Liahona
Ong Kakehlepen Me Pwulopwul: En Sounkomouro Padahk ohng Kumwail
Mahs 2024

“Ong Kakehlepen Me Pwulopwul: En Sounkomouro Padahk ohng Kumwail,” Ong Kakehlepen Me Pwulopwul, Mahs 2024.

Padahk en Sounpwung kan Ong Kakehlepen me Pwulopwul Mahs 2024

Ong Kakehlepen Me Pwulopwul: En Sounkomouro Padahk ong Kumwail

Sang Elder Dieter F. Uchtdorf

Sang Pwihn en Wahnpoaron Ehk Riemeno

Kilel
Dieter F. Uchtdorf

Mehn kaweid wet kin sawas kaineneiong amwail pilipil kan ong Sises Krais oh Sapwellime padahk.

Kilel
Sises Krais

Stand at the Door and Knock, sang J. Kirk Richards

Medewe me kumwail koukousoan nan Kalili en mahso, sounpar riekid samwalahro. Kumwail oh kempoakepahmwail kan luhkohngehr ehu kaudek en me pwulopwul me pahn wiawi ni sinakokehn wasahu, me sounpadahk kesempwal men pahn patehng: Sises en Nasared. Lel ansou ehu nan Ah padahko, Sises ketin luke me pwulopwul kan nan pokon o en kalelapak Ih.

Soangen kalelapak dah kumwail medewe kumwail kak rongada?

Mwein ekei peidek kan pahn doke tiahk oh irair kan en ansouo. Ahpw I udahn kamehlele me pali tohto pahn duwehte kalelapak kan en rahn pwukat.

Ni karasepe, nan Kadehde Kapw, aramas idek soangen peidek pwukat ong Sounkomouro:

  • Dahme I anahne wia pwe ien kak ahneki mour soutik?1

  • I kak alahlda? I wia kisehn?2

  • Ma riei pwutak wie dihp ohng ie, pak depe I anahne mahkohng ih?3

  • Dahme pahn wiawihong sampah nan rahn kohkohdohkan? I pahn sohte lelohng apwal?4

  • Komwi kak kamwahuihala kempoakepahio?5

  • Dahme mehlel?6

  • Ia mwomwen ahi pahn ese ma I kohkohla wasa me pwungo?7

Kitail koaros sohte kin medewe soahngohte nan ansou kan? Sounpar epwiki kei douwer powe, peidek kan saikinte wekidekla. Oh pil duwehte sapwellimen Sounkomouro limpoak ong irail kan me kin peidengki. E ketin mwahngih uwen kahpwal oh kapingiping mour kak wia. E ketin mwahngih uwen eh mengei kitail en sehsehla atail ahlo. E ketin mwahngih me kitail kin pwunodki pak tohto rahn me kohkohdoh kan. Oh E ketin mahsanih ong kumwail oh ngehi, duwehte me E ketin mahsaniher ong Sapwellime tohnpadahk en mahs koa:

  • “Ieremen mweidehng amwail mongiong en kin ahniki insensuwed.”8

  • “Ngehi me ahl [oh] me mehlel.”9

  • “Kohdo iangiehla.”10

Ni ansou me mie pilipil kesempwal kan me kumwail anahne pilada, Sises Krais oh Sapwellime rongamwahuo me keieu wia pilipil kaselel. Ni ansou me mie amwail iren peidek kan, Sises Krais oh Sapwellime rongamwahuo me wia pasapeng keioun kaselel.

Met me kahrehda ahi poakohng Ong Kakehlepen me Pwulopwul: Mehn Kaweid ehu ong Wiahda Pilipil kan. E kin idih kitaillahng Sises Krais pwe kitail en kak alehdi Sapwellime kehl. I kin kolokol ehu soangen pwuhko nan ahi pwekid ansou koaros. Ni ahi kin tuhweng aramas akan wasahkan nan sampah me men ese dahme kitail, me wia tohn Mwomwohdiso en Sises Krais, kin wiahki dahme kitail kin wiahkan, I kin ehukihong irail mehn kaweid wet.

Ohng Kakehlepen me Pwulopwul kin padahngki mehlel soutik kan duwen Sounkomouro oh Sapwellime Ahlo. Ekin lukei kumwail en wiahda pilipil kan me poahsoanda pohn mehlel pwukoa. Oh e kin ehukihda kapai inoudier kan me E kin ketkihong irail koa me kin idawehn Ih. Menlau wadek, medemedewe, oh ehukihwei mehn kaweid wet.

Lukehiong Ih nan amwail mour

Sises Krais ketin kupwurki en wia kisehn amwail mour—me pahn ieiang kumwail ansou koaros, rahn koaros, ansoun mwahu oh suwed kan. E sohte ketin keskesihker ni imwin ahlo, awiawih kumwail en lella Reh. E pahn ketin ieiang kumwail nan kahk koaros. Ih me Ahlo!

