Fakataha Sāpate Uá mo e Tolú
ʻI he Sāpate ua mo e tolu ʻo e māhina takitaha, ʻe ako ai e kōlomu kaumātuʻá mo e Fineʻofá mei he ngaahi akonaki ʻa e kau taki ʻo e Siasí ʻi he konifelenisi lahi fakamuimuitahá. ʻOku totonu ke fai ha fakamamafa ki he ngaahi pōpoaki mei he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá. Ka neongo ia, ʻe lava ke aleaʻi ha faʻahinga pōpoaki pē mei he konifelenisi fakamuimuitahá, ʻo fakatatau ki he ngaahi fie maʻu fakalotofonuá mo e ueʻi ʻa e Laumālié.
ʻI he taimi lahi, ʻe fili ʻe he kau palesitenisī ʻo e kōlomu kaumātuʻá pe Fineʻofá ha pōpoaki konifelenisi ke ako ʻo fakatatau mo e ngaahi fie maʻu ʻa e kau mēmipá, neongo ʻe ʻoatu ʻe he pīsopé pe palesiteni fakasiteikí haʻane fakakaukau. ʻE lava ke fili ʻe he kau takí ha pōpoaki ʻoku felāveʻi mo e tefito naʻe toki aleaʻi ʻi he fakataha alēlea Sāpate ʻuluaki ne fai fakamuimuí pe ko haʻanau fili ha pōpoaki ʻi ha tefito kehe, ʻo fakatatau mo e ueʻi ʻa e Laumālié.
ʻOku totonu ke kumi ʻe he kau takí mo e kau faiakó ha ngaahi founga ke poupouʻi ai e kāingalotú ke nau lau kimuʻa e pōpoaki kuo filí, pea nau omi mateuteu ke vahevahe ʻa e moʻoni ʻo e ongoongoleleí mo e ngaahi fakakaukau ki he founga ke ngāueʻi ai kinautolú. ʻE lava ʻe he ngaahi ʻekitivitī ʻoku fokotuʻu atu ʻi laló, ʻa ia ʻoku fakatefito ʻi he ngaahi tefitoʻi moʻoni ʻo e Faiako ʻi he Founga ʻa e Fakamoʻuí, ʻo tokoniʻi e kau mēmipá ke nau ako mei he ngaahi pōpoaki konifelenisi lahí.
M. Russell Ballard, “Ngaahi Meʻaʻofa Mahuʻinga Mei he ʻOtuá,” 9–11
ʻOku tokangaekina ʻe he pōpoaki ʻa Palesiteni Pālatí ha ngaahi tefito kehekehe—kau ai ʻa e kau palōfitá, tui kia Kalaisí, sākalamēnití, mo e ngāue tokoní—pea ʻe lava foki ke maʻu hake ʻe he kau mēmipa hoʻomou kōlomú pe Fineʻofá ha ngaahi tefito kehekehe ʻoku fuʻu mahuʻingamālie. Fakaafeʻi e kāingalotú ke nau vahevahe ha meʻa mei he pōpoaki ko ʻení ʻokú ne fakalotoa kinautolu. Ko e hā ha ngaahi fakaafe pe ngaahi tāpuaki ne talaʻofa mai, ʻoku tau maʻu hake ʻi he pōpoaki ʻa Palesiteni Pālatí? Fakakaukau ke fakaafeʻi e kāingalotú ke nau fakalaulauloto ʻi ha ngaahi miniti siʻi, ʻa e meʻa ʻoku fakalotoa kinautolu ke nau fai ko e ola ʻo e fealēleaʻaki ko ʻení.
Gary E. Stevenson, “Ko e Loto ʻo ha Palōfita,” 17–20
Ke tokoni ke “mahino [ki he kāingalotú] hono mafatukituki” ʻo e uiuiʻi ʻo ha palōfita foʻou, ʻe lava ke ke fakaafeʻi e kāingalotú ke nau kumi hake ʻi he pōpoaki ʻa ʻEletā Sitivenisoní, ha ngaahi moʻoni mo e fakakaukau ʻe tokoni ʻi hono fakamahino‘i kiate kinautolu e mahuʻinga mo e toputapu ʻo e founga fakalangi ko ʻení. Fakakaukau ke fakaafeʻi e kāingalotú ke nau vahevahe e meʻa ne nau ongoʻi lolotonga e fakataha molumalu naʻe hikinimaʻi ai ‘a Palesiteni Nalesoni ko e Palesiteni ʻo e Siasí. Te ke lava foki ʻo tā ha foʻi haati ʻi he palakipoé mo kole ki he kāingalotú ke tohi ʻi loto ai ha ngaahi lea pe kupuʻi lea ‘okú ne fakamatalaʻi e loto mo e ʻulungaanga ʻo Palesiteni Nalesoní. Ko e hā ha meʻa kuó ne akoʻi mai kuo faitāpuekina ai kitautolu?
