“Tomilang Romad ulan Wuru’ e Binaew,” Liahona, Jan. 2024.
Mulwol ni Ngan Thapeg ko biney e Pul nifen e Liahona ko, January 2024
Tomilang Romad ulan Wuru’ e Binaew
Pi’in nira be’eg fare Babyor ku Mormon u fithik’ e yul’yul’, me fol ko machib riy, me meybil nag mornga’agen era thamiy fare Kan ni Thothup mara gel e mich rok’, ngak fare Tathapeg.
Ya’an e sassing ku fare walagen Jared nib mo’on nge fare ulungi malang ni mat’ rama’en ni yib rok’ Normandy Paulter
Napan ni ku gub pagal, ma i moy e mich rog ko fare Babyor ku Mormon. Ri gu ba’adag fare yat ni mornga’agen fare walagen Jared nib mo’on nge gidii’ rok’ nira milekag gaed ko “banam nni michmicheg”(Ether 2:9).
Napan ni taw ko ngiyal’ ni ngar milekag gaed ulan fare m’uw ni dariy e tamilang riy, ma fare walagen Jared e fith, “Musap, O Somoel, ngam pagmaed nggu thʼaebed e giday ney nib gaaʼ nga barbaʼ u fithikʼ e lumor?” Me gaʼar, fare Somoel ngakʼ, “Mang e gabaʼadag ni nggu rinʼ ni nge yog ni tamilang lan e mʼuw romed?” (Ether 2:22, 23).
Fare walagen Jared e manang ni Somoel e gubin ban’en ma rayag rok’. Manang ni Somoel e ir tabolngin urngin mit e tamilang ni bay. Manag ni Somoel e ke motochiyel nag ngak fapi gidii’ rok’ ni ngar ninged e ayuw ngak ni fa’anra ke tu’uf e ayuw roraed. Ere, gay rogon e mich ngak Somoel, fare walagen Jared e fal’ag rogon 16 i malang ni achig. Ka ga manang ni fith ngak Somoel ni nge math bugili pa’ ko fare ulungi malang, “ni gomanga mat raʼen u fithikʼ e lumor” (Ether 3:4).
Tafney nag ya’an Somoel ni math ko fare ulungi malang e ke par ni bay ko tafney rog napan e yin somm’on ni gu be’eg mornga’agen e biney e chep. Gube guy binem e ya’an ni gowa be buch u powcheg. Sana bachan fare tomilang nike gal’ rama’en e lumor.
Napan e da gur thamiy e Kani ni Thothup, ma dagur ta’areb nigeg ngak e Thothup rok’ Somoel, ma guma thamiy e lumor. Machane napan ni gura be’eg fare Babyor ku Mormon, ma fare tomilang era sul ngog. Fare Babyor ku Mormon e wod fare ulungi malang ni mad Somoel ngay. Ke gal’ kanawo’en e milekag rog ko biney e yafos.
Ba Tomilang ni Darmamus
Wod fapi gidii’ ni ayuweg Somoel ngar bad nga dakean e namg nu Mariken, gadaed gubin nima yib e lumor ngalan e milekag rodaed ko fare falfalaen’ nikan michmicheg ngodaed. Machane Somoel era ayuweg daed ni wod fapi Jaradites nge fapi Nephites. Ra powi’iy daed me tomilang nag e kanawo’ rodaed—ni fa’an gadadra fol ngak, gel nag e mich rodaed ngak, min ning e ayuw ngak.
Somoel e yog ngak Nephi, “Ma kubay gu mang magael romed u lan wuruʼ e binaw; ma bay gu falʼeg e woʼ romed, ni faʼan gimed ra fol ko motochiyel rog; ere, nʼumngin i napʼan ni bay um fol gaed ko motochiyel rog ma bay ni powiʼiymed iyaen ko farengi nam nni michmicheg; ma arame bay mu nanged ni gag e ʼug powiʼiymed” (1 Nephi 17:13).
Somoel e yog ngak Jacob ni walagen Nephi, “Ma gura mang ba tamilang ni gubinfen, ngakʼ e piʼin nra rungʼag e thin rog”(2 Nephi 10:14).
Ko fare Tathapeg, fare profet Abinadi e michmicheg, “I ir fare tamilang nge fare yafos ko fayleng; arragon, ba tamilang ni dariy nʼumngin i napʼan, ni dabiyog ni nge lumor” (Mosiah 16:9).
