Սեմինարիա
Ալմա 2–3․ Ո՞ւմ ենք ընտրում հնազանդվելու համար

«Ալմա 2–3․ Ո՞ւմ ենք ընտրում հնազանդվելու համար», Մորմոնի Գիրքը. Ուսուցչի ձեռնարկ (2024)

«Ալմա 2–3», Մորմոնի Գիրքը. Ուսուցչի ձեռնարկ

Ալմա 2-3

Ո՞ւմ ենք ընտրում հնազանդվելու համար

Նկար
սուրբ գրությունների շուրջ խորհրդածող երիտասարդներ

Սուրբ գրություններում մարգարեները շարունակ նախազգուշացրել են մեզ, որ բախվելու ենք մեր արարքների հետևանքներին՝ կախված նրանից, թե ում ենք ընտրում հետևելու համար։ Օրինակ՝ նեփիացիների և ամղիկիացիների միջև բախումից հետո Մորմոն մարգարեն ուսուցանում էր, որ նրանք, ովքեր մահացան, «հնձելու են հավերժական երջանկություն կամ հավերժական թշվառություն՝ համաձայն այն ոգու, որին նրանք կամեցել էին հնազանդվել, լինի դա լավ ոգի, թե վատ» (Ալմա 3.26)։ Այս դասը կօգնի ձեզ ավելի լավ հասկանալ, թե ինչ հետևանքներ ունի այս կյանքում ինչ-որ մեկին հետևելու ընտրությունը։

Պատրաստվեք՝ մտքում ունենալով նպատակ։ Մտածեք, թե դասի ժամանակ ինչը կօգնի ուսանողներին «հասկանալ և ապավինել Հիսուս Քրիստոսի ուսմունքներին ու Քավությանը»։ Նախագահ Ռասսել Մ. Նելսոնն ուսուցիչներին խրախուսել է․ «ամեն օր հիշեք այդ նպատակը՝ նախքան ձեր ուսանողներին ուսուցանելը» («Teaching Youth in the Day of the Wave» [Կրոնի սեմինարիաների և ինստիտուտների արբանյակային հեռարձակում], 6-ը օգոստոսի, 2013թ․)։

Ուսանողի նախապատրաստում․ ուսանողներին առաջարկեք նախքան դասը կարդալ կամ լսել Ալմա 2–3 գլուխները։ Հանձնարարեք նրանց մտածել, թե ինչ կարող են սովորել այդ գլուխների պատմությունից։

Հնարավոր ուսումնական վարժություններ

Ո՞րն է պատմության բարոյախրատական իմաստը

Կարող եք ուսանողներին առաջարկել հիշել ուսուցողական պատմություններ կամ առակներ, ապա կիսվել դասարանի հետ։ Անհրաժեշտության դեպքում կարող եք օգտագործել հետևյալ օրինակը։ Եթե ուսանողները ծանոթ են օրինակին, կարող եք առաջարկել նրանց սեփական բառերով պատմել պատմությունը և նշել խրատը կամ դասը։ Դա ուսանողներին կօգնի բացահայտել այն սկզբունքները, որոնք Մորմոնը նախատեսել էր, որ սովորենք իր գրվածքներից։

  • Կարո՞ղ եք մի պատմություն կամ առակ հիշել, որը կյանքի դաս է սովորեցնում։

Դասական առակ է «Տղան, որը գոչում էր՝ «գայլ»» առակը, որը վերագրվում է Եզոպոս անունով մի հին հույն առակասացի։ Պատմությունը մի երիտասարդ հովիվ տղայի մասին է, որը երկու անգամ խաբեց իր հարևաններին՝ հավատացնելով, թե գյուղի ոչխարի հոտի վրա գայլ է հարձակվել։ Տղային մեծ հաճույք էր պատճառում, երբ գյուղացիներից ոմանք շտապում էին օգնության, բայց հասկանում էին, որ ոչ մի գայլ էլ չկա։ Ի վերջո, գայլն իսկապես հարձակվեց հոտի վրա։ Բայց երբ տղան երրորդ անգամ օգնություն կանչեց, ոչ ոք չեկավ նրան օգնելու։

  • Ի՞նչ խրատ կամ դաս կարող ենք սովորել այս պատմությունից:

Մորմոնի Գիրքն ուսումնասիրելու ընթացքում փնտրեք հնարավորություններ, որոնցով կօգնեք ուսանողներին ճանաչել ու բացահայտել Մորմոն մարգարեի ընդգծած սկզբունքներն ու դասերը։

