“Luhlahlfongi In Kraist met liki El Sifilpac Tuhkuh,” Mwe Ahkkweye Mwet Fuhsr, Epr. 2024.
Pweng ke Mahlwem Nuhkwewa luhn Mwe Ahkkweye Mwet Fuhsr Eprel 2024
Luhlahlfongi In Kraist met liki El Sifilpac Tuhkuh
Oasr tari luhlahlfongi luhn Mwet Nephi met liki Leum El tuhkuh ah, ac kuh in oasr luhlahlfonghi yohrohsr met liki El sifilpac tuhkuh.
Kom nuh wi nuhnkuh lah oacna fuhkah in luhlahlfongi ke Leum met liki El tuhkuh nuh facluh? Mwet Nephi emet ah tuh oruh oacna ngacn—“in nget nuh met Misaia, ac luhlahlfongi Elan tuhkuh in oacna El tuhkuh tari” (Jarom 1:11).
Pacl inge, oasr yohrohsr ma suhmuhslah ac ma sihmlac mahtuh ma fahkwack lah Jisus Kraist el moul, misac, ac sifilpac moulyak. Kuht luhlahlfongi ke sie Mwet Lahngo suc tuhkuh tari. Tuhsruhk kuht oacyacpac luhlahlfongi ke sie Mwet Lahngo suc fah sifilpac tuhkuh.
Met Liki Jisus Kraist el Tuhkuh ah, oasr luhlahlfongi luhn mwet Nephi in:
Nuhnak muhnahs ke ma koluk lalos.
“El suc luhlahlfongi lah Kraist elac tuhkuh, el kuh in eis nwacsnwacslah luhn ma koluk lalos, ac kaksak ke enganwack yohk, finne in muh El tuhkuh tari inmahsrlolos” (Mosiah 3:13; ahkuhtweyac wo ituckyang).
Nuhnak Muhnahs Nuh Selos Sifacna.
“Ac tuh tuhkuh nuh sihk sie puhsra, fahk: Enos, ma koluk lom nuhnakmuhnahs nuh sum. … Ohinge, ma suhfal luhk iyucklac. Ac nga fahk: Leum, fuhkah tuh in ohinge? Ac El fahk nuh sihk: Ke srihpen luhlahlfongi lom ke Kraist, suc kom tiac lohng met me kuh liye. Ac yac pucspucs somlah met liki el fah ahkkahlwemyacl sifacna in mahno; … luhlahlfongi lom oruh kom nwacsnwacslah.” (Enos 1:5–8; ahkuhtweyac wo ituckyang).
Orek mwenmwen.
“Kuht etuh ke Kraist, ac oasr finsrak lasr ke wolacna Lal ke ke yac siofokl pucspucs somlah met liki tuhkuh Lal. … Pwacyena kuht kuh in sap ke inen Jisus ac sahk uh ahkos kuht, kuh finohl, kuh nwoa in meoa uh.” (Jacob 4:4, 6; ahkuhtweyac wo ituckyang).
Eis fwackyak.
“Oasr mwet pucspucs suc luhlahlfongi lalos arulacna fokoko, finne met liki Kraist El tuhkuh, suc tiac kuh in sruokyucki lihkihn mwe lihsrlihsr uh, tuhsruhk pwacyena elos liye ke muhtahlos” (Ether 12:19; ahkuhtweyac wowo ituckyang).
Met Liki Jisus Kraist El Sifilpac Tuhkuh, Kuht Kuh In luhlahlfongi In:
Nuhnak muhnahs kac, nuhnak muhnahs nuh sesr sifacna, orek mwenmwen ac eis mwe fwackyak (oacna Mwet Nephi).
Ahkwoe kuhtlac sifacna nuhke tuhkuh Lal.
Ke kuht insacnweacng in liyacacng wuhlweacng lasr, kuht akwoe kuht in muhta ke tohkohsrahi luhn Celestial. “Tuh liye, moul se inge pa pacl luhn mwet uh in ahkolah in ohsun nuh sin God; ahok, liye pacl luhn moul se inge pa pacl luhn mwet uh in oruh orekma lalos.” (Alma 34:32).
Ahkolah facluh nuhke tuhkuh Lal.
Kuht suliyuck sel Prestuhn Russell M. Nelson in wi oasr ke “orekma na yohk se emet fin facluh”—fohlohkweni luhn Israel. “Pahpah tuhmasr Inkuhsrao el sefiac puhs suhna sin nguhn wowo emet Lal —sahp, Nga kuh in fahk muh, tim soko ma wo emet Lal—nuhke fihl sahflah se inge. Nguhn wowo ingacn—mwet srihtacl wowo ingacn, mwet puhlaik ingacn—pa komtacl!”1
Oasr finsrak in pacl upac.
Ke Leum El sifilpac tuhkuh, mwet wo fah muhta in mislac. Leum El fah oruh kuh Lal, ac ma tiac suwohs fah ahksuwohsyeyucklac. “Tuh Leum El fah muhta inmahsrlolos, ac wolacna lal fah on fwaclos, ac el fah tohkohsrah lalos ac mwet orek masap lalos” (liye Doctrine and Covenants 45:59).
Luhlahlfongi ke Misac Moulyak.
Mwet nuhkwewa fah misac moulyak. Ac fah oasr yohrohsr ma wolacna, ke moul kawihl. Kuht kuh in sulpac liye mwet sacohk lasr ma somlah tari. “Nguhn ac ikwoac fah sifilpac fohlohkweni ke luhmah suwohs lal; kwewana mahno ac kuhpahsr fah sifilpac fohlohklac nuhke luhmah wo lal, finne oacna kuht ke pacl se inge” (Alma 11:43).
Mwet Nephi emet ah luhlahlfonghi ke Leum met liki El tuhkuh ah. Kuht kuh in luhlahlfongi muh Leum Elac sifilpac tuhkuh—ke “[kuht] fah [liyacl] ke puhkuhnyeng inkuhsrao, nuknukyang ke kuh ac wolacna yohk” (Doctrine and Covenants 45:44; oacyacpac liye Orekma 1:11). Etweyuck fuhkah lah sifilpac tuhkuh Lal ekuhllah ma kom fah oruh mihsenge?
© 2024 sin Intellectual Reserve, Inc. Suwohs nuhkewa fihliyucki. Printiyucki fin acn USA. Ahkkweyeyucklac nuh ke English: 6/19. Ahkkweyeyucklac ke lweng: 6/19. Lweng nuh ke Monthly For the Strength of Youth Message, Eprel 2024. Language.19353 868