Ir, e ki micmicheg fare Tathapeg, “I gag e tamilang nge yafos ko fayleng.” Me ul’ul’ ngay, “Musap gaed, i gag fare tamilang; kug dag ba wok nib felʼ ni fan ngomed” (3 Nephi 9:18; 18:16).
Thamiy fare Tomilang
Rib tu’uf e profet rodaed rog, President Russell M. Nelson. Ma kan tawa’ath nigeg ni gube pigpig u charen. Napan nira yib ngalan fare singgil, ma gowa ke gel e tomilang ko fare singgil. Bay fare tomilang ku Kristus rok’.
Fare tomilang ku Kristus e bay ni rib riyul’. Biney e ir “fare thamtham nib thothup, gelngin, fa tin nibe yib rok’ Got ngak Kristus ni’ir e ma pii’ e tomilang ko gubin mit.” Biney e ba tawa’ath nib thothup ni rayag ni nge powi’iy pi fak Got ngak fare Kan ni Thothup nge fare gospel ku Yesus Kristus.1 Be’eg fare Babyor ku Mormon era gel nag e biney e tomilang.
Bochingiyal’ mab tu’uf ni ngad sap gaed nga tomuren e yafos rodaed ni nge pug oran ngoded ko napan ni ayuweg daed be’ ko napan e milekag rodaed. Napan ni gadaedra sap nga tomur, ma rayag ni ngad thamiyed fare gagiyeg ko fare Tathapeg. Napan nira ga’ar fapi chep nib thothup, “Mu tayew u wunʼmew, mu tayew u wunʼmew” (Helaman 5:12), gube tafney nag ni be yog ngodaed, “Gathi kemus ni ngam tay u wun’um e n’en ni gamanang fa kam thamiy, machane mu thamiy e binem e tomilang biyay.
Boch e gidii’, e mom ngoraed ni ngar thamiyed e tomilang nib thothup. Ma boch e gidii’, e momaw’ ngak ni nge thamiy e tomilang nib thothup ni bachan e tin ni yaed be mo’owar riy fa tin nu fayleng ban’en nibe talag raed ko biney. Machane fa’an gadaedra yul’yul’, ma fare tomilang era yib—ko bochingiyal’ nib thil rogon ni gadaed be tafney nag.
President Nelson, nike motochiyel nag ngodaed ni ngad “meybil gaed nag mornga’agen fare Babyor ku Mormon ni gubin e rran,”2 ke dag boch kanawo’en fare Babyor ku Mormon nira chugur nagdaed ngak fare Tathapeg me ayuweg daed ngad thamiyed fare tomilang ko gospel, nangfan fapi riyul’ ko gospel, min fol ko fapi machib ko gospel.
Napan ni gadaedra be’eg fare Babyor ku Mormon, make yog President Nelson, ni llowaen’ rodaed, nge adag rodaed ko fare Bayul rok’ Yesus Kristus era gel.
Ma gadadra thamiy ni gadadra adag ni ngan “gargeleg daed bayay;” (Mosiah 27:25) ni wod fareke babyor nira thilyeg gum’icha’en daed (muguy ko Mosiah 5:2).
Napan ni gadad ra be’eg min fil fapi machib ni mornga’agen e kunuy gidii’en pi yu Isreal ulan fare Babyor ku Mormon, ma gadadra thamiy ni ngad ayuweged e gidii’ rodaed nike yim’ ni ngan rrin’ fapi m’ag u temple nifan ngoraed ni ngeyag ni ngar thap gaed.
Ma gadadra thamiy e tomilang napan ni gadadra thapeg e fulweg ko fapi duwer rodaed, powi’iy daed ko tin ni ngad rrin’ed, nge gelngin daed ni ngad gel gaed ko kireb.
Ma napan ni gadadra be’eg fapi n’en nib riyul’ ulan fare Babyor ku Mormon, ma yira gol nag daed, min pii’ e gapas ngodad, gelngin daed, nge falfalaen’ nifan e dogur rodaed.3
“O ere, biney e gathi riyulʼ?” Alma e fith mornga’agen e tin nib riyul’, nge llowean’, nge mich. Gube gaʼar ngomed, Arragon, ya ba tamilang; ma demutrug banʼen nib tamilang, mab mangil, ya ba tamilang i nangfan, ere thingar mu nanged nib mangil” (Alma 32:35).
