Liahona
Fan ko Gelngin e Pi’in ni Fal’yangren: Fare Mulwol rok’ Somoel nifan Ngom
March 2024

“Fan ko Gelngin e Pi’in ni Fal’yangren: Fare Mulwol rok’ Somoel nifan Ngom,” Fan ko Gelngin e Pi’in ni Fal’yangren, Mar. 2024.

Mulwol ni Fan ko Gelngin e Pi’in ni Fal’yangren ko, March 2024

Fan ko Gelngin e Pi’in ni Fal’yangren: Fare Mulwol rok’ Somoel nifan Ngom

Keb rok Elder Dieter F. Uchtdorf

Ko fare Ulungi ko fare Ragag nge L’agruwi Apostle

siasing/Llecheklel
Dieter F. Uchtdorf

Biney e kanawo’en era ayuweg nem ko tin ni gabe me’eleg ni nge ta’areb nigem ngak Yesus Kristus nge machib rok’.

siasing/Llecheklel
Jesus Kristus

Kug Sak’iy u mit fare Maab mug Tugtuguy, ke yib rok’ J. Kirk Richards

Mu tafney nag ni ga bay ko ngiyal’ ni kakrom u Galilee, 2,000 duw kafram. I gur nge pi tafagar rom e kan pinning med ko ba mo’olung nifan e fal’yangren u tigil’ e mo’olung, ni facha’ nira non riy e: Yesus nu Nazareth. Napan e bang ko ngiyal’ nibe non, me mulwol Yesus ngak fapi fal’yangren nibe non ngoraed ni ngar fithed e duwer ngak.

Mit i mang e duwer e gabe lemnag ni gara rung’ag mornga’agen?

Gube tafney nag ni sana boch e duwer era fith mornga’agen e yalen nge rogon e tin ni yima rrin’ ko ngiyal’ nem. Machane ri gube lemnag ni orren e pi duwer nem era wod e duwer ko tin ni gadaedra fith e dabay.

Wod ni, ulan e Bin Be’ech e M’ag, gidii’ e fith ngak Somoel e duwer ni wod e tin ba’aray:

  • Mang e thingar gu rin’ me yag e yafos ndariy n’umngin nap’an ngog?”1

  • Rayag ni gura thap riy? Bay tigil’ig riy?2

  • Fa’anra ke denen walageg ngong, uw urngin yay ni thingar gu n’ag fan u wun’ug?3

  • Mang era buch ko biney e fayleng ko tin nga mm’on ban’em? Rayag ni gura par u fithik’ e gapas?4

  • Rayag ni gara gol nag e gidii’ ni rib t’uf rog?5

  • Mang e tin ni riyul’?6

  • Uw rogon ni gura nang ni gube sor ko gin nib mat’aw?7

Gathi boch e ngiyal’ ma gadaed ma lemnag boch e pin’ey? Urngin e duw nike thumur, ma fapi duwer e dawri gel e thilthil riy. Ku ta’ab rogon ko fare murnguy rok’ Somoel ni dawri thil ngak e pi’in nira fith ngak. Manang ni yafos e momaw’ rogon ma bo’or ban’en nib balyang laniyaen’ daed riy. Manang ni rib mom rogon ni ngad mal’fath gaed ulan e kanawo’. Manang ni ma magfaen’daed ko tin nga mm’on ban’en ni dawri buch. Ma be ga’ar ngom nge gag, ni wod rogon ni yog ngak fapi gachalpen ni kakrom:

  • “Dabi wagagey lanin’med.”8

  • “I gag e kanawo’ [me] gag e tin riyul’.”9

  • “Mu Lakeg.”10

Napan nibay e tin nib ga’fan ningam mel’eg, Yesus Kristus nge fare gospel rok’ e irreram fare bin th’abi fel’ e tin ni ngam mel’eg. Napan nibay e duwer rom, Yesus Kristus nge fare gospel rok’ e irreram e bin nib fel’ ko fulweg duwer.

Irerray fan ni rigu ba’adag fare Fan ko Gelngin e Pi’in ni Fal’yangren: Babyoren e Powi’iy ko rogon ni ngan Me’eleg. Be powi’iy daed ngak Yesus Kristus ya ngeyag ni ngad thapagned gelngin. Gubin ngiyal’ ma bay baken e rake babyoy ney ulan e poket rog. Napan ni gura mada’ nag e gidii’ u dakean e naam ni ba’adag ni nge nang ko mang fan, ni gadaed gidii’en e Galasia ku Yesus Kristus, e gadaed ma rrin’ e tin ni gadaed ma rrin, mug pii’ baken e rake babyoy ney ngoraed.

Fan ko Gelngin e Pi’in ni Fal’yangren e ma machib nag e tin nib riyul’ nib manechubog ko mornga’agen Somoel nge kanawo’ rok’. Ma mulwol ngom ni ngam rrin’ ni wod rogon e pin’ey nib riyul’. Ma kuma pii’ fapi tawa’ath nikan michmicheg nira yib ngak’ e pi’in nira leak. Wenig mu be’eg, mag tafney nag, mag pii’ boch e rake babyor ney ngak e gidii’!

Mu Pinning ni Nge Yib Ngom

Yesus Kristus e ba’adag ni nge mang bang ko yafos rom—gubin ngiyal’, ma bay riy, ko ngiyal’ nib fel’ nge ngiyal’ nib kireb. Gathi kemus nib sak’iy ni bay u tomuren fare pi’i kanawo’, nibe son nigem ni ngam taw ngak. Ya bay nibe un ngom ni gubin ngiyal’. I irr e fare pi’i Kanawo’!

