“ກັບຄືນໄປເຢຣູຊາເລັມ,” ເລື່ອງພຣະຄຳພີມໍມອນ (2023)
“ກັບຄືນໄປເຢຣູຊາເລັມ,” ເລື່ອງພຣະຄຳພີມໍມອນ
ກັບຄືນໄປເຢຣູຊາເລັມ
ການເດີນທາງໄປເອົາແຜ່ນຈາລຶກທອງເຫລືອງ
ຄອບຄົວຂອງລີໄຮ ແລະ ຊາໄຣຢາໄດ້ເດີນທາງໄປໃນຖິ່ນແຫ້ງແລ້ງກັນດານ. ໃນຄວາມຝັນ, ພຣະຜູ້ເປັນເຈົ້າໄດ້ບອກລີໄຮກ່ຽວກັບພຣະຄຳພີທີ່ຖືກຂຽນໄວ້ໃນແຜ່ນຈາລຶກທອງເຫລືອງ. ຊາຍຄົນໜຶ່ງຊື່ ລາບານມີມັນຢູ່ເຢຣູຊາເລັມ. ພຣະຜູ້ເປັນເຈົ້າໄດ້ກ່າວວ່າ ຄອບຄົວຂອງລີໄຮຕ້ອງໄດ້ເອົາແຜ່ນຈາລຶກທອງເຫລືອງໄປກັບພວກເພິ່ນ ໃນການເດີນທາງຂອງພວກເພິ່ນ.
ພຣະຜູ້ເປັນເຈົ້າໄດ້ບອກລີໄຮໃຫ້ສົ່ງພວກລູກຊາຍຂອງເພິ່ນກັບໄປເຢຣູຊາເລັມ ເພື່ອໄປເອົາແຜ່ນຈາລຶກທອງເຫລືອງ. ພວກອ້າຍຂອງນີໄຟເວົ້າຈົ່ມ. ພວກເຂົາໄດ້ບອກລີໄຮວ່າມັນເປັນສິ່ງຍາກທີ່ຈະເຮັດ. ພວກເຂົາບໍ່ຢາກໄປ.
ມັນເປັນສິ່ງຍາກທີ່ຈະເຮັດ, ແຕ່ນີໄຟຢາກເຊື່ອຟັງ. ເພິ່ນຮູ້ວ່າພຣະຜູ້ເປັນເຈົ້າຈະຊ່ວຍເພິ່ນ ແລະ ພວກອ້າຍຂອງເພິ່ນ. ນີໄຟໄດ້ບອກລີໄຮວ່າ ເພິ່ນຈະໄປເຢຣູຊາເລັມ ແລະ ໄປເອົາແຜ່ນຈາລຶກທອງເຫລືອງ.
ເລມັນ, ເລມູເອນ, ແຊມ, ແລະ ນີໄຟໄດ້ກັບຄືນໄປເຢຣູຊາເລັມ. ເມື່ອເຂົາເຈົ້າໄປເຖິງ, ເຂົາເຈົ້າໄດ້ຕັດສິນໃຈວ່າ ເລມັນຈະໄປເຮືອນຂອງລາບານ ແລະ ຂໍເອົາແຜ່ນຈາລຶກທອງເຫລືອງ.
ເມື່ອເລມັນຂໍເອົາແຜ່ນຈາລຶກທອງເຫລືອງ, ລາບານເອີ້ນລາວວ່າເປັນຄົນຂະໂມຍ. ລາບານເວົ້າວ່າລາວຈະຂ້າເລມັນ.
ເລມັນໄດ້ແລ່ນໜີ ແລະ ບອກພວກນ້ອງຊາຍຂອງລາວເຖິງສິ່ງທີ່ໄດ້ເກີດຂຶ້ນ.
ອ້າຍນ້ອງສີ່ຄົນເຂົາເຈົ້າໂສກເສົ້າ. ເລມັນ, ເລມູເອນ, ແລະ ແຊມຢາກກັບໄປຫາພໍ່ແມ່ຢູ່ໃນຖິ່ນແຫ້ງແລ້ງກັນດານ, ແຕ່ນີໄຟມີແນວຄິດ. ເພິ່ນໄດ້ເວົ້າວ່າ ເຂົາເຈົ້າສາມາດນຳສົມບັດໄປແລກເອົາແຜ່ນຈາລຶກທອງເຫລືອງຈາກລາບານໄດ້. ເຂົາເຈົ້າໄດ້ກັບໄປບ້ານຂອງເຂົາເຈົ້າຢູ່ໃນເມືອງ ແລະ ໄດ້ນຳເອົາຄຳ ແລະ ເງິນຂອງເຂົາເຈົ້າເພື່ອໄປແລກປ່ຽນ.
ເມື່ອເຂົາເຈົ້າໄດ້ສະແດງຄຳ ແລະ ເງິນຕໍ່ໜ້າລາບານ, ລາວກໍຢາກໄດ້ທັງໝົດ. ແຕ່ລາວຈະບໍ່ມອບແຜ່ນຈາລຶກທອງເຫລືອງໃຫ້. ກົງກັນຂ້າມ, ລາວໄດ້ບອກຄົນຮັບໃຊ້ຂອງລາວໃຫ້ຂ້າອ້າຍນ້ອງເຂົາເຈົ້າ ເພື່ອວ່າລາວຈະໄດ້ຍຶດເອົາຄຳ ແລະ ເງິນຂອງເຂົາເຈົ້າ.
ອ້າຍນ້ອງສີ່ຄົນເຂົາເຈົ້າໄດ້ແລ່ນເອົາຕົວລອດ ແລະ ໄດ້ປະຄຳ ແລະ ເງິນຂອງເຂົາເຈົ້າໄວ້ທາງຫລັງ. ຄົນຮັບໃຊ້ຂອງລາບານໄລ່ຕາມເຂົາເຈົ້າບໍ່ທັນ. ອ້າຍນ້ອງເຂົາເຈົ້າໄດ້ລີ້ຢູ່ໃນຖ້ຳ.
ຫລັງຈາກຄວາມຫຍຸ້ງຍາກທັງໝົດເຫລົ່ານີ້, ເລມັນ ແລະ ເລມູເອນໄດ້ໃຈຮ້າຍໃຫ້ນີໄຟ. ເຂົາເຈົ້າໄດ້ຕີນີໄຟກັບແຊມດ້ວຍກິ່ງໄມ້.
ທັນໃດນັ້ນ, ທູດອົງໜຶ່ງໄດ້ມາ ແລະ ໄດ້ຖາມວ່າເປັນຫຍັງພວກເຂົາຈຶ່ງຕີນີໄຟ. ທູດໄດ້ເວົ້າວ່າ ນີໄຟຖືກເລືອກໃຫ້ນຳພາພວກເຂົາ. ແລ້ວທູດໄດ້ບອກພວກເຂົາໃຫ້ກັບຄືນໄປເຢຣູຊາເລັມ. ພຣະຜູ້ເປັນເຈົ້າຈະຈັດກຽມຫົນທາງໄວ້ໃຫ້ເຂົາເຈົ້າເພື່ອຈະໄດ້ຮັບແຜ່ນຈາລຶກທອງເຫລືອງ.