Sasing ku Kristus, yib rok’ Heinrich Hofmann
Pire’eg Somoel u fithik’ e Lumor
Napan e ragag e duw ko reb e fagar rog ni kanog i Kamryn ngak, me yib reb e m’ar ngak ni kireb nag bayang ulan e bit mat’aw i tir marwan.4 Bochingiyal’, napan nira gel e amith riy ni rib alamrin, makumus ko tomilang ma be ubchiyaq nag Kamryn ko m’ar rok’. Galibithir rok’ e, yow be rus nag nira ma’ew nag, ere yow ma ning e curten ulan e sigging rok’ ni ngeyag ni fal’ rogon buchu’uw. Chitinngin Kamryn’, ni fithing i Janna, e ga’ar:
“Go napan aningeg e pul nga tomuren nike yib e biney e m’ar ngak, borran riy mug wean ngalan e singgil rok’ ni rib lumor. Napan ni fal’ rogon e changar rog, mug guy Kamryn nib tubugbug u butt’ u daken e bet rok. Be yib e amith ngak ni rib gel ni kumus ko yor ba dabiyag rok’. Kemus nibe par u rom u butt’ nib man l’agruw lanmit nike thow.
“Mug garbug nga barba’ e bet rok’, mug fek’ pa’ ngalan pa’ag, mug dun’uf ni dalip yay—fanathin romow nibe ga’ar, ‘Rigab t’uf rog.’ Ma fulweg nima dun’uf paga’ ni aningeg yay nibe yipfan ni ‘rigab t’uf rog ni bo’or,’ ma yaney e dani rrin’. Bagel ni kari gel e amith rok’. Luu’ nibe map ulan owcheg nga butt’, ni gube guy fakag ni ragag e duw rok’ nib tubugbug ni gawa ya’an e bat’ u butt’. Mari amith gumircha’eg nib gel.”
Janna e meybil ko tafney rok’, meybil ni kari yib u gum’ircha’en.
“Mu gog ngak e Chitamangig ni gu manang ni’ir e manang e gubin, machane mug meybil, ‘Wenig mu ayuweg.’ Napan ni gube par u rom ni gube meybil, mug thamiy ba gapas ni yib nga daken neg. Mug thamiy e gapas me yib ba tafney ngog ni mornga’agen Somoel Yesus Kristus: ‘I ir e tomilang. Pire’eg Somoel u fithik’ e Lumor.’
Me pug Janna lolgen ngalang me kathkath ngak Kamryn: “Thingar mu pire’eg Somoel u fithik’ e lumor.”
Bucu’uw nga tomuren, me mol Kamryn nibe motoyil ko tang ni bay ko hymns nge chep nib thothup ulan fare library ko Galasia.
Napan ni gel e ubchiyaq u owchen, Kamrun e pire’eg Somoel u fithik’ e lumor.
Sassing ni ya’an e tabinaew ku Kamryn
M’ar ku Kamryn e ra par makemus nibe par u singgil, ma napan nira gel e ubchiyaq rok’, ma Janna nge figirngin Janna, ni kanog i Darrin ngak, e yow ma tay e gulgul ko winda rok’. Napan e ngiyal’ nem nib gel e amith rok’, ma Kamryn e ma ga’ar, “Gube pire’eg Somoel u fithik’ e lumor.”5
Nap’an Yafos rodaed e ku wod “bangi wuruʼ e binaw nib lumor ni rib milmor” (1 Nephi 8:4), ma krayag ni ngad pire’eg Somoel u fithik’ e lumor. Gube micheg ni fare Babyor ku Mormon, nge micheg riy, “ni Yesus e ir Kristus, fare Got ni Manechubog,”6 era powi’iy daed i yean Ngak. Gu manang ni pi’in nira be’eg fare Babyor ku Mormon u fithik’ e yul’yul’, me fol ko machib riy, me meybil nag mornga’agen era thamiy fare Kan ni Thothup mara gel e mich rok’, ngak fare Tathapeg.
Daged e magar ko rake “babyor ney ni’ir e th’abi polo’ ko gubin mit e babyor7 ni fa’an yira be’eg, min cha’ariy, mara gel nag e mich rodad nge gidii’ ko fare Tomilang ko Fayleng.
© 2024 ko Intellectual Reserve, Inc. Gubin ni mat’won ma bay. Kan yoloey u Mariken. Kan micheg nag ko thin nu Ngalis: 6/19. Micheg i pilyeg: 6/19. Piliyeg ko Monthly Liahona Message, January 2024.Language.17463 905