Neil L. Andersen, “Ko e Palōfita ʻa e ʻOtuá,” 24–27
ʻE lava ʻe hono aleaʻi ʻo e pōpoaki ʻa ʻEletā ʻEnitasoní, ke fakamālohia ai e falala ʻa e kāingalotú ki he kau palōfita moʻuí. Te ke lava ʻo fakaafeʻi kinautolu ke nau kumi hake heʻene pōpoakí ha meʻa ʻoku tokoni ke fakamahinoʻi kiate kinautolu e ʻuhinga ʻoku tuku ai ʻe he ʻOtuá ke ʻi ai ha kau palōfia ʻi he māmaní pea mo e ʻuhinga ʻoku tau muimui ai kiate kinautolú. Ko e hā ha founga kuo tāpuekina ai kitautolu koeʻuhí ko ʻetau maʻu ha palōfitá? ʻE lava ke vahevahe ʻe he kāingalotú ʻa e founga naʻa nau maʻu ai ha fakamoʻoni ko Palesiteni Lāsolo M. Nalesoní ko e palōfita ʻa e ʻEikí pea mo e Palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
David A. Bednar, “Angamalū mo Loto Fakatōkilalo,” 30–33
Ke ueʻi fakalaumālie ha fealēleaʻaki fekauʻaki mo e pōpoaki ʻa ʻEletā Petinaá, te ke lava ‘o tohi ‘i he palakipoé Ko e angamaluú ko e … pea mo e Ko e angamaluú ‘oku ʻikai ko e … pea kumi leva ʻe he kāingalotú ʻi he pōpoaki ʻa ʻEletā Petinaá pea tohiʻi he palakipoé ha ngaahi kupuʻi lea te nau maʻu hake ʻokú ne fakakakato e ongo sētesí. Ko e hā ʻoku tau ako mei he pōpoaki ko ʻení ʻokú ne ueʻi kitautolu ke tau toe angamalū ange? Ko e hā ha ngaahi sīpinga ʻo e angamaluú ʻe lava ke tau fakakaukau ki ai? Ko e hā ha founga te tau lava ʻo fakaʻaongaʻi ai e faleʻi ʻa ʻEletā Petinā ke tau angamalū ange aí?
Bonnie L. Oscarson, “Kau Finemuí ʻi he Ngāué,,” 36–38
Ko e ngaahi fehuʻí ko ha founga ia ʻe taha ke fakaafeʻi ai e fakalaulaulotó. Fakakaukau ke tohi ʻi he palakipoé ha ngaahi fehuʻi ʻe niʻihi ʻoku nau tali e pōpoaki ʻa Sisitā ʻOsikāsoní, ʻo hangē ko ʻení, Ko e hā ha founga te tau lava ʻo fakakau ai e kau finemuí ʻi he ngāue ʻa e ʻEikí? Fakaafeʻi e kāingalotú ke nau kumi hake heʻene pōpoakí ha ngaahi tali ki he ngaahi fehuʻi ko ʻení pea mou aleaʻi e meʻa ʻoku nau akó. Ko e hā ha ngaahi tāpuaki ʻoku maʻu ʻi he taimi ʻoku kau ai e kau finemuí ʻi he ngāue fakaetauhí? Mahalo ʻe lava ke vahevahe ‘e he kalasí ʻenau ngaahi aʻusia ʻi haʻanau ngāue fakaetauhi mo e kau finemuí. Makatuʻunga ʻi heʻetau fealēleaʻakí, ko e hā ʻoku tau ongoʻi ke faí?
