Te Rairaki Bon Ara Kouru

Te kantaninga ibukin kamatebwai ao reiakinan reirein te euangkerio ni kabane bon ibukin kakorakoraara n rairaki ao ni buokiira n riki n ai aron Iesu Kristo. Iaan bukina aei, ngkana ti kamatebwaia te euangkerio, tiaki tii kakaai rongorongo aika a boou; ti tangiria n riki bwa te “aomata ae tibwa karikaki nabangkai” (2 I-Korinto 5:17). E nanonaki n aei bwa ti na onimakina Tamara are i Karawa ao Iesu Kristo bwa a na buokiira ni bitii nanora, ara taratara, ara mwakuri, ao kateira n aomata.

Ma te aro n anga reirei n te euangkerio are e kakorakora ara onimaki ao ni kairiira nakon te kakai n te rairaki aki riki n te tai ae tii teuana. E reitinako i tinankun te kiratiruum nako nanoia aomata n tatabemaniia ao mweengaia. E kainnanoa te mwakuri ae teimatoa, ni katoabong n ota ao ni maiuakina te euangkerio. Te rairaki ni koaua e kainnanoa ana kairiiri te Tamnei are Raoiroi.

E kairiira te Tamnei ae Raoiroi nakon te koaua ao ni kaota koauan te koaua anne (taraa Ioane 16:13). E kaotai ara iango, e karikirake ara atatai, ao n ringii nanora ma te kaotioti mairoun te Atua, mwiin koaua ni kabane. Te Tamnei ae Raoiroi e kaitiakii nanora. E kaungai nanora n tangiran maiuakinan te koaua, ao E wirikiriki nakoira kawai nakon karaoan aei. Ni koauana, “te Tamnei ae Raoiroi … e na reirei [niira] bwaai ni kabane” (Ioane 14:26).

Ni bukina aikai, n ara kona ni maiuakin, n reiakin, ao n reireia te euangkerio, ti riai moa ao ae kakawaki riki ukoukoran ana iraorao te Tamnei. Te kouru aei e riai n tautaekana ara rinerine ao ni kairi ara iango ao ara mwakuri. Ti riai ni ukoukora te bwai ae karika ana mwakuri te Tamnei iroura ao n totokoa te bwai ae kanakoa te kairoro anne—ibukina bwa ti ataia bwa ngkana ti tau ni karekea te Tamnei ae Raoiroi, ti kona naba n tau ni maeka ma Tamara are i Karawa ao Ana Rikitemanna, Iesu Kristo.