Ahpw E sohte pahn ahngkehlailong nan amwail mour. Kumwail pahn lukehlong, sang ni amwail pilipil kan. Met iei kahrepen mehn kaweid wet ong wiahda pilipil kan, duwehte Ong Kakehlepen Me Pwulopwul, eh inenen kesempwal. Ansou koaros kumwail wiahda ehu pilipil pwung me poahsoanda pohn sapwellimen Sounkomouro mehlel soutik kan, kumwail kin kasalehda me kumwail mwahuki Ih nan amwail mour. Pilipil kan kin ritingada kehl kan en nanleng, oh Sapwellime kehl kin widekdiong nan amwail mour.11

Wiahda ehu Ehupene Kehlail

Kumwail mwein taman me Sounkomouro karasapene irail kan me kin rong oh wia Sapwellime kaweid kan ong ohl loalokeng o me “wiahda imwehu pohn takai ehu.” E kawehwedahr:

“Ni ahnsou eh pahn keteuda oh lapakehda, oh lapalahn kisineng ipidohng ihmwo, e sohte pahn ohla, pwehki e koukoudahr pohn paip ehu.”12

Ihmw ehu sohte kin tengetengete nan melimel ehu pwehki e kehlail. E pil sohte kin tengetengete pwehki takaio kehlail. Ihmwo kin tengetengete nan melimelo pwehki e katengetengdiong takai kehlailo. Kehlepen ehuiong takaio me kesempwal.

Me duwehte, ni atail pahn wiahda atail mourkan, e kesempwal kitail en wiahda pilipil mwahu kan. Oh e kesempwal en wehwehki sapwellimen Sounkomouro mehlel soutiko. Ahpw kehail kitail pahn anahne pwehn kak kesihkerdahng kahpwal en mour kan pahn kohdo ansou kitailehukihong atail pilipil kan ong Sises Krais oh Sapwellime padahk. Ih mepwukat me Ong Kakehlepen Me Pwulopwul kak sewesehkin kitail en wia.

Ni karasepe, kempoakepahmwail kan kak ese me kumwail kin soangen sohte doadoahngki lokaiahn laumwoahumw de lokaia me pahn kamedekehla aramas. Irail kak kilang amwail sewesehda seri men nan wasahn sukuhl me pali tohtohn aramas kin pohnsehse de pil kapailokeseli. Ahpw irail ese me ke kin wiahda pilipil pwukat pwehki Sises Krais padahngkiher me “aramas koaros wia riamwail—iangahki … aramas me sohte duwei kumwail”?13

Kempoakepahmwail kan kak ese me kumwail kin kohla sarawi rahn Sarawi koaros. Irail kak kilang ansou kumwail kin kemehla koul ehu de soikala luhk ehu en kilang soangen kasdo ehu. Ahpw irail ese me kumwail kin wiahda pilipil pwukat pwehki kumwail ahneki “inou sarawi popohl me ehuong Sahm Nanleng oh Sises Krais,” oh me kisehn inou en idawehn Sounkomouro, kumwail kapingki “amwail ahneki Ngehn Sarawio en wia iengamwail ansou koaros”?14

Aramas kakete ese me kumwail sohte kin nim mehn kasahliel de simwok de doadoahngki wini keper teikan. Ahpw irail ese me kumwail kin wiahda pilipil pwukat pwehki Sises Krais padahngkiher me “palinwaramwail kan sarawi,” “e wia kisakis kesempwal sang Samamwail Nanleng,” me wiawidahr rasehng Ih?15

Kempoakepahmwail kan kak ese me kumwail sohte kin mwersuwed de likamw oh me kumwail kesempwalki amwail sukuhl. Ahpw irail ese me met pwehki Sises Krais ketin padahngkiher me “me mehlelo pahn kasaledengkumwailla”?16

Keiou kesempwal, kempoakepahmwail kan ese me kumwail kin wiahda soangen pilipil sohte poaplar pwukat pwehn mehlel ieng sapwellimen Krais koasoandi kan pwehki kumwail ese me “Sises Krais iei kehlpamwail”?17

Ih me wia kehlpomwail.

I kihong kumwail ahi kadehde mehlel me Sises Krais iei me Ahl ohng rahn me kohkohdohkan en marain oh kaselel—amwail rahn kohkohdohkan. Oh Ih pil iei Ahlo ohng rahn pwukat en marain oh kaperen. Alu nan Sapwellime ahl, oh E pahn ketin ieiang uhk. Kumwail kak wia met!

Kempoakepahi me pwulopwul kan, Sises Krais iei amwail kehl. Alialuhiongete Ih, oh E pahn ketin sewesei kumwail en pihrkihda “mehn pihr en ikel kan”18 kolahng popohl soutik me E ketin kaunopadahr ohng kumwail.

© 2024 sang Intellectual Reserve, Inc.Kolokol pwuhng koaros. Intingda nan USA. Kamanaman ohng ni lokaiahn Wai: 6/19. Kamanaman ohng kawehwe: 6/19. Kawehwepen Monthly For the Strength of Youth Message, March 2024. Pohnpeian. 19356 885