Ewe Chon Amanau fan iten Meinisin, eu Kapas Allim fan iten Meinisin

Ewe kapas allimen Jises Kraist afen “niwinsefanito non ei fansoun soponon epwe anisi ekkewe … osupwang ren muu meinisin, einang, sokkun kapas meinisin, me aramas non unusen fonufan.”¹ Ewe kapas allim a no ngeni meinisin aramas seni sokkun fonu me nikinikin aramas nupwen ra feino ngeni oreni meinisin ne afanafana pwe “kich meinisin nono chok ngeni Kot” (2 Nifai 26:33).² Ewe Puken Mormon a eu pisekin pwarata usun ei ennet.

Ei auchean puk a pwarata pwe Kraist a chechemeni muu meinisin (nengeni 2 Nifai 29:7) me epwe pwarano “i ngeni meinisin ekkewe ra nuku non i, … [me fori] pochokunen manaman, esisin, me mettoch mi amwarar, me nein noun aramas” (2 Nifai 26:13). Me nein ekkei amwararen manaman, esisin, me mettoch mi amwarar ina ewe chewnon fetanin ewe kapas allim. Iwe, sia tinano misineri non unusen fonufan pwe repwe pwarata usun ei porous mi murino. Sia pwan pwarata usun ewe kapas ngeni ekkewe chon unukuch. Ewe angangen eniwinato kien pristut ngeni ekkewe mi manau me mi mano a tumunochu pwe unusen ewe kapas allim epwe kawor ngeni emon me emon at me nengin noun samach me inach won nang—me nom, ikenai, non fansoun mwach.

Menapen ei kapas allim—ewe uwanapen porous seni emon me emon soufos me aposel minne ra ko ngeni ewe angang—pwe Jises i ewe Kraist me i A feito epwe efeiochu kich meinisin. Kich sounengin ewe Mwichefenin Jises Kraist ren Aramas mi Pin non Fansoun Soponon, sia pwarata pwe An we fangono manau fan iten unusen fonufan.

Nupwen ua sai fetan non unusen fonufan, Ua fori interfiu ngeni chommong chon ewe Mwichefen. Ua mwar ren ai ausening usun ar memef ren feiochun ewe Achasefan an Jises Kraist non manauer, pwan mwo nupwen ra pwan pwarata ekkoch tipis minen nom. Amwararen met usun pungunon kinamwen enimenimen An Achasefan mi chok fokkun tufich ngeni kich meinisin!

“Mi namot epwe wor achasefan,” Amulek a pwarata, “ika fen aramas meinisin repwe poutmwanino.” Sipwe fokkun “turutiw me … monucheno, … tiwenon chok ika epwe seni ewe achasefan,” minne a otufichi “ew asor feinfeino chok me esemuch.” Iei “minne ese tongeni wor och mettoch minne mi kisikis seni ew achasefan esemuch minne epwe naf fan iten tipisin ewe fonufan” (Alma 34:9, 10, 12).

Ewe soufos murino Jacob a pwan ait ngeni kich pwe pokiten “mano a fis ngeni aramas meinisin, … a auchea epwe wor ew manamanen manausefan” an epwe eniwin ngeni kich fan mesen Kot (2 Nifai 9:6).

A namot sipwe akkufu me ruu tipis me mano. Iei an ewe Chon Amanau angang, minne A pwaracho ne awesano fan iten noun Kot semirit meinisin.

Sasing

Kraist non Gethsemane

Gethsemane, seni J. Kirk Richards, esap wor kapin

An ach we Chon Amanau Fangono Manau

Non saingonon pwinin non manauan won fonufan, Jises Kraist a tonong non ewe Manaman Gethsemane. Ikewe, A fotopwuku nein ekkewe iran onif me poputani an tonong non anonnonen riaffou minne en me ngang sise tongeni weweiti.

Ikewe, A poputani ne wata won Inisin tipisin fonufan. A mefi metek meinisin, netip weires, me netipengaw, nge A engino ngeni meinisin sokkun weires me riaffou meinisin ka mefi, ua mefi, me meinisin aramas mi manau akkom me ekkewe repwe wareto. Ei waten me unusen weires esemuch “efisi [I], … ewe a nap seni meinisin, an epwe chech pokiten metek, me cha seni kinikinin unuchan” (Doctrine and Covenants 19:18). I chok a tongeni fori ei.

Jises a no ngeni Calvary, me non ena fansoun ese pungoch mi afat me non uruwon fonufan, A irapengesino. Ese wor emon ita a tongeni angei Manawan seni I. Pokiten i ewe Noun Kot Anamon, Mi wor an manaman seni manon futuk. I ita a tongeni iotek ngeni Saman, me mwicheichen chon nang ita ir mi tongeni eto angasano seni An weires me pwarano An manaman won mettoch meinisin. “Nge epwe ifa usun epwe ponueta met ekkewe pukefen a apasa” Jises a kapas eis nupwen ra amam I, “epwe iei usun met epwe fis?” (Matthew 26:54).

Ren unusen an aneasosich ngeni Saman—me ewe ennetin tong fan itach—Jises a ennetin fangetani Manauan me awesano An we unusen me ennetin achasefan, minne a tufich non fansoun meinisin nom me feinfeino.