Dale G. Renlund, “Hisitōlia Fakafāmilí mo e Ngāue Fakatemipalé: Silá mo e Fakamoʻuí,” 46–49
Naʻe lea ʻa ʻEletā Lenilani ʻo kau ki he mata meʻa-hā-mai ʻa ʻIsikeli ki he vai naʻe tafe mei he temipalé (vakai, ʻIsikeli 47:8–9). ʻE lava ke tā ʻe ha mēmipa ʻo e kōlomú pe Fineʻofá ha fakatātā ʻo e meʻa-hā-mai ko ʻení ʻi he palakipoé. ʻOku tatau fēfē ʻa e ngaahi tāpuaki ʻo e ngāue fakatemipalé mo e hisitōlia fakafāmilí, pea mo e vai ʻi he mata meʻa-hā-mai ʻa ʻIsikelí? Te ke lava ʻo fakaafeʻi e kalasí ke nau vahevahe e ngaahi tāpuaki ʻo e ngāue fakatemipalé mo e hisitōlia fakafāmilí kuo nau aʻusia. Ko e hā te tau lava ʻo fai ke ngaohi ʻa e hisitōlia fakafāmilí mo e ngāue fakatemipalé ko ha konga mahuʻinga maʻu pē ia ʻo ʻetau moʻuí?
D. Todd Christofferson, “Ko e Kōlomu ʻo e Kaumātuʻá,” 55–58
ʻI he kōlomu ʻo e kaumātuʻá, te ke lava ʻo fakaafeʻi e kau mēmipa ʻo e kōlomú ke nau lau e konga ʻo e pōpoaki ʻa ʻEletā Kulisitofasoní ʻa ia ʻoku ui, “Ko e Taumuʻa ʻo e Ngaahi Liliu Ko ʻEní.” Ko e hā ha meʻa ʻe lava ke tau fai ke fakapapauʻi ʻoku tau aʻusia e ngaahi taumuʻa ko ʻení? ʻI he Fineʻofá, te ke lava ʻo kole ki ha taha ke ne fakamatalaʻi fakanounou ʻa e ngaahi liliu ne fai ki he ongo kōlomu ʻo e Lakanga Taulaʻeiki Faka-Melekisētekí, ʻoku fakamatalaʻi ʻe ʻEletā Kulisitofasoní. ʻE lava ke feinga leva e kau fefiné ke ʻiloʻi e ngaahi tefitoʻi moʻoni ʻoku fokotuʻu mai ʻi he ngaahi liliu ko ʻení, ʻa ia ʻe lava ʻo fakaʻaongaʻi ki he ngāue hoʻomou Fineʻofá. ʻI he kōlomu ʻo e kaumātuʻá pe Fineʻofá, ʻe lava ʻe he kāingalotú ʻo aleaʻi e meʻa ʻoku nau ako mei he talanoa ʻo Misa Koutesí pea mo ʻene kaunga ki heʻenau ngāué.
Ronald A. Rasband, “Vakai! Ko ha Kau Tau ʻa e ʻOtuá,” 58–61
Mahalo ʻe hanga ʻe hono hivaʻi, fakafanongo pe lau e fakalea ʻo e “ʻA e Kau Tau ʻa e ʻOtua” (Ngaahi Himi, fika 154), ʻo fakatupunga ha fealēleaʻaki fekauʻaki mo e pōpoaki ʻa ʻEletā Lasipení. Ko e hā ha founga ʻoku tatau ai ʻa e ngaahi kōlomu lakanga fakataulaʻeikí mo e Fineʻofá pea mo ha kau tau fakaʻeiʻeikí? ʻE lava foki ke toe kumi hake pea aleaʻi ʻe he kalasí ʻa e “ngaahi tāpuaki lahi” ʻoku pehē ʻe ʻEletā Lasipeni ʻe maʻu mei hono fokotuʻutuʻu foʻou ʻo e ngaahi kōlomu ʻo e lakanga fakataulaʻeikí. Ko e hā mo ha toe ngaahi tāpuaki kehe kuo tau maʻu— pe ʻoku tau ʻamanaki atu ke maʻu — mei hono fakahoko e ngaahi liliu ko ʻení? ʻE founga fēfē hano toe maʻu kakato ange ʻe he Fineʻofá ʻa e ngaahi tāpuaki hangē ko e “kehekehe ʻo e ngaahi meʻafoakí” mo e “faifakahinohinó”?