Ինչպես պատմությունները կամ առակներն են հաճախ խրատներ պարունակում, սուրբ գրությունները նույնպես ուսուցանում են դասեր և պատկերում են սկզբունքներ։ Սուրբ գրությունների ուսումնասիրման օգտակար հմտություն է այն, որ Մորմոնի Գիրքն ուսումնասիրելիս նկատեք, երբ Մորմոնը հստակորեն նշում է, թե որն է հիշատակարանում որոշակի պատմություններ ներառելու իր նպատակը։ Նա հաճախ օգտագործում է արտահայտություններ, ինչպիսիք են «Եվ այսպիսով, մենք կարող ենք հստակորեն տարբերել», «Եվ այսպես, մենք տեսնում ենք», «ճշմարիտ, ճշմարիտ» կամ «ահա», որպեսզի իմանանք, որ նա մեզ սկզբունքներ ու դասեր է տալիս (տես Ալմա 24.30, 30.60, 48.17, 62.41, Հելաման 3.27–28)։ Մորմոնի ընդգծած դասերի ու ճշմարտությունների բացահայտումը կարող է օգնել ձեզ անձնական համապատասխանություն գտնել։ Այն կարող է մեծացնել նաև սուրբ գրությունների ուսումնասիրման արդյունավետությունը։

Կարդացեք Ալմա 3.26–27 հատվածները և փնտրեք մի ճշմարտություն, որը Մորմոնը ցանկանում էր, որ սովորենք Ալմա 2–3 գլուխների պատմությունից։ Կարող եք նշել այն, ինչ գտաք:

  • Ի՞նչ բացահայտեցիք:

Եթե ուսանողները Ալմա 3.26–27 հատվածներում ուսուցանվող ճշմարտությունը հասկանալու համար օգնության կարիք ունենան, կարող եք կիսվել հետևյալ տեղեկություններով։

Ձեզ կօգնի ավելի լավ հասկանալ այս հատվածը, եթե նկատեք, որ «ամեն մարդ ստանում է վարձք նրանից, ում նա կամեցել է հնազանդվել» արտահայտությունն առաջարկում է մեզ պատկերացնել, որ մենք աշխատողներ ենք, և մեր ընտրությունները որոշում են, թե ով է մեր գործատուն՝ Երկնային Հայրը, թե՞ սատանան (տես Ալմա 3.27)։ Այս համատեքստում կամենալ բառը նշանակում է հակվել կամ թեքվել մեկ կամ մյուս կողմը։ Հետևաբար, նրանք, ովքեր թեքվում կամ հակվում են սատանայի կողմը, շուտով նկատում են, որ նրա աշխատողն են դարձել և «հավերժական թշվառություն» են ստանում (Ալմա 3.26)։ Ի վերջո, մեր կյանքի ընտրությունները բացահայտելու են, թե մենք ում ենք ընտրել՝ որպես մեր հավերժական գործատու։

Օգտակար կլինի գրատախտակին գրել հետևյալ ճշմարտությունը, որպեսզի ուսանողները կարողանան դասի ընթացքում օգտվել դրանից։

Ալմա 3.26–27 հատվածի հնարավոր ճշմարտություններից մեկն այն է, որ մեր հավերժական երջանկությունը կամ թշվառությունը որոշվում է նրանով, թե ում ենք մենք նախընտրում հնազանդվել այս կյանքում։

Մտածեք ձեր կյանքի և այն մասին, թե ում եք ընտրում հնազանդվել։ Ձգտում եք Հիսուս Քրիստոսի՞ն հետևել։ Թե՞ մեկ ուրիշին եք հետևում։ Այսօր ձեր ուսումնասիրությունը շարունակելիս խորհեք այս հարցերի շուրջ։

Ամղիկին ձգտում է թագավոր լինել

Դատավորների կառավարման վաղ տարիներին Ալմայի և նրա ժողովրդի հավատքն ու երջանկությունը դժվար փորձության ենթարկվեց։

Կարդացեք Ալմա 2.1–12 հատվածները և փնտրեք, թե ինչ փորձության ենթարկվեցին նեփիացիները։

Դասի այս հատվածում կարող եք ներառել «Օժանդակ ուսումնական վարժություններ» բաժնի կրոնական ազատության վերաբերյալ առաջարկությունը։

  • Ի՞նչ էր նախատեսում անել Ամղիկին, եթե թագավոր դառնար: (տես հատված 4:)