Machane dabi towasoriy ir ngalan e yafos rom. I gur e ngam pinning ni ngeyib ngalan e yafos rom, nibe yan u rogon e tin ni gabe me’eleg. Irerray fan nib ga’fan e rake babyor ney ko rogon ni ngan me’eleg, ni wod fare Fan ko Gelngin e Pi’in ni Fal’yangren. Urngin yay ni gara me’eleg e tin nib mat’aw ni wod rogon e tin nib manechubog ku Somoel, ma arram ni gabe dag ni gaba’adag ni nge yib ngalan e yafos rom. Tiney ni gara me’eleg era bing e tharmiy, nge gelngin nira yib ngalan e yafos rom.11

Mu Fal’ag Thilmew ni nge Gel

Somoel ni weliy mornga’agen e pi’in nira motoyil me rrin’ e n’eni ni yog ngak facha’ nib manmachib ni “toey e nu’un rok’ nga dakean e war.” Ni weliy:

“Ma napʼan ni ra awe nʼuw, me yib e yuluʼ, me thow e nifeng, nge aw ko fare naʼun; ma dabi puth, ya kan dayif nag nga dakean e war.”12

Nu’un e dabi puth u fithik’ e yikoq ni fa’anra ba gel fare nu’un. Ma ku darma par nib gel ni bachan e fare war e bagel. Fare nu’un e ke par nib gel ni bachan e bay u dakean nib peth ko fare war ni rib gel. Be yib gelngin ni bachan fare tha’ ni bay riy ko fare war.

Ku wod, nib tu’uf ni ngad ted e yafos rodaed, ni gadaed be me’eleg e tin nib mat’aw ban’en. Ma rib ga’fan ni ngad nanged fan e tin nib riyul’ nib manachubog rok’ Somoel. Machane fare gelngiy nira yib ni ngan gel nigey ko yikoq era yib u dakean fare tha’ rodaed ngak Yesus Kristus nge machib rok’. Irerram e n’en nima pii’ fare Fan ko Gelngin e Pi’in ni Fal’yangren ni nge ayuwegdaed ngad rrin’ed.

Wod ni, pi tafagar rom e manang ni gabe gay rogon ni damu yog e thin nib yabaq. Bay ni yaedra guy ni gabe non ngak facha’ u sukul ni dariy bee’ nima non ngak fa facha’ ni yima gafgow nag. Machane yaed manang ni gabe me’eleg e pin’ey ni bachan e Yesus Kristus e ke machib nag ni “gubin e gidii’ ma yaed e walag—nib mu’un … e pi gidii’ ney ngay nib thil ngom”?13

Pi tafagar rom e bay ni manang ni gama yean ko misa ni gubin e Madbom. Bay ni yaedra guy ni damur ma motoyil ko boch e tang fa bay boch e kachido ni damur ma un ngay. Machane yead manang ni gabe me’eleg e pin’ey ni bachan e bay “e falfalaen’ rom ko tha’ ko m’ag nikam ngongliy ngak e Chitamangiy nu Tharmiy nge Yesus Kristus,” ni kabang ko fare m’ag rom ni ngam leak wo’en Someol, ma falafalaen’um ngay, “nibay fare Kan ni Thothup rom ni gubin ngiyal’”?14

Gidii’ e bay ni manang ni damur ma un ko unum ni kireb fa fanay e falay ni dani fel’ ngom. Machane yaed manang ni gabe me’eleg e pin’ey ni bachan e Yesus Kristus e ke machib nag ni “dogur rom e ba thothup,” “ni ba tawa’ath nike yib rok’ e Chitamangim nu Tharmiy,” nike ngongliy ni wod ya’an?15

Pi tafagar rom e bay ni yaed manang ni damur ma un ko sasalpi’lugun ma gama rrin’ e sukul rom u fithik’ e yul’yul’. Machane yead manang ni bachan e biney ya Yesus Kristus e ke machib nag “tin nib riyul’ era palog nigem ko kireb”?16

Ma bin th’abi ga’ riy, manang e pi tafagar rom ni damur ma un ko pinn’ey ni bachan e ngeyag ni ngam par ni gab yul’yul’ ko yalen rok’ Kristus ni bachan e ga manang ni “Yesus Kristus e ir gelngim”?17

I Ir e Gelingim.

Gube micheg nag ngom ni Yesus Kristus e irerram kanawo’ey ko tin nga mm’on ban’en nib fel’—tin nga mm’on ban’en nifan ngom. Mak’ir e wo’en fare Kanawo’ ko ma’ang’ang e chiney. Maen u Kanawo’en, mara Un ngom. Rayog ngam rin’e tiney!

Pi ta fagar rog, Yesus Kristus e ir gelingim. Ul’ul ngam un ngak, mara ayuwegnem ni ngam changag “ni wod ni bay poem ni go wod ba egal”18 i yean ko fare falfalaen’ nib manechubog nike ngongliy nifan ngom.

© 2024 ko Intellectual Reserve, Inc. Gubin mat’won nibay. Kan yoloey u USA. Kan micheg nag ko thin nu Ngalis: 6/19. Micheg i pilyeg: 6/19. Pilyeg ko Mulwol Nifan e Gelngin e Pi’in ni Fal’yangren ko, March 2024Yapese.17466 905