Henry B. Eyring, “Ngāue Fakaetauhi ʻi he Ueʻi Fakalaumālié,” 61–64
Ko e fakamatala ʻa Palesiteni ʻAealingi ʻo kau ki ha ongo lea ʻi he sākalamēnití fekauʻaki mo e ngāue fakaetauhí naʻe ongo kiate iá. Mahalo te ke lava ʻo kole ki ha vaheua ʻe taha ʻo e kōlomú pe kau Fineʻofá ke nau toe vakaiʻi e lea ʻa e kiʻi tamasiʻi taʻu 14, kae vaheua ʻe tahá ke nau vakaiʻi e talanoa fekauʻaki mo e faiako fakaʻapí. ʻI heʻenau laú, ʻe lava ke fakakaukau ʻa e kalasí ki ha faleʻi te nau fai ki ha kiʻi talavou pe finemui ne toki vahe foʻou ke ngāue fakaetauhi ki ha taha. Ko e hā ha founga “ke tau maʻu [ai] ha ueʻi fakalaumālie mo ha manavaʻofa lahi ange ʻi heʻetau ngāue fakaetauhí”?
Dallin H. Oaks, “Ko e Ngaahi Mālohi ʻo e Lakanga Fakataulaʻeikí,” 65–68
Te ke lava ʻo tohi e ngaahi ʻuluʻitohi ʻo e konga ʻe fā e pōpoaki ʻa Palesiteni ʻOakesí ʻi he palakipoé, ke kamata ʻaki ha fealēleaʻaki. Hili iá pea fakaafeʻi e mēmipa takitaha ke ne lau fakalongolongo e konga ʻe taha pea tohi ʻi he palakipoé ha sētesi ʻe taha ʻokú ne fakamatalaʻi fakanounou e tefitoʻi pōpoaki ʻo e konga ko iá. ʻE lava leva ʻe he kalasí ʻo vahevahe ʻa e meʻa ʻoku nau ongoʻi ʻoku ueʻi kinautolu ke nau faí, koeʻuhi ko e meʻa naʻa nau laú. ʻE fakalakalaka fēfē ʻetau ngāue ko e kau maʻu lakanga fakataulaʻeikí pe kau Fineʻofá, ʻi heʻetau moʻui ʻaki ʻa e ngaahi akonaki ʻi he pōpoaki ʻa Palesiteni ‘Oakesí?
Russell M. Nelson, “Ko e Ngāue Fakaetauhi ʻi he Mālohi mo e Mafai ʻo e ʻOtuá,” 68–75
ʻOku fakaafeʻi ʻe Palesiteni Nalesoni ʻa e kau maʻu lakanga fakataulaʻeikí ke nau “tuʻu hake” ʻo fakaʻaongaʻi e lakanga fakataulaʻeikí ke tāpuekina e fānau ʻa e Tamai Hēvaní. Fakaafeʻi e kau mēmipa ʻo hoʻomou kōlomú pe Fineʻofá ke nau kumi hake e ngaahi sīpinga naʻá ne ʻomí pea aleaʻi e founga ʻoku nau tokoni ai ke fakamahinoʻi kiate kitautolu e founga ʻe lava ʻo fakaʻaongaʻi ai ʻa e lakanga fakataulaʻeikí ke tāpuekina honau ngaahi fāmilí mo e niʻihi kehé. Ko e hā ha ngaahi aʻusia ʻe lava ke tau vahevahe ʻi hono tāpuekina kitautolu ʻaki e mālohi ʻo e lakanga fakataulaʻeikí? Te tau lava fēfē ʻo tokoniʻi kitautolu mo e niʻihi kehé ke maʻu e tui ki hono fakaʻaongaʻi e lakanga fakataulaʻeiki ʻo e ʻOtuá ke “ngāue fakaetauhi ʻi Hono huafá”?