  • Ինչպե՞ս արձագանքեցին նեփիացիները։

  • Նեփիացիներն ինչպե՞ս ցույց տվեցին Փրկչին հետևելու իրենց ցանկությունը։

Ընտրություններ և հետևանքներ

Ուսանողներին օգնեք որոնել Աստծուն կամ դևին հետևելու տարբեր հետևանքներ և կիսվել դրանցով։ Դա անելու եղանակներից մեկն է՝ հետևյալ աղյուսակը պատկերել գրատախտակին և ուսանողներին հանձնարարել լրացնել այն։ Մեկ այլ տարբերակ է՝ դասից առաջ պատրաստել թերթիկներ, որոնք կներկայացնեն տարադրամ կամ «վարձք» (Ալմա 3.27)։ Հետո բերեք թղթե երկու պարկ կամ տուփ, որոնցից մեկի վրա փակցրեք «Հետևել Աստծուն», մյուսի վրա՝ «Հետևել դևին կամ նրա սպասավորներին» պիտակները։ Յուրաքանչյուր ուսանողի տվեք առնվազն մեկ թերթիկ և դասարանի կեսին հանձնարարեք կարդալ սուրբ գրքի ստորև թվարկված բաժիններից յուրաքանչյուրը։ Երբ ուսանողները բացահայտեն յուրաքանչյուր պատմության տարբեր վարձքերը, նրանց առաջարկեք գրել դրանք թերթիկների վրա և իրենց վարձքը տեղադրել համապատասխան տարայում։ Երբ ուսանողներն ավարտեն, մի քանի վարձք բարձրաձայն կարդացեք։ Կարող եք ուսանողներին առաջարկել կիսվել, թե Աստծուն հետևելու ինչ լրացուցիչ վարձք են նկատել իրենց կամ ուրիշների կյանքում։

Հետևյալ աղյուսակն արտագրեք սուրբ գրությունների ուսումնասիրության ձեր օրագրում: Կարդացեք ստորև ներկայացվող հատվածները և համապատասխան սյունակում թվարկեք, թե ինչ «վարձք» է գալիս Աստծուն կամ դևին հետևելուց։

«Վարձք նրանից, ում նա կամեցել է հնազանդվել» (Ալմա 3.27)

Հետևել Աստծուն

Հետևել դևին կամ նրա սպասավորներին

Ալմա 2.16–18, 26–31 (Ալման և նեփիացիները)

Ալմա 3.4, 13–14, 18–19 (Ամղիկիացիները)

  • Ի՞նչ նկատեցիք այս երկու պատմություններում։

Նշում․ Անեծքը, որ զգացին և՛ ամղիկիացիները, և՛ լամանացիները, Աստծուց բաժանումն էր՝ նրանց ապստամբության և անհնազանդության պատճառով (տես 2 Նեփի 5.20–21)։ Այդ ժամանակ լամանացիներին և նեփիացիներին տարբերակող նշանն այն էր, որ «լամանացիների մաշկը մուգ էր» (Ալմա 3.6)։ Կարևոր է հիշել, որ այս նշանի բնույթն ու տեսքը լիովին հասկացված չեն։ Մորմոնի Գրքի մարգարեները և ժամանակակից մարգարեները ուսուցանել են, որ մաշկի գույնի համար մարդկանց անարգելը կամ արհամարհելը սխալ է (տես Հակոբ 3.9)։

Կախված ձեր ուսանողների ունակություններից՝ հաջորդ երեքական հատվածների խմբերը տրամադրելու փոխարեն կարող եք ուսանողներին առաջարկել գտնել այլ սուրբ գրություններ, որոնցում նկարագրված է Աստծուն կամ մեկ ուրիշին հետևելու «վարձքը»։ Կարող եք խրախուսել նրանց օգտվել վարդապետության սերտման հատվածներից։

Կարդացեք սուրբ գրությունների հետևյալ հատվածները և այն, ինչ կգտնեք, ավելացրեք ձեր աղյուսակում։

2 Նեփի 2.27

Ալմա 30.60

Մատթեոս 11.28-30

Երբ ուսանողներն ավարտեն իրենց աղյուսակների լրացումը, առաջարկեք նրանց կիսվել, թե ինչ են գտել։ Կիսվելու ընթացքում ուսանողներին տվեք լրացուցիչ հարցեր, ինչպիսին հետևյալ օրինակն է․ դա կօգնի նրանց սուրբ գրություններում գտածը կապել իրենց կյանքի հետ։

Անձնական կիրառումը

  • Ի՞նչ եք նկատել կամ զգացել կյանքում, որը ձեզ ցույց է տվել Ալմա 3.26–27 հատվածներում պատկերված սկզբունքի ճշմարտացիությունը։

Մտածեք ձեր ներկայիս ընտրությունների մասին, որոնք օգնում են ձեզ հետևել Երկնային Հորը և Հիսուս Քրիստոսին։ Որքանո՞վ են դրանք դեպի հավերժական երջանկություն տանում։ Ի՞նչ ընտրություններ եք կատարում, որոնք կարող են հեռացնել ձեզ Փրկչից։ Որոշեք, թե ինչ է անհրաժեշտ անել՝ փոխվելու համար։ Մտածեք, թե Երկնային Հայրը և Հիսուս Քրիստոսն ինչպես կարող են օրհնել և զորացնել ձեզ, երբ ձգտում եք ճիշտ ընտրություններ կատարել, որոնք ձեզ կվերադարձնեն Նրանց մոտ։