Jises a annuku ngeni Noun Aposel repwe sopweno An angang mwirin An mano. Ifa usun repwe fori? Ekkoch me neir ir chon ataw, me ese wor me neir ra kaeo non ekkewe iwen fan ne afanafan. Non ena fansoun, An Kraist we Mwichefen a nikinikin mworono. Nge ekkewe Aposel ra angang fengen won wiser kewe me forata uruon ewe fonufan.

Met a efisi pochokun epwe wor seni ena sokkun apwangapwang? Souemwenin mwichefen Anglica me sou sinenap Frederic Farrar a apasa: “Mi wor eu, fokkun eu chok ponuwan mi tufich ina—ewe manausefan seni mano. Meinisin ekkei ekkesiwin ra fis pokiten ewe manamanen manausefan an Kraist.”⁴ Usun chon pwarata ren ewe manau sefan an ewe Samon, ekkewe Aposel mi sinei pwe ese wor met epwe tongeni akaunoi fetanin ei angang. Ar pwarata eu pisekin manamanen tipeeu nupwen ewe Mwichefen akom a ngas seni mettoch meinisin.

Ei fansoun Paska, ngang emon me nein Noun chon pwarata mi epinipinino, Ua pwarata pwe eu nesosoren Raninfel, ewe Samon Jises Kraist a manausefan seni mano an epwe apochokuna kich me atai ekkewe ririn mano fan itach meinisin. Jises Kraist mi manau! Pokiten Ii, mano esapw ina muchunon. Ewe Manausefan ina an Kraist niffang ese kamo me ngeni meinisin.

Sasing

Kraist me Mary Magdalene ren ewe peias

Krait me Mary ren ewe Peias, seni Joseph Brickey

Feito ren Kraist

Ewe kapas allim me Achasefan an Jises Kraist fan iten meinisin—ina, iteiten meinisin. Eu chok anen ach sipwe mefi unusen feiochun an ewe Chon Amanau ewe Achasefan ina ren an emon me emon epwe pwisin etiwa an tingor: “Feito rei” (Matthew 11:28).

Sia feito ren Kraist nupwen sia anganga ach nuku non I me aier. Sia feito ren I nupwen sia paptais non Itan me angei ewe niffangen Ngun mi Fel. Sia feito ren I nupwen sia aponueta ekkewe annuk, angei ekkewe angangepin, aponueta ach pwon, mwasangasangeiti non tempel, me manaueni manauen chon kuno noun Kraist.

Fan ekkoch, kopwe mefi tipemwaramwar me netipengaw. Ngasangasom epwe riaffou fan itom pwisin ika fani iten emon ka fokkun tongei. Enip kopwe mefi chourek ren ekkewe tipis an ekkoch. Ekkewe mwanino ka fori—enip epwe weires—epwe awora ngonuk om kopwe nuokus pwe kosap chiwen tongeni me kinamwe me pwapwa. Non ekkena fansoun, chechemeni pwe ewe Chon Amanau ese chok angasano ekkewe mi chourek ren tipis nge a pwan “riafou[ni] metek me riaffou me sokkun sossot meinisin” (Alma 7:11), pachenong om! Pokiten met A fori fan itom, A sinei pusin an epwe anisuk nupwen ka etiwa An etiwetiwen manauen ekkesiwin: “Feito rei.”

Jises a fen affata pwe meinisin noun Samach won Nang semirit rachok taitap won feiochun An kapas allim me Achasefan. A achema ngeni kich pwe meinisin “ra tufich usun ewe emon me usun ewe pwan emon, iwe ese emon epwe tiweno” (2 Nifai 26:28).

“A etiwer meinisin pwe repwe feito ngeni I me angei seni an kirekiroch; iwe ese amam emon epwe feito ngeni i, chon me pwechepwech, chon fotek me chon ngaseno, mwan me fefin” (2 Nifai 26:33).

“A etiwer meinisin”—wewen pwe kich meinisin! Sisap awora esisinen amwani me sokkun ekiek an aramas woch ika ekoch. Sisap tongeni epeti anen an ewe Chon Amanau tong ika ekieki och mettoch minne epwe atowawa kicheno seni. Usun ua apasa me mwan, “Ese tufich an [emon] epwe koketiw fan ewe saramen an Kraist we Achasefan esemuch.”⁵

Nge, usun ngang me Sister Holland aua afanafan ruu maram me mwen an mano, sia annuk pwe epwe wor ach“ tong ennet, ewe tong ennet ina tong” (2 Nifai 26:30).⁶ Iei ewe tong ewe Chon Amanau a pwari ngeni kich, pun “I ese fori och mettoch tiwenon chok ika pwe epwe efeiochu fonufan; pun i a tongei ewe fonufan, pwan mwo i a pusin watiw manauan pwe i epwe emerato aramas ngeni i” (2 Nifai 26:24).

Ua pwarata pwe ewe kapas allim me ewe Achasefan an Jises Kraist ir fan iten meinisin aramas. Ua iotek pwe kopwe fokkun pwapwaasi ekkewe feioch A wato.