Reyna I. Aburto, “ ʻI he Loto Taha,” 78–80
ʻOku ʻomi ʻe he pōpoaki ʻa Sisitā ʻApetó ha faingamālie ki hoʻomou kōlomú pe Fineʻofá ke vakavakaiʻi e tuʻunga lelei hoʻomou ngāue faaitaha ke fakahoko e ngāue ʻa e ʻEikí. Ke tokoni ki he kalasí ke fai ʻení, te ke lava ʻo fakaʻaliʻali ha ʻū fakatātā ʻo e pupunga pepe fakatuʻí, ʻaʻahi ʻa e Fakamoʻuí ki he kakai Nīfaí (vakai, Tohi Fakatātā ʻo e Ongoongoleleí 82, 83, 84), mo e polokalama tokoni ʻofa fakaetangata ʻa e Siasí (vakai, LDS.org). ʻE lava ke fekumi ʻa e kalasí ʻi he pōpoakí ke ʻilo e founga naʻe fakaʻaongaʻi ai ʻe Sisitā ʻApeto e ngaahi fakatātā ko ʻení, ke akoʻi fekauʻaki mo e ngaahi taumuʻa mo e tāpuaki ʻo e ngāue uouangatahá. Ko e hā ʻe lava ke tau fai ke ngāue ai “ʻi he loto tahá”?
Henry B. Eyring, “Ke ʻIate Kimoutolu ʻa Hono Laumālié,” 86-89
Ke fakatupulaki hoʻo loto-holi mo e malava ke maʻu e Laumālie Māʻoniʻoní, ʻoku vahevahe mai ai ʻe Palesiteni ʻAealingi ha ngaahi aʻusia fakataautaha mo ʻomi ha fakahinohino pau. Hili hono vakaiʻi ʻene ngaahi aʻusiá, ko e hā ha ngaahi manatu faitatau mo iá ʻe lava ke vahevahe ʻe he kau mēmipa ʻo hoʻo kōlomú pe Fineʻofá ʻi he taimi naʻe ueʻi ai ʻe he Laumālie Māʻoniʻoní honau lotó mo fakapapauʻi ange e moʻoní? Mahalo ʻe lava ke lisi ʻe he kalasí ʻi he palakipoé ‘a e fakahinohino ʻoku vahevahe ʻe Palesiteni ʻAealingí ke tokoni ki hono “fakaava hotau lotó ke maʻu e tokoni ʻa e Laumālié.” Ko e hā ha founga ʻe hanga ai ʻe haʻatau muimui ki heʻene fakahinohinó ʻo tokoniʻi ʻetau moʻuí mo hotau fāmilí? ki heʻetau kōlomú pe Fineʻofá?
Dallin H. Oaks, “Fanga Kiʻi Meʻa Iiki mo Faingofuá,” 89-92
ʻOku kau ʻi he pōpoaki ʻa Palesiteni ʻOakesí ha talanoa fakatātā ʻokú ne akoʻi e founga ʻe lava ʻe he fanga kiʻi meʻa iiki mo faingofuá, ʻo maʻu e ivi mālohi lahi ki he leleí pe koví. ‘Oku kau ʻi he ngaahi talanoa fakatātaá ni ha ngaahi aka ʻo ha ʻakau, kau ʻaʻalo, mo e vai ne tafe. ʻE lava ke lau ʻe he kalasí ʻa e ngaahi talanoa fakatātā ko ʻení pea aleaʻi e meʻa ʻoku akoʻi mai ai ʻo kau ki he mālohi hono toutou fakahoko ʻo e fanga kiʻi meʻa iiki mo faingofuá. Ko e hā ʻa e fanga kiʻi meʻa iiki mo faingofua ʻokú ne ʻomi ʻa e ivi takiekina ʻo e Laumālie Māʻoniʻoní ki heʻetau moʻui? Fakaafeʻi ʻa e kalasí ke nau fakalaulauloto ki he meʻa ʻoku nau ongoʻi ke fai ke muimui ai ki he faleʻi ʻa Palesiteni ʻOakesí.
Russell M. Nelson, “Fakahā maʻá e Siasí, Fakahā ki Heʻetau ʻEtau Moʻuí,” 93-96
ʻI he pōpoaki ʻa Palesiteni Nalesoní, naʻá ne kōlenga mai ai kiate kitautolu ke fakatupulaki ʻetau “malava fakalaumālie ke maʻu ha fakahaá.” Ke tokoni ki he kalasí ke nau muimui ki heʻene fakahinohinó, te ke lava ʻo tohi ha ngaahi fehuʻi hangē ko ʻení ʻi he palakipoé: Ko e hā ʻoku tau fie maʻu ai e fakahaá? Te tau fakatupulaki fēfē ʻetau malava ke maʻu ha fakahā—fakafoʻituitui pea ʻi heʻetau fealēleaʻaki fakatahá? Ko e hā ʻa e ngaahi tāpuaki naʻe talaʻofa mai ʻe Palesiteni Nalesoni ʻo kapau te tau fekumi ki he fakahaá? Vahevahe fakakulupu e kalasí, pea fakaafeʻi ʻa e kulupu takitaha ke nau fekumi mo vahevahe ʻa e tali ki ha taha ʻo e ngaahi fehuʻí.
Gerrit W. Gong, “Kuo Toe Tuʻu he ʻAhó ni ʻa e ʻEiki ko Kalaisí,” 97–98
Ko e hā ʻe lava ke ako ‘e he kau mēmipa ʻo hoʻomou kōlomú pe Fineʻofá mei he pōpoaki ʻa ʻEletā Kongi ʻo fekauʻaki mo ʻetau ngaahi fuakavá mo e Fakalelei ʻa Sīsū Kalaisí? Te ke lava fakaafeʻi e kalasí ke nau kumi hake ʻi he pōpoakí, ha ngaahi tāpuaki ʻoku hanga ʻe he Fakalelei ʻa e Fakamoʻuí mo ʻetau ngaahi fuakavá—ʻi heʻena ngāue fakatahá—ʻo ʻomi maʻatautolu. Peá ke fakakaukau ke fai e ngaahi fehuʻi hangē ko ʻení ʻo kau ki he meʻa naʻa nau maʻú: Ko e hā ha founga ʻoku ngāue fakataha ai ʻetau ngaahi fuakavá mo e Fakaleleí ke “fakaʻatā mo fakalāngilangiʻi” kitautolú? Ko e hā ʻokú na tokoni mai ke tau pikitai ki ai mo tukuangé?
Ulisses Soares, “ ʻOku Lea ʻa e Kau Palōfitá ʻi he Mālohi ʻo e Laumālie Māʻoniʻoní,” 98–99
ʻE lava ke ueʻi kitautolu ʻe he pōpoaki ʻa ʻEletā Soalesí ke tau ngāue ʻi he tui, ʻi he taimi ʻoku tau ongoʻi taʻefeʻunga ai ke fai e finangalo ʻo e ʻEikí. Naʻe founga fēfē hono maʻu ʻe ʻEletā Soalesi ha fakafiemālie mo ha fakapapau ki hono uiuiʻi foʻou ko ha ʻAposetoló? Ko e hā naʻá ne ako mei heʻene aʻusia ʻi hono ui ia ko ha palesiteni fakamisioná? Ko e hā ha meʻa te tau lava ʻo ako mei heʻene ngaahi aʻusiá? Tuku ha taimi ki he kalasí ke nau vahevahe ʻenau ngaahi aʻusiá ʻi he taimi naʻa nau ongoʻi taʻepauʻia ai ʻi ha meʻa naʻe fie maʻu ʻe he ʻEikí ke nau fakahoko. Ko e hā naʻa nau fai ke maʻu e tui ke laka atu ki muʻá?
Jeffrey R. Holland, “Ke Ne ʻIate Kinautolu mo Fakamālohia ‘a Kinautolu,” 101–3
ʻI hono ako ‘e he kau mēmipa ʻo hoʻomou kōlomú pe Fineʻofá ʻo kau ki he ngaahi liliu ki he “tafaʻaki ʻo e ngāue fakaetauhi … ʻi he lakanga fakataulaʻeikí mo e Fineʻofá,” ko e hā ha ngaahi fehuʻi ne nau maʻu? Mahalo naʻa maʻu ha ngaahi tali ʻi he pōpoaki ʻa ʻEletā Hōlaní. ʻE lava ke kumi hake ʻe he kalasí ha ngaahi tefitoʻi moʻoni ʻo e ongoongoleleí ʻoku akoʻi ʻe ʻEletā Hōlani, ʻa ia ko ha fakavaʻe ʻo e ngaahi liliu ko ʻení. Ko e hā ha ngaahi fakaafe ʻoku tau maʻu ʻi heʻene pōpoakí? Ko e hā ha ngaahi tāpuaki ʻoku talaʻofa mai? ‘E tokoni fēfē ʻa e ngaahi founga foʻou ko ʻeni ʻo e ngāue fakaetauhí ke tau hoko ai ko ha “kau ākonga moʻoni ʻa Kalaisi”?
Jean B. Bingham, “Ngāue Fakaetauhi ʻo Hangē ko e Fakamoʻuí,” 104–7
ʻOku fakaafeʻi kitautolu ʻe Sisitā Pingihemi ʻi heʻene pōpoakí, ke tau fai ha ngaahi fehuʻi te ne tataki ʻetau ngāue fakaetauhí. ʻE lava ke aleaʻi ʻe he kalasí ʻa e founga ʻe tokoni ai ʻa e ngaahi fehuʻi ko ‘ení ʻi hono tataki ʻenau ngaahi ngāué pea fekumi ki ha ngaahi tali ki he fehuʻi ʻa Sisitā Pingihemí, “ʻʻOku founga fēfē leva [e ngāue fakaetauhí]?” Mahalo te ke tuku ha taimi ke mou fakamanatu ai ha ngaahi sīpinga ngāue fakaetauhi fakafoʻituitui ʻoku vahevahe ʻe Sisitā Pingihemi, pea fakaafeʻi ʻa e kalasí ke vahevahe haʻanau ngaahi sīpinga pē ʻanautolu. Ko e hā ʻoku tau maʻu hake ʻi he pōpoaki ʻa Sisitā Pingihemí ʻokú ne fakalahi ʻetau mahino ki he ʻuhinga mo e founga ʻoku tau ngāue fakaetauhi aí?
Dieter F. Uchtdorf, “Vakai ki he Tangatá!,” 107–10
Te tau tokoni fēfē ke fakamahino ki ha taha ko e feilaulau fakalelei mo e Toetuʻu ʻa Sīsū Kalaisí ʻa e ongo meʻa mahuʻinga taha naʻe hoko ʻi he hisitōlia ʻo e māmaní? Fakaafeʻi e kalasí ke nau fakalaulauloto ki he fehuʻi ko ʻení ʻi heʻenau lau e ngaahi konga ʻo e pōpoaki ʻa ʻEletā ʻUkitofá. Ko e hā ʻoku nau maʻu ʻe ala tokoni ke fakamatalaʻi e ʻuhinga ʻoku mahuʻinga fau ai kiate kinautolu e ongo meʻa ko ʻení? Hili e fealēleaʻaki ko ʻení, ʻe lava ke talanoa e kalasí ʻo fekauʻaki mo e ʻuhinga kiate kinautolu ke “vakai ki he tangatá.” Ko e hā ha founga kuo tau ako ai ke “vakai ki he tangatá”?
Quentin L. Cook, “Teuteu ke Feʻiloaki mo e ʻOtuá,” 114–17
ʻE lava ke kamata hoʻomou aleaʻi e pōpoaki ʻa ʻEletā Kukí ‘aki hano fakaafeʻi ha taha ke ne fakamatalaʻi fakanounou hono fakafoki mai e ngaahi kī ʻo e lakanga fakataulaʻeikí ʻi he Temipale Ketilaní. Fakatatau ki he pōpoaki ʻa ʻEletā Kukí, ko e hā ha ngaahi fatongia ʻoku maʻu ʻe he Siasí ʻa ia ʻoku fekauʻaki mo e ngaahi kī ko ʻení? ʻOku fakahaaʻi fēfē ʻa e ngaahi fatongia ko ʻení ʻi he Siasí he ʻahó ni? Tohiʻi ʻa e ngaahi foʻi lea angamāʻoniʻoni, uouongataha, mo e tuʻunga tataú ʻi he palakipoé pea kole ki he kalasí ke vahevahe ha ngaahi fakakaukau ʻoku nau maʻu fekauʻaki mo e ngaahi tefitoʻi moʻoni takitaha ko ʻeni ʻi he pōpoaki ʻa ʻEletā Kukí. ‘Oku tokoni fēfē ʻa e ngaahi tefitoʻi moʻoni ko ʻení ke tau fakahoko e ngaahi fatongia toputapu ʻo e Siasí?