Amongoni Ngunum ren Fansoun Meinisin Iotek

Usun ewe soufos Enos a kut maan mwacho nein ewe petewen, a ekieki usun “ewe kapas mine [a] sou rong an saman we ekan kapas usun manau ese much, me ewe pwapwa an ekkewe souneng.” Ekkei kapas “a fokkun ureno [non] netipan” (Enos 1:3).

Pokiten Enos a ureno netipan ren ewe ngun, a fokkun pochokun pwe epwe iotek: “Nguni aechik,” a apasa (Enos 1:4; pacheta auchean).

Met Enos a fori nupwen a mefi ngunun a echik, ei a auchea ewe ngun epwe tumun? “Ua fotopukutiw me mwen ai Chon For,” a apasa, “iwe ua sio ngeni i non iotek mi pochokun me tingor ren tipetekison fan iten pwisin nguni” (Enos 1:4).

Amwararen met Enos a fori nupwen ngunun a echik a iotek “unusen eu ran … me nupwen ewe saram a feito [a] nouwomongeta [nouwan] ngeni nang” (Enos 1:4). Mwirin chok, Kot a ponuweni an iotek me omusano tipisin. Enos a mefi pwe an chourek a musono. Nge pochokunen ngunun ese much me ikewe.

A kaeo usun ewe manamanen nuku non Jises Kraist, me ounusau unusen ngunun fan iten noun aramas—tori ekkewe chon oputa. A pwon ngeni ewe Samon me a angei pwon seni I. Iwe mwirin an Enos we pochokunen iotek, a feino ngeni noun kewe aramas me osuni me pwarata ekkewe mettoch a kuna me sinei. (Nengeni Enos 1:5–19.)

Esapw iteiten iotek epwe ponu non chok ekkei sokkun, nge met sia mefi me sinei ren iotek epwe chok fokkun auchea ngeni kich me ekesiwini manauach. Sia tongeni kaeo ekkoch auchean nesen seni met a fis ngeni Enos non an iotek. Ren awewe:

• Ennetin manaueni ewe kapas allim a tongeni anisi kich ne mefi echiken ngunuch.

• Echiken ngunuch a tongeni iwei ngeni kich ach sipwe fotopuku ne kuta an Samach won Nang aninis.

• iotek ngeni Samach won Nang a tongeni anisi ngunuch epwe otufichi echiken ngunuch—me pwan ekkoch.

• Sia tongeni iotek ekis meinisin, fansoun meinisin.

• Iotek a tongeni anisi kich sipwe aier.

• Iotek a tongeni apochokuna ach nuku non Jises Kraist.

• Sia tongeni angei pusin ach kapasen pwarata pwe Samach won Nang mi ausening kich me sinei kich.

• Ewe kapasen pwarata me pochokun sia angei seni iotek a tongeni anisi kich ne angang me apochokuna ekkoch.

Sasing

Elter Soares emon anuon

Met mi fisi ngeni ren Manamanen Iotek

Usun Enos, Ua kaeo ekkoch sokkun ekkei nesen seni met mi pusin fisi ngeniei. Inei me semei ra fiti Ewe Mwichefenin Jises Kraist ren Aramas mi Pin non Fansoun Soponon me nekukuni, me ua paptais nupwen a wanu ieri. Ua men kan chok soun mefi och, kinamwe non netipei usun Samach won Nang me Jises Kraist, An we kapas allim mi niwinsefanito, me An mwichefen. Nge esap chok non ewe fansoun nupwen ua ier 16 ua iotek usun ewe ennetin ekkei mettoch.

Nei we pissop a pesepes ne tingoreei upwe aiti eu Mwichen sarafo non Raninfen. Ita upwe asukuna ewe nesen usun ifa usun sipwe tongeni angei eu pwarata usun ewe kapas allim seni iotek. Ei asaimen seni nei we pisop a ngeni ei ai upwe fokkun ekipwichi usun pusin ai kapasen pwarata. Ua angei ena fansoun ne kaeo ewe Puken Mormon me iteitan us mefi pwe ewe Mwichefen mi ennet. Ngang mi nuku pwe ewe Chon Amanau Jises Kraist, nge esap mwo fan eu upwe wanong non netipei usun an Moronai we pwon sia kuna non Moroni 10:4–5. Esap fan eu upwe iotek ren ennetin ewe kapas allim.

Ua chechemeni usun ai mefi non netipei ai upwe asukuna ekkewe sarafo nge epwe ifa usun upwe angei ena kapasen pwarata seni iotek, mi auchea upwe iotek. Echiken nguni—non eu napanap mi sokono seni Enos, nge ngang mi ennetin mefi met mi auchea ngeni nguni.

Nupwen ua amonata ewe nesen, ua fotopukutiw me tingor ren enntin netipei ngeni Semei won Nang epwe apungano ngeni ei ewe ennet ua mefi non manawei. Use ekieki nge epwe eu waten pwarata. Nge nupwen ua tingorei ewe Samon ika ewe kapas allim mi ennet, eu kinamwen memef a tonong non netipei—mi mosonoson, ngingi mi noukukun a apungu ngeni ei pwe mi ennet me upwe sopweno ne fori metewe u fori.

Ewe memef a fokkun pochokun me use tongeni upwe monuki ponuwan me apasa pwe use sinei. Ua fokkun mefi pwapwa unusen ewe ran. Ekieki a nom non nang me anchangei usun ewe ningochun memef non netipei.

Ewe Raninfen mwirin, Ua uta mwen chienei kewe non klass unumon ika fomon, ekkewe ra kukun seniei. Ua pwarata ngenir pwe Samach won Nang mi ponuweni ar iotek ika pwe ir mi nuku.

Sasing

Elter Soares

Mwirin feino, ei kapasen pwarata a nonom rei. a anisiei ne fori ai pungun finata, akaewin non fansoun ua kuna sosot. Ena iotek non na fansoun, fiti pwan ekkoch pwarata ua angei seni ekkewe ier, a anisi ei ne pwarata ngeni aramas, fiti pochokun, pwe ir mi tongeni angei ponuwen ar iotek non nukun seni Samach won Nang. Ei mi fokkun ennet nupwe ua pwarata aiwe misineri, emon souemwenin Mwichefen, emon semenap me mwan mi pupunu, me ikenai ua emon Aposel.

Ewer, sise chok iotek nupwen sia mefi pwe mi namot ngeni ngunuch. Nge, inet sipwe iotek? Me met sipwe ioteki? Ewe mochomochen ponuwan iei fansoun meinisin me faniten mettoch meinisin.

Kot i Semach won Nang. Ach sinei ei ekesiwin ifa usun sipwe iotek Ewe Soufos Joseph Smith a aiti kich: “Sinei Kot, sia poputa ne sinei ach sipwe kapas ngeni I, me ifa usun sipwe tingorei me sipwe angei ponuwan. … Nupwen sia moneta ach sipwe feito ngeni I, A moneta ne feito ngeni kich.”¹

Samach won Nang a chok moneta ne ausening ngeni kich me mochen kich sipwe iotek ngeni I iteitan me fansoun meinisin. Sipwe “kapas ngeni ewe Samon ren unusen [ach] foffor” (Alma 37:37) me iotek nesosor, neonowas, me nepwin. Sipwe iotek non imw, non angang, non sukun—ekis meinisin me non mettoch meinisin sia fori (nengeni Alma 34:17–26).

Sipwe iotek non ach famini (nengeni 3 Nifai 18:21). Sipwe iotek “non kapas me non [netipach], ne pwapwano me ne monomon” (Doctrine and Covenants 81:3). Iwe “nupwen [sise] sio ngeni ewe Samon, [sipwe] mut [ngeni] netipach epwe ureno, sopweno ne iotek ngeni i ren [ach] osupwang, me an ekkewe chon [oruch] osupwang” (Alma 34:27). Me mi auchea sipwe iotek ngeni ewe Sam non iten Jises Kraist (nengeni 3 Nifai 18:19–20).

Sasing

Joseph Smith emon anuon

Sassingin Joseph Smith seni Walter Rane esap wor kapin

Kapas ngeni Samach won Nang

Samach won Nang a mochen efeiochu kich. Me I epwel—ika sia tingor. Ewe Soufos Joseph smith a aiti kich, “Chechemeni pwe ika ese wor tingor sise tongeni angei; iwe nengeni, tingor non nuku, iwe epwe angei ekkewe feioch mine Kot a sinei pwe feioch ngonuk.”²

Ach iotek fansoun meinisin eu mettoch a fokkun auchea a anisi manauen ngunuch ngeni echiken ngunuch. Kapas ngeni Samach won Nang ren iotek a tufich me ketiw ekis meinisin me fansoun meinisin.

Eu ekkewe uwekisin ukan sani a kapas usun ifa usun ach sipwe kapas ngeni Samach won nang nupwen sia fotopuku ne iotek: “Kopwe tipetekison; me ewe Samon om Kot epwe emwenuk ren poun, me ponuweni om iotek” (Doctrine and Covenants 112:10). Nupwen sia tipetekison me anneasosich, Samach won Nang epwe nonom rech. Epwe emweni kich ren poun. Epwe aiti ngeni kich ian sipwe feino ia me met sipwe fori. I epwe ponuweni ach iotek anongonong won An angang, mochen, fansoun, me met mi ennetin sinei epwe och ngeni kich.

Sipwe chechemeni ei me pwapwaiti ekkewe tufich ngeni ewe mwotun king an Kot me angei ekkewe feioch ren Poun.