tepda koasoia duwen Mwomwohdiso, iei me elehda eh luke en iang patehng kaudek kan, iei me kahrehda kempoakepahu ah iangala Mwomwohdisoh oh wiewia ah misin nan Chile.

Kaidehn aramas koaros me kumwail pahn koasoiahieng duwen Mwomwohdiso de lukehieng en iang kemwekid kan en Mwomwohdiso pahn kin men iangala. E mwahute. Pwe kaidehn koaros me Krais mahseniong nan ansou me E ketin padapadahkseli pohn sampah pil iangala. Ahpw, ni atail pahn pilada en wia tohnpadahk en Sises Krais oh kalohngkiwei Sapwellime mahsen, E pahn ketkiong kitail eimah oh sawas laud. Kitail pahn esehla mwomwen atail pahn kak duwehla Ih, oh iei met me tohnpadahk kan kin wia.