Kamaiua Tamneim ma te Tataro n Tainako

Ngke te burabeti Enoti e mwananga ni kaeman n te buakonikai, e iangoi taian “taeka ake [e] aki toki n ongo mai [iroun] tamana ake e taetaekin bwa iai te maiu ae akea tokina, ma te kimwareirei are e reke irouia aomata aika itiaki.” Taeka aikai e “rin [i] nanou”Enoti 1:3).

Ibukina bwa Enoti e a mena n te iango n tamnei, e namakina korakoran kan buokana: Tamneiu e baki,” e taku (Enoti 1:4; e kairaki ma katuruturuana).

Tera ae karaoia Enoti n aei ngke e namakina bakin tamneina, n aei e kainanoa kamwarakean maiuna n tamnei? “ I katorobubua imatan te Tia Karikai,” e taku, “ao I wewete nakoina i nanon te tataro ma nanou ni kabane ao ni bubuti ibukin tamneiu” (Enoti 1:4).

Ngaia e bon korakora bwakin tamnein Enoti “e bwanin ana bong n tataro … ao ngke e a bong ao [e] kabaibati riki bwanaana are [e] roota karawa”Enoti 1:4). E ngae n anne, te Atua e kaeka ana tataro, ao e kabwarai ana bure. E mauna namakinan ana bure Enoti mai rouna. Ma kamwarakeam maiuna n tamnei e aki toki ikanne.

E reiakina taekan mwaakan te onimaki iroun Iesu, ao e tataro ma tamneina ni kabane ibukiia ana aomata—riki ana kairiribai. E karaoi berita aika tabu ma te Uea ao e kawakin berita mai Irouna. Ao imwiin korakoran ana tataro Enoti, e mwaamwananga i buakoia ana botanaomata n taetae ni burabeti, ao ni kakoauai bwaai aika e a tia n noori man ongo taekaia. (Taraa Enoti 1:5–19.)

Tataro ni kabane aki kaekaaki n te kawai ae kakukurei, ma ara taneiai n tataro e kona n riki ni uaana ao ni bitaki te maiu. Ti kona n reiakina kakawakin reirei tabeua man ana taneiai n tataro Enoti. N aron ae:

• Te kekeiaki ni maiuakina te euangkerio ni koaua ae bwanin e na buokiira n ataa bakin tamneira.

• Bakin tamneira e kona ma n tataro ni katorobubua n ukora ana buoka Tamara are i Karawa.

• Te tataro nakon Tamara are i Karawa e kona ni buokiira ni katokii bakin tamneira—ao a mwaiti riki.

• Ti kona n tataro n taabo nako, n taai nako.

• Te tataro e kona ni buokiira n rairi nanora.

• Te tataro e kona ni kakorakora ara onimaki iroun Iesu Kristo.

• Ti kona ni karekea ara kakoaua i bon iroura bwa Tamara are i Karawa e ongo iroura ao e atai arora.

• Te kakoaua ao te korakora are ti karekea rinanon te tataro e kona ni buokiira ni beku ao ni kakorakoraia tabeman.

Tamnei

Unimwaane Soares ngke te teei ni mwaane

Au Taneiai ma Mwaakan te Tataro

N ai aron Enoti, I reiakin tabeua reirei aikai ake ti te arona n rinanon te taneiai i bon irou. Au karo a kaaina Ana Ekaretia Iesu Kristo ibukiia Aika Itiaki ni Boong aika Kaitira ngke bon te teei ni mwaane ngai, ao I bon bwabetitoaki ngke e koro waniua au ririki. I aki toki ni karekea tamaroan, te namakin ae abuee inanou n taekan Tamau are i Karawa ao iaon Iesu Kristo, Ana euangkerio ae kaokaki, ao Ana Ekaretia. Ma bon akea ni karokoa ae I kaania koron 16 au ririki are I a tataro n au moan tai iaon taekan koauan bwaai aikai.

Au bitiobi ae kaungaai bwa n na reireiniia roronrikirake n te kiraati n te Reirei n Tabati. I kantaningaaki bwa n anga te reirei iaon aron karekean te kakoaua man te euangkerio rinanon te tataro. Te katabeaki aei mairoun au bitiobi e anganai bwa N na iangoia riki ni kamatoa oin au kakoaua. I tia n anaa au tai ni kamatebwaia ana Boki Moomon ao n namakinna n tainako bwa te Ekaretia e bon koaua. I karekea au koaua iroun te Tia Kamaiu Iesu Kristo, ma I tuai ni karekea inanou ana berita Moronaai e kuneaki n Moronaai 10:4–5. I tuai n tataroakina koauan raoi te euangkerio.

I uringnga te namakin inanou bwa ngkana N nang reireiniia roronrikirake aikai e kanga karekean te kakoaua rinanon te tataro, N na riai n tataroakina te kakoaua boni ngai. E baki tamneiu—tao inanon kawai aika kaokoro mairoun Enoti, ma I namakina kainnanoan te maiu n tamnei.

Ngke I katauraoa te reirei, I katororobubua ao n anga kukurein nanou nakon Tamau are i Karawa ni kamatoa te koaua are I namakina inanou. I bon aki kantaningai bwaai ake a korakora bwa a na kaotaki. Ma ngke I bubutia te Uea ngkana e bon koaua te euangkerio, e roko nakon nanou te namakin ae kakukurei—are te bwana ae e uarereke are e kamatoa nakoiu bwa e bon koaua ao N na riai n reitanako ni karaoa te bwai are I karaoia.

Te namakin e bon korakora n te aro are I aaki kona ni kakea te kaeka anne ao taekina bwa I aki ataia. E bwanin au bong anne n namakina te kukurei. Au iango e bon mena i karawa n iangoi tamaroan namakin ake a mena inanou.

Te Tabati are imwina, I tei imataia kaain au kiraati ake teniman ke aman, ake a bon bane ni uarereke riki nakoiu. I kakoaua nakoia bwa Tamara are i Karawa e na kaekai aia tataro ngkana iai aia onimaki.

Tamnei

Unimwaane Soares

Mai ikanne, e tiku te kakoaua aei irou. E buokai ni karaoi babaire, riki inanon taai ngkana I kaaitarai taian kangaanga. Te tataro n te bong anne, n ikotaki n reitiia taan kakoaua ake I a tia ni karekei rinanon ririki, e anganai te kakoaua nakoia aomata, ma te koaua ae matoa, are a kona ni karekea te kaeka mairoun Tamara are i Karawa ngkana a tataro n onimaki. Aio e bon koaua ngkai I a tia ni kakoaua ngke te mitinare, ngke te tia kairiiri n Ekaretia, ngke te karo ao te buu , ao riki n te bong aei ngkai te Abotoro.

E koaua, ti aki tataro ngkana ti namakina te korakora ae onoti ni kainanoa te maiu n tamnei. Ngaia, ningai ae ti riai n tataro iai? Ao tera ae ti riai n tataro ibukina? Te kaeka ae uarereke bon ni katoa tai ao ibukin bwaai nako.

Te Atua bon ngaia Tamara i Karawa. Ataakin te bitaki aei n arora n tataro. Te Burabeti Iotebwa Timitii e reirei: “Ni karekean ataakin te Atua, ti na moanna n ataia bwa ti na kanga ni Kawaria, ao ti na kanga ni bubuti n te aro are ti na karekea te kaeka. … Ngkana ti a tauraoi n roko Nakoina, E tauraoi ni kawariira.”¹

Tamara are i Karawa e aki toki n tauraoi nakoira ao e tangiriira bwa ti na kabatiaa ara tataro n tainako Nakoina. Ti riai n “reitaki ma te Uea n ara waaki [ni] kabane” (Aramwa 37:37) ao tataro n te ingabong, tawanou, ao te tairiki. Ti riai n tataro ni mweengara, n te mwakuri, n te reirei—n taabo nako ike ti mena iai ao iaon ara waaki nako (taraa Aramwa 34:17–26).

Ti riai n tataro ma ara utu (taraa 3 Nibwaai 18:21). Ti riai n tataro ni “bwanaara ao [inano]ra, n ana tabo te bota n aomata ao n tabo aika a onoti” (Reirei ao Berita aika Tabu 81:3). Ao “ngkana [kam] aki tang nakon te Uea, [ti riai] kaona [nano]ra, ma ni kakorakoraira n tataro nakoina n aki toki ibukin [mweraoi]ra, ao mweraoia ake a mena i rariki[ra]” (Aramwa 34:27). Ao ti na tataro n tainako nakon Tamara are i Karawa n aran Iesu Kristo (taraa 3 Nibwaai18:19-20).

Tamnei

Iotebwa Timiti ngke te ataeinimwaane

Kabwarabwaraan tamnein Iotebwa Timiti iroun Walter Rane, e na aki karaoaki katotongana

Kawaran Tamara are i Karawa

Tamara are i Karawa e tangiria ni kakabwaiaira. Ao E na—ngkana ti bubuti. Te Burabeti Iotebwa Timiti e reirei, “Uringnga are akean te bubuti ti aki kona ni karekea te bwai teuana; ngaia are, bubuti n te onimaki, ao ko na karekei kakabwaia ngkai te Atua e noori ake tau ni kabaroa iaom.”²

Kabatiaan ara tataro n tainako bon te mwakoro ae kakawaki ni kabaeranta te amwarake n te maiu n tamnei nakon tamneira aika baki. Te itoman ma Tamara are i Karawa riinanon te tataro e bon tauraoi ao ni butimaeaki n taabo nako ao n tainako.

Teuana matennanou ni koroboki aika tabu are e reirei bwa ti na kanga ni kawara Tamara are i Karawa ngkana ti katorobubua n tataro: “Ko na nanorinano; ao te Uea ae Atuam e na kairiko ni baina, ao n anganiko kaekaan am tataro” (Reirei ao Berita aika Tabu 112:10). Ngkana ti nanorinano ao n ongotaeka, Tamara are i Karawa e na mena irarikira. E na kairiira ni baina. E na kaungaira ma taabo ake ti na nako iai ao ni bwaai ake ti na karaoi. E na kaekai ara tataro ni kaineti nakon Ana kantaninga, kawai, ana tai, ma te atatai raoi bwa tera ae tamaroa ibukira.

Ti riai ni uringa aei ao n kabongana ara tai ni kawara ana kaintokanuea te Atua ao karekei kakabwaia